Esai 11

1Nge mɛ bà n dãru bura, ten nuurun di kpii pɔtura ra yari, nge mɛya goo u koo yari u bandu di Isain bweseru sɔɔ. 2Gusunɔn Hunde u ko n da n wãa ka wi. Hunde wi, u koo nùn bwisi ka dam kɛ̃ u ka win tɔmbu kpara, kpa u Gusunɔn kĩru gia u nùn nasia. 3U koo nùn mɛm nɔɔwawa ka kĩru. Mɛya u ǹ tɔnu sirimɔ ka sɛndaru, ǹ kun mɛ, ba nɛɛn sɔ̃. 4U koo sãarobu siriawa dee dee, kpa u bwɛ̃ɛbwɛ̃ɛbu ben gem wɛ̃. Win gari yi ko n sãawa nge bokuru te u koo ka tɔmbu sɛɛyasia, kpa yi n sãa nge takobi ye ya koo tɔn kɔ̃sobu go. 5Win gem ka win bɔrɔkinira ko n sãawa nge kpaka ye u sɛ̃ke pɔraɔ u n ka win tɔmbu kparamɔ. 6Yɛɛ gɔbi ka yãanu nu ko n wãa yam tem, kpa gbeeku musukunu ka boo binu nu kpuna sannu. Mɛya maa gbee sunɔ binu ka kɛtɛ binu nu ko n wãa sannu, kpa bii piibu u nu kpara. 7Kɛtɛba ka gbeeku bɔ̃nu nu koo di sannu, kpa nin binu nu n wãa yam tem. Gbee sinansu su koo yakasu di nge nɛɛ. 8Bibu ba koo kpĩ bu ka surɔkɔnu dwee, kpa bu ben nɔmu kpɛ̃ɛ waa gɔsɔnun wɔrusɔ. 9Baawure u ko n Yinni Gusunɔn yɛ̃ru yibawa nge mɛ nim wɔ̃ku ga nim yiba. Yen sɔ̃na be ba koo da bu Yinni Gusunɔ sã win guurɔ te u tii gɔsia Yerusalɛmuɔ, ben goo kun win winsim kɔ̃sa kuammɛ. 10Saa ye sɔɔ, goo u koo yari Isain bweserun di nge dãa kpii pɔtura, kpa u n sãa nge gidi bɔra bwesenu kpuron sɔ̃. Bwese ni, nu koo gɔsirama win mi. Kpa win wãa yeru ta n Gusunɔn yiiko sɔ̃ɔsi. 11Saa ye sɔɔ, Yinni Gusunɔ u koo maa win dam sɔ̃ɔsi u ka win tɔn be ba tie yakia be ba yarinɛ ba wãa Asiriɔ ka Egibitiɔ ka Paturɔsiɔ ka Etiopiɔ ka Elamuɔ ka Babiloniɔ ka Hamatiɔ Sirin temɔ, ka sere be ba wãa nim wɔ̃kun goonɔ. 12U koo gidi bɔra gira u ka sɔ̃ɔsi ma u koo Isireliba mɛnna be ba raa yoru mwɛɛra, kpa u Yuda be ba raa yarinɛ handunian goonu nnɛ sɔɔ mɛnna. 13Efaraimuba ba ǹ maa ka Yudaba nisinu mɔ̀. Yudaba ba ǹ maa ka Efaraimuba yibɛrɛ tɛɛru mɔ̀. 14Ba koo mɛnna bu Filisitiba wɔriwa sɔ̃ɔ duu yeru gia, kpa bu Filisiti be ko ben yobu. Mɛya ba koo maa mɛnna bu sɔ̃ɔ yari yerugibu wɔri. Ba koo Edɔmu ka Mɔabuba dam dɔre, kpa bu Amɔniba taare. 15Yinni Gusunɔ u koo de Egibitin daarun nim mu gbera. U koo tu nɔmu dɛmiɛ u wom wure ka dam, kpa u tu bɔnu ko kɛri nɔɔba yiru, kpa win tɔmbu bu tu tɔbura ka naasu. 16U koo swaa yara win tɔn be ba tien sɔ̃, be ba wãa Asiriɔ. U koo bu swaa yara nge mɛ u raa bu kua sanam mɛ u bu yara Egibitin di.


Copyright
Learn More

will be added

X\