Osee 4

1Bɛɛ Isireliba, i nɛ, Yinni Gusunɔ swaa dakio. Domi na siribu mɔ ka bɛɛ tem mɛn tɔmbu yèn sɔ̃ wɔnwɔndugii goo sari bɛɛ sɔɔ, gemgii goo maa sari. Mɛya bɛɛn goo kun maa man yɛ̃. 2I nɔɔ mwɛɛnu mɔ̀ ka bɔ̃ri, adama weesa i mɔ̀. Mɛya i maa tɔmbu goomɔ, i gbɛnimɔ, i sakararu mɔ̀. I dam dɔrenamɔ, ma tɔn gobera sosimɔ ta dɔɔ. 3Yen sɔ̃na nɛ, Yinni Gusunɔ, kon de tem mɛ, mu gbera. Bɛɛ be i wãa mi kpuro, i ko woorawa saa gbeeku yɛɛn di n ka da gunɔsɔ ka wɛɛyɔ, ye kpurowa ya koo kam ko. 4Yinni Gusunɔ u nɛɛ, goo u ku raa ka tii yina ǹ kun mɛ u goo gerusi. Domi wunɛ yãku kowo tɔnwerowa na ka sannamɔ. 5Sɔ̃ɔ teeru kaa wɔrumawa sɔ̃ɔ sɔɔ gbãara kpa wunɛn beruse nɛn sɔmɔ u maa wɔruma wɔ̃kuru. Kon maa Isirelin bweseru go te ta sãa nge wunɛn mɛro. 6Wee nɛn tɔmba gbimɔ yèn sɔ̃ ba ǹ man yɛ̃. Adama wunɛn tii, a yina a man wura. Yen sɔ̃, kon nun yina kpa a kun maa sãa nɛn yãku kowo tɔnwero. Nge mɛ a nɛ, Yinni Gusunɔn woodaba duari, nge mɛya kon maa wunɛn bibu duari. 7Nge mɛ ba dabiamɔ, nge mɛya ba man torarimɔ ba dɔɔ. Kon ben bɛɛrɛ kpeesia kpa bu sekuru wa. 8Wee ba kuuramɔ nɛn tɔmbun toranun sɔ̃. Ma ba bu bɔriemɔ ba n ka toramɔ ba n dɔɔ. 9Yen sɔ̃, sɛɛyasia tee biya kon nɛn tɔmbu ka ben yãku kowobu ko. Kon bu sɛɛyasiawa nge mɛ ben daa ya nɛ. Kon bu kɔsiawa nge mɛ ben kookoosu nɛ. 10Ba koo di, adama ba ǹ debumɔ. Ba koo sakararu ko bũu nuurɔ bu ka bibu wan sɔ̃. Adama ba ǹ marumɔ yèn sɔ̃ ba nɛ, Yinni Gusunɔ biru kisi ba ǹ nɛn woodaba swĩi. 11Yinni Gusunɔ u nɛɛ, sakararu ka tama mu nɛn tɔmbun wiru gɔsia. 12Dãa kukun miya ba ra bikiaru de gu ka bu gari sɔ̃. Bũu gasiribu dera ba kɔ̃ɔra ma ba ka man tonda. 13Ba ra de ba n yãkunu mɔ̀ guunu wɔllɔ, kpa ba n turare dɔ̃ɔ dokemɔ gungunu wɔllɔ ka dãa baka bwese bwesekan nuurɔ nìn saara bu wɛ̃re. Yen sɔ̃na ben bii wɔndiaba ba sekuru sariru mɔ̀. Ma ben biigii kurɔbu ba sakararu mɔ̀. 14Na ǹ ben bii wɔndia be, ka ben biigii kurɔ be sɛɛyasiamɔ ben sekuru sari te, ka ben sakara te ba mɔ̀n sɔ̃. Domi ben mɔwɔbun tii ba sakararu mɔ̀ ka kurɔ be ba wãa bũu sãarun sɔ̃. Ma ba maa yãkunu mɔ̀ sannu ka be. Adama ba n yɛ̃ nge mɛ mɔndu gara gerua ta nɛɛ, tɔn be ba ǹ laakari mɔ, ba kam kobu dɔɔwa. 15Isireliba ba bũnu gasirimɔ, adama Yudaba bu ku raa bu swĩi. Bu ku da Giligaliɔ ǹ kun mɛ Betɛli Afɛniɔ bu ka yãkunu ko kpa ba n bɔ̃rumɔ ba n mɔ̀, sere ka Yinni Gusunɔn wãaru. 16Isireliba ba sãawa nge naa gbiiba ye ba kpana bu kpara. Adama tɛ̃, Yinni Gusunɔ u koo bu yɔ̃su batuma sɔɔ nge yãanu. 17Isireliba ba bũnu sãamɔ. A bu derio mi. 18Bà n tam nɔra ba kpa, ba ra n yande dɔɔwa bu sakararu ko. Wee ben wirugibu ba ra n kĩwa ba n wãa sekuru sari kom sɔɔ. 19Sɔ̃ɔ teeru woo ga koo na gu bu sua gu ka doona kpa bu sekuru wa ben yãku nin sɔ̃.

will be added

X\