Osee 5

1Yinni Gusunɔ u nɛɛ, bɛɛ yãku kowobu, i yeniba swaa dakio. Bɛɛ Isireliba, i swaa dakio i nɔ. Bɛɛ sina kpaarugibu, i swaa tem kpĩiyɔ i nɔ. Bɛɛya siri bini bu ka yã. Domi i kua tɔmbun yina Misipaɔ, ma i kua ben taa Taboriɔ. 2Ma ba man biru kisi ba numa durum sɔɔ. Yen sɔ̃, kon bɛɛ kpuro sɛɛyasia. 3Na Isireliba yɛ̃wa sãa sãa. Ben goo kun man berue. Wee ba da ba bũnu gasira ba tii disi doke. 4Osee u nɛɛ, ba ǹ kpɛ̃ bu maa wurama ben Yinnin mi ben kookoosun sɔ̃. Domi bũu sãarun gasiribu gina wãa ben gɔ̃ru sɔɔ. Mɛya ba ǹ maa wi, Yinni Gusunɔ yɛ̃. 5Isireliban tii suabu bu sɔ̃ɔsimɔ mɛ ba sãa. Ba koo wɔruma ben durum sɔ̃. Yudaban tii ba koo wɔruma ka be sannu. 6Sanam gam sisi mɛ̀ sɔɔ ba koo bikiaru da Yinni Gusunɔn mi, kpa bu ka nùn yãanu ka kɛtɛba yãkuru kua. Adama ba ǹ nùn wasi, domi u bu deri. 7Beya ba nùn tɔnu kandu kua. Domi ba da ba bii seegeba mara be ba ǹ nùn yɛ̃. Tɛ̃, n ǹ tɛɛmɔ u ka bu kam koosia be ka ben arumani. 8Yinni Gusunɔ u nɛɛ, i tabun kɔba soowo Gibeaɔ ka Ramaɔ. I tabun wurenu koowo Betɛli Afɛniɔ. Bɛɛ Bɛnyamɛɛba, tabu durɔba wee bɛɛn birun di. 9Gari geeya na Isireliba sɔ̃ɔmɔ. Dɔma te kon bu sɛɛyasia, ba koo kam kowa. 10Wee Yudaban wirugibu ba sãawa nge be ba ra tem gbɛni bu ka ben tiin tem sosi. Yen sɔ̃, kon bu nɛn mɔru wisi nge nim tora. 11Siribu bu Isireliba di, ma ba bu dam dɔremɔ yèn sɔ̃ ba kam naa gire. 12Na kon bu di nge gɛmi. Kpa na n Yudaba wahala mɔ̀ nge bara te ta kukunu temmɔ. 13Mɛya Isireliba ba tii bararu waasi. Ma Yudaba ba ben bosu wa. Ma Isireliba ba gɔra Asiriɔ bu ka sina boko Yarɛbu somiru kana. Adama u ǹ kpɛ̃ u bu bɛkia u sere nɛɛ, u koo ben bosu kpeesia. 14Na ko n sãawa nge gbee sunɔ Isireliba ka Yudaban sɔ̃. Kon bu wɔri n yaaku kpa n bu sua n ka doona. Goo sari wi u koo bu wɔra saa nɛn nɔman di. 15Yinni Gusunɔ u nɛɛ, ǹ n mɛn na, kon bu biru kisi kpa n wura nɛn wãa yerɔ sere bu ka tubu ma ba tora. Ben nɔni swãaru ta koo de bu man kasu kpa bu man somiru kana.

will be added

X\