Osee 9

1Bɛɛ Isireliba, i ku tɔ̃ɔ bakaru ko gɛ̃ɛbun saa sɔɔ nge bwese ni nu tie. Domi i Yinni Gusunɔ biru kisi. Ma i da i bũnu gasirimɔ i nu siaramɔ mi ba alikama soomɔ kpuro. 2Adama alikama ye ba soomɔ ka gum mɛ ba gamamɔ, yen gaa kun ko n sãa bɛɛgia. Mɛya i ǹ tam kpam wasi i wuna. 3Isireliba ba ǹ sinamɔ tem mɛ Yinni Gusunɔ u bu wɛ̃ sɔɔ. Ba koo wurama Egibitiɔ ǹ kun mɛ Asiriɔ. Kpa bu dĩa sesenuginu di mi. 4Saa ye sɔɔ, ba ǹ maa kpɛ̃ bu yãkuru ko ka tam. Baa bà n tu kua, ta ǹ Gusunɔ wɛ̃remɔ. Ben yãku dĩanu nu ko n sãawa nge gɔɔ dĩanu. Wi u nu di, u koo disi duurawa. Dĩa ni, nu koo win gɔ̃ɔru kpeesia. Adama ba ǹ ka ye duɔ Yinni Gusunɔn sãa yerɔ. 5Mba i ko ko Yinni Gusunɔn tɔ̃ɔ bakanu sɔɔ. 6Ì n bɛɛn yɛnusu deri bansu, Egibitigiba koo bɛɛ dam koosia ben mi. Adama yen wuu ge ba mɔ̀ Mɛnfisi ga ko n sãawa nge bɛɛn sikiru. Awĩi yi koo bɛɛn arumani di. Kpa sãki yi kpi bɛɛn kunɔ. 7Saa ya tura yè sɔɔ Yinni Gusunɔ u koo siri. Saa ya tunuma yè sɔɔ u koo baawure kɔsia ye u kua. Bɛɛ Isireliba i ko ye wa. Wee bɛɛn toranu ka bɛɛn tusirun kpãarun sɔ̃, i ra n tamaa Gusunɔn sɔmɔ u wiirawa. Wi, wi Yinni Gusunɔ u ka gari kua u tam nɔrawa. N deema bɛɛ, i torewa n kpã, ma i nùn tusa. 8Adama sɔmɔ wi u bɛɛ kirɔ mɔ̀, u wãa ka Gusunɔ. Ka mɛ, i nùn yina bɛriammɛ mi u dɔɔ kpuro. I ra mam nùn seesiwa Gusunɔ win Yinnin sãa yerɔ. 9Wee i da i kɔ̃sa kua nge mɛ i raa kua Gibeaɔ. Yinni Gusunɔ kun bɛɛn toranu duari. U koo bɛɛ sɛɛyasia nin sɔ̃. 10Yinni Gusunɔ u nɛɛ, sanam mɛ na gbia na Isireliba wa, nɛn nɔni sɔɔ, ba sãawa nge resɛm marum mɛ ba wa mi gãanu ku ra kpi. Ma na maa ben baababa wa nge figie marum gbiikum. Adama ye ba tunuma Baali Peoriɔ, miya ba tii bũu wi ba mɔ̀ Baali wɛ̃. Ma na bu tusa nge bũu wi. 11Tɛ̃ Isireliban bɛɛrɛ ya koo doona nge gunɔ mɔrin wuuru. Ben kurɔbu ba ǹ maa guri suamɔ bu sere ma. 12Bà n maa bibu seeya, kon de bu gbiwa bu sere bukura. Ba koo wahala baka wa nà n bu biru kisi. 13Nge mɛ na Isireliba waasinamɔ, ba sãawa nge dãa ni ba duura tem gem sɔɔ. Adama ba koo ben bibu yibɛrɛba nɔmu bɛria be ba koo bu go. 14Osee u nɛɛ, Yinni Gusunɔ, bà n koo Isireliba sɛɛyasia, sɛɛyasia birà ba koo gɔsi. A de ben kurɔbu bu nukuru yari, kpa ben bwãsu su gbera. 15Yinni Gusunɔ u nɛɛ, geema ben nuku kɔ̃suru kpuro ta sɔ̃ɔsira Giligaliɔ. Miya na bu wa ma na bu tusa. Kon bu gira nɛn wuswaan di ye ba kuan sɔ̃. Na ǹ maa bu kĩ. Domi ben sinambu kpurowa ba man seesimɔ. 16Na be, Isireliba sɛɛyasia. Ba sãa nge dãa te ta gbera nuurun di kpuro. Ta ǹ maa binu marumɔ. Baa bà n maa bibu mara, kon de bii be ba kĩ mi, bu gbiwa. 17Osee u nɛɛ, Gusunɔ nɛn Yinni u bu yina yèn sɔ̃ ba ǹ win gari swaa daki. Ba koo kowa yaayaare kowobu bwesenun suunu sɔɔ.

will be added

X\