Osee 14

1Na kon de bu Samari sɛɛyasia yèn sɔ̃ yen tɔmbu ba nɛ Gusunɔ ben Yinni seesi. Ba koo bu gowa tabu sɔɔ kpa bu ben bii piiminu nam. Kpa bu ben kurɔ be ba guri mɔn nukunu bɛsuku. 2Osee u Isireliba sɔ̃ɔwa u nɛɛ, bu wurama Gusunɔ ben Yinnin mi, domi ba wɔruma ben toranun sɔ̃. 3Bu wurama win mi bu kana teni ko te ta nɛɛ, Yinni Gusunɔ, a sun bɛsɛn toranu kpuro suuru kuo. Kpa a sun mɛɛri ka nɔnu geu. Ye sa ko ka nun yãkuru kua, sa ko nun siara. 4Asirigii wi, u ǹ kpɛ̃ u sun faaba ko. Sa maa yɛ̃ ma dumi kun sun faaba mɔ̀ tabu sɔɔ. Sa ǹ maa bwãaroku ni sa tii kua sokumɔ bɛsɛn yinnibu pai. Domi wuna a ra gobekuba wɔnwɔndu kue. 5Yinni Gusunɔ u nɛɛ, kon de nɛn tɔmbu bu ka den nɛ turo yɔ̃ra kpa n bu kĩa too. Na ǹ maa ka bu mɔru mɔ̀. 6Ko na n sãawa nge kakoru be, Isireliban sɔ̃. Ba ko n wãwa nge dãa wɛ̃su, kpa bu nuuru gira nge dãa ni nu wãa Libaniɔ. 7Ben kãasi yi koo tɛriawa kpa yi n wã nge dãa te ba mɔ̀ olifi, kpa yi n nuburu do nge dãa ni nu wãa Libaniɔ. 8Ba koo gɔsirama bu sina nɛn kɔkɔrɔ kpa bu maa alikama duure. Ba koo kparawa nge resɛm dãa kpa bu yĩsiru yari nge Libanin tam. 9Saa ye, Isireliba ba ǹ maa bũnu sãamɔ. Domi kon ben kanaru nɔ, kpa n bu nɔni doke. Na kon sãawa nge dãa ye ya ku ra gbere ben sɔ̃. Nɛn min diya ba koo domaru wa. 10Wi u laakari mɔ, u de u n tii sɛ gari yinin sɔ̃. Wi u maa bwisi mɔ, u de yi nùn yeeri. Domi Yinni Gusunɔn swɛɛ yi sãawa dee dee. Gemgiba ba koo sĩ yi sɔɔ. Adama be ba nùn seesimɔ, ba koo wɔruma yi sɔɔ.

will be added

X\