Esai 1

1Tire ten gari yi sãawa gari yi Gusunɔn sɔmɔ Esai Amɔtin bii u gerua Yudaban sɔ̃, ka sere ben wuu Yerusalɛmun tiin sɔ̃. U gari yi geruawa sanam mɛ sinam beni, Osiasi ka Yotamu ka Akasi ka Esekiasi ba bandu di di Yudaɔ. 2Yinni Gusunɔ u nɛɛ, wɔllu ka tem, i ka man nɔɔwɔ. Na nɛn bibu seeya, na bu swaa sɔ̃ɔsi, adama ba man seesi. 3Naa kinɛnu nu ra n nin kparo yɛ̃. Kɛtɛkunu nu ra n maa yɛ̃ mi nin yinni u ra nu dĩanu yiiye. Adama nɛn tɔmbu Isireliba ba ǹ mam kĩ bu gãanu gia. Ba ku ra gãanu tubu. 4Ma Esai u nɛɛ, bɛɛ Isireliba, bɔ̃ruroba i sãa, domi i durum mɔ̀wa. Toranu nu yiba bɛɛn suunu sɔɔ. Nuku kɔ̃surun wãara i wãa. Bɛɛ kpuro i sankirewa, domi i Yinni Gusunɔ deri. I nùn gɛma, wi, wi u sãa bɛɛn Yinni Dɛɛro, ma i nùn biru kisi. 5Sɛɛyasia birà u koo maa bɛɛ ko, domi nɔn dabina i nùn seesi. I sãawa nge tɔnu wìn bwisikunu kun wã, ma u daa kɔ̃sa mɔ̀. 6Saa win wirun di sere ka win naa taranɔ, kpuro barara. Domi ba ǹ win mɛɛraba ka win bosu teye bu tim gumgim doke bu sere mam nɛɛ, ba koo bɔke. 7Bɛɛn tem mu kua bansu. Mɛn wusu dɔ̃ɔ mwaakira. I tɔn tukobu mɛɛra ba ka mɛn dĩanu gura, ba ǹ gãanu deri. 8Ma Yerusalɛmu ya tiara ye tɔna. Ya kɔ̃ɔre nge kuru resɛm gbaarun suunu sɔɔ, ǹ kun mɛ, gberɔ. Ya yɔ̃ tom ye tɔna nge wuu ge ba tabu bure ba doona. 9Gusunɔ, wɔllu ka tem Yinni ù kun daa bɛsɛn sukum fiiko faaba kue Yerusalɛmu ye sɔɔ, ya koo raa kam kowa nge Sodomu ka Gomɔra. 10Ma Gusunɔ u nɛɛ, bɛɛ wirugibu be i ka Sodomugibu weenɛ, i nɛ, Yinni Gusunɔn gari swaa dakio. Bɛɛ be i maa tie, i ka Gomɔragibu weenɛ, i nɛn wooda mɛm nɔɔwɔ. 11I tamaa bɛɛn yãku dabi ni, nu man gãanu sãa? Bɛɛn yãku yãanu ka yãku gum mɛ i ra ka man yãku dɔ̃ɔ mwaararuginu kue, ya den man tusa. Na wasira ka bɛɛn yaa sabenun yɛm mɛ i ra yɛ̃ke nɛn sãa yerɔ. 12Ye i ra nɛ nɛn sãa yerɔ ka wɔrubu, yeya na bɛɛ bikia? 13Bɛɛn kɛ̃ɛ ni i ka naamɔ mi kama. I ku ra maa ka nu na. Bɛɛn turare ya ǹ man nuburu doremɔ. I ku maa man ye dɔ̃ɔ dokea. Na den bɛɛn kɔ̃sa ye tusa ye i ra ko ì n mɛnna nɛn sãa yerɔ i ka man sã, suru ù n yara, ka tɔ̃ɔ wɛ̃rarugiru sɔɔ, ka sere maa tɔ̃ɔ bakanun saa. I ku maa man tɔ̃ɔ baka nin bweseru diiya. 14Na maa bɛɛ sɔ̃ɔmɔ, bɛɛn tɔ̃ɔ baka ni kpuro nu man tusawa. Nu man sãawɛwa sɔmu bakanu. Na maa wasira n ka nu sɔbe. 15Baa ì n bɛɛn kanaru dɛnyasiamɔ, na ku ra nu swaa daki. Ì n nɔma yiiya wɔllɔ i ka kanaru ko, na ra nɛn wuswaa sĩiyɛwa, na kun bɛɛ mɛɛra. Domi bɛɛn nɔma tɔmbun yɛm yiba be i go. 16Yen sɔ̃, i tii sãrasio i nuku kɔ̃suru deri, kpa i ku maa kɔ̃sa ko. 17I seewo i gea ko, kpa i n gem swĩi. I be ba dam dɔremɔ faaba koowo. I gobekuba wɛ̃ɛyɔ ye n sãa begia, kpa i ka gɔminibu yina. 18- 19I na su wesiana kpa su nɔɔsina. Ì n wura i man mɛm nɔɔwa, baa bɛɛn gɔ̃ru gà n tĩri nge weke biru, kon gu dɛɛrasia gu burura nge wɛ̃su. Baa gà n maa sɔ̃rin na nge wɛ̃ɛ wunɔmgii, ga koo burura nge wɛ̃ɛ kpiki, kpa i tem mɛn dĩa geenu di. 20Adama ì n yina, ma i man seesi, ba koo bɛɛ gowa tabu sɔɔ ka takobi. Nɛ, Yinni Gusunɔwa na yeni gerua. 21Gusunɔ u nɛɛ, Yerusalɛmu, wunɛ wi na raa naanɛ sãa, wee a kua nge kurɔ sakara kowo, wi u win durɔ deri. Domi yellu gemgiba raa yiba wunɛ sɔɔ. Adama gisɔ, tɔn gowobu tɔnawa ba nun wãasi. 22A raa sãa nge sii geesu. Wee a kua nge sii bisu. A raa sãawa nge tam gem. Adama tɛ̃, a kua nge tam mɛ ba nim doke. 23Wunɛn wirugiba man seesi, ma ba ka gbɛnɔbu nɔɔ tia sãa. Be kpurowa ba ra n kɛ̃nu yĩiyɔ, kpa ba n nɔm biran kɛ̃nu naa gire. Ba ku ra gobekuba wɛ̃ ye n sãa begia, ba ku ra maa ka gɔminibu yinɛ. 24Yen sɔ̃, i swaa dakio i nɔ ye nɛ Gusunɔ, wɔllu ka tem Yinni na gerumɔ, nɛ wi na sãa bɛɛ Isireliban dam. Na nɛɛ, kon bɛɛ nɛn yibɛrɛba mɔru kɔsie kpa nɛn mɔru yu wa yu sure. 25Kon bɛɛ nɔma doke kpa n bɛɛ wɔ̃ nge sisu n bɛɛn disinu kpuro wuna kpa i dɛɛra. 26Kon bɛɛ kua nge yellu. Siri kowobu ba ǹ maa nɔm biran kɛ̃nu mwaamɔ. Mɛya ba ǹ maa bwisi kɛ̃ɔbun nɔsu gum tɛɛnimɔ. Saa yera ba koo nɛɛ, gemgibu ka naanɛgibun wuuwa mini. 27Kon Yerusalɛmu yakia yà n nɛn kĩru swĩi, kpa n maa yen tɔmbu wɔra be ba gɔ̃ru gɔsia mi kpuro. 28Be ba man seesi, kon bu kam koosia. Be ba durum mɔ̀, kpa n bu go. Be ba maa man biru kisi, kpa n bu kpeerasia. 29Saa ye sɔɔ, dãa bakanu ka dãa sɔ̃ɔ si su sãa bɛɛn bũu yenu, su koo de i sekuru wa. 30I ko kowa nge dãa baka ni, sanam mɛ nin wurusu dɛllamɔ, ǹ kun mɛ nge dãa sɔ̃ɔ si, sanam mɛ su ǹ maa nim waamɔ. 31Wi u tamaa u dam mɔ u koo ko nge yakasu, kpa win kookoosu su n sãa nge dɔ̃ɔ buri, kpa u dɔ̃ɔ mwaara ka win kookoo si sannu. Goo sari wi u koo kpĩ u bu faaba ko.

will be added

X\