Osee 8

1Yinni Gusunɔ u nɛɛ, i kɔba soowo. Wee yibɛrɛba ba nɛn sãa yeru wuusima nge kasi. Domi Isireliba ba nɛn arukawani kusia. Ma ba nɛn sɔ̃ɔsiru yina. 2Ba koo man nɔɔgiru suema bu nɛɛ, ba nɛ ben Yinni yɛ̃. 3Adama ba gea deri, ma yibɛrɛba ba koo bu naa swĩi. 4Ba tii sinambu kua ba ǹ man saawara kue. Ma ba bũnu seka ka sii geesu ka wura. Yen sɔ̃na ba koo kam ko. 5Bɛɛ Samarigibu, na bɛɛn naa wuragia ye tusa. Na maa ka bɛɛ mɔru mɔ̀. Saa yerà i ko i sina ba ku n bɛɛ taarɛ wɛ̃. 6Wi u bwãarokunun sɔmburu yɛ̃ Isireliba sɔɔ wiya u naa wuragia ye kua. Ya ǹ sãa Gusunɔ. Yen sɔ̃na ba koo ye kɔsuku muku muku. 7Wee i woo duura, yen sɔ̃na i ko i woo bɔkɔ gɛ̃. Mɔndu gara nɛɛ, dobi bɛm sari ku ra n som mɔ. I n maa yɛ̃ ma bɛɛn gbean dĩanu nù n daa gea kua, sɔba ba koo nu gura. 8Isireliba ba dera ba bu mwɛ. Be wee bwesenu sɔɔ nge weke te goo kun maa kĩ. 9Domi ba da Asiriɔ nge gbeeku kɛtɛku ge ga tii kpare. Ba da ba somiru kasu mi. 10Ba bwese tukunu gobi kɔsia ba n ka nɔɔ tia sãa. Adama ka mɛ, kon bu mɛnna, kpa Asirin sina boko u bu yoo sɔma koosia. 11Isireliba ba bũu turanu kua nu dabi. Niya nu dera ba durum mɔ̀. 12Baa nà n bu nɛn woodaba yorua sere ka yen gari piiminɔ, ba ra ye garisiwa nge ye ya wee tɔn tukon min di. 13Ba ra yɛɛ go bu ka man yãkuru kua, kpa bu yin yaa tem. Adama ben yãku ni, nu ǹ man doremɔ. Na ǹ ben toranu duari. Kon bu sɛɛyasia. Yen sɔ̃na ba koo gɔsira bu da Egibitiɔ. 14Isireliba ba tii sina kpaaru bania. Ma ba nɛ ben taka kowo duari. Yudaba ba maa ben wuu dabinu gbãraru toosi. Adama kon ben wusu dɔ̃ɔ sɔkiri kpa u ben dii geenu di.

will be added

X\