1 kpa n bu bɛkia, saa yera ben durum maa sɔ̃ɔsira Samariɔ. Gbɛnɔbu ba dumɔ diaɔ ba gbɛnimɔ. Ma ben gaba yiba swɛɛ sɔɔ. 2 Adama ben goo sari wi u ra tii sɔ̃ u nɛɛ, na yaaye kɔ̃sa ye ba mɔ̀. Tɛ̃, wee ba mwaara ben kom kɔ̃sum mɛ sɔɔ. Na ye kpuro waamɔ. 3 Ben nuku kɔ̃su kookoosu ka ben weesu su sina boko ka ben wirugibu nuku dobu wɛ̃ɛmɔ. 4 Be kpuro ba sãawa sakara kowobu ba sum nge pɛ̃ɛ wɔ̃ɔ yeru te pɛ̃ɛ kowo u dɔ̃ɔ doke u deri. Ma u da u win pɛ̃ɛ som bura u yi sere mu ka se. 5 Bà n ben sina bokon tɔ̃ɔ bakaru mɔ̀, ben sina asakpɔbu ka sunɔn tii ba ra tam nɔwa kpa ba n tɔmbu yaa kasikimɔ. 6 Be ba ra nɔɔ tia ko bu ka tɔmbu seesi, ba sãa nge pɛ̃ɛ wɔ̃ɔ yeru. Wɔ̃kuru, ben wɔrugɔru ta ra yɛmiɛwa kpa yam sãre bururu tu se nge ba gãanu dɔ̃ɔ doke. 7 Be kpuro ba sumwa nge dɔ̃ɔ. Ba ra ben kparobu gowa kpa ben sinambu ba n wɔrukumɔ tia tia. Adama ben goo ku ra maa man somiru kanɛ. 8 Yinni Gusunɔ u maa nɛɛ, Isireliba ba ka bwese tukunu mɛnna. Ma ba kua nge kira te ba ǹ gɔsie. 9 Bwese tuku ni, nu bu dam mwaarimɔ. Adama ba ǹ yɛ̃ mɛ. Tɔkɔra bu deemamɔwa, adama ba ǹ tuba. 10 Ben tii suabu sɔ̃ɔsiramɔ. Domi ba ǹ gɔsiramɛ nɛ Gusunɔ ben Yinnin mi. Ka yen de kpuro, ba ǹ man kasu. 11 Ba sãawa nge totobɛrɛ te ta ǹ bwisi mɔ. Ba Egibitigibu somiru kanamɔ, ma ba daamɔ Asiriɔ. 12 Adama bà n swaa wɔri na ra bu taa bɛriewa n bu mwɛɛri nge gunɔsu. Kpa n bu sɛɛyasia nge mɛ ba bu nɔɔsia. 13 Ba kam kuawa mi, domi ba man duka suurimɔ. Ba man seesi, ba man weesu kua. N deema nɛna kon daa bu faaba ko. 14 Bà n man somiru kanamɔ, ba ku ra tu ko gɔ̃ruɔ. Adama ba ra sinɛwa ba n tii muririmɔ. Kpa ba n yĩiyɔ yeya ya koo de ben gbea yu alikama ka resɛm gea ma. Nge mɛya ba ra n mɔ̀ bu ka man seesi. 15 N deema nɛna na bu nɔni doke na bu dam wɛ̃. Adama ka mɛ, ba man kɔ̃sa bwisikusimɔ. 16 Ba gɔsira goon mi gia. Ba sãa nge tɛn te ta ǹ gea sãa. Yen sɔ̃, ba koo ben wirugibu go tabu sɔɔ ben gari kam gerubun sɔ̃. Yera ya koo de bu bu yɛ̃ɛ Egibitiɔ.
