Osee 12

1Isireliba ba ra n man weesu kuammɛwa, kpa ba n man nɔni wɔ̃kumɔ. Adama Yudaba ba ka nɛ, Yinni Gusunɔ Dɛɛro sĩimɔ dee dee. 2Isireliba ba Egibitigibu gum wɛ̃ɛmɔ. Ma ba ka Asirigibu arukawani bɔkumɔ. Nge mɛya ba ka kpaasibu kasu be ba ǹ sãa gãanu. N sãare ba woo naa gire. Ba ben weesu dabiasiamɔ tɔ̃ɔ baatere. Ma ba daa bɔɔbɔya mɔ̀ ba dɔɔ. 3Nɛ, Yinni Gusunɔ na Yudaba siribu sokumɔ. Kon be Yakɔbun bweseru wɔrima ben daa kɔ̃san sɔ̃. Kpa n bu ben kɔ̃san are kɔsia. 4Ben baaba Yakɔbu u win mɔɔn naa tokuru nɛnua saa win mɛron nukurun di. Ye ba nùn mara u kpɛ̃a, ma u ka nɛ Gusunɔ wɔri kua ka win dam kpuro. 5U ka nɛn gɔrado wɔri kua, ma u kamia. U swĩ, ma u gɔrado wi kana u nùn domaru kua. Betɛli miya u ka nɛ Gusunɔ yinna. Ma na ka nùn gari kua. 6Nɛna Gusunɔ wɔllu ka tem Yinni. Nɛn yĩsira Wi u ra n wãa. 7Bɛɛ Isireliba, i de i wurama nɛ bɛɛn Yinnin mi. I de i gea ko kpa i n man naanɛ sãa baadomma. 8Bɛɛ Isireliba i sãawa nge tenku be ba kilo weesugia nɛni. Ba ra gbɛna kã. 9Kpa i nɛɛ, ka gem i gobi wa, i dukia baka gura. Kɔ̃sa gaa sari ye sɔɔ. Bɛɛn sɔmburun areya. 10Adama nɛ, Gusunɔ na sãawa bɛɛn Yinni saa mìn di i wãa Egibitiɔ. Kon maa de i wura i n wãa kuu bekuruginu sɔɔ nge sanam mɛ na bɛɛ yarama Egibitin di i wãa gbaburɔ. 11Nɛn sɔmɔba na ka gari kua kãsinu sɔɔ, kpa be, bu maa ka bɛɛ gari ko. Beya ba maa bɛɛ nɛn himba sɔ̃ɔsi ya ka gisɔ girari. 12Ka mɛ, Galadigibu ba kua tɔn kɔ̃sobu. Ma ba koo kam ko. Ba ra kɛtɛ kinɛ dabinu go Giligaliɔ. Adama ben yãku yenu nu koo ko kpee subenu gbaanun kpĩi sɔɔ. 13Yakɔbu u kpikiru da Aramuɔ. Miya u sɔmburu kua u yãanu kpara u ka kurɔ wa. 14Adama sɔmɔ goowa Yinni Gusunɔ u gɔra u da u win bweseru Isireliba yarama Egibitin di. Sɔmɔ wiya u bu kpara. 15Adama yeniba kpuro sɔɔ, Isireliba ba Yinni Gusunɔ nuki sanka too too. Yen sɔ̃, u koo de yɛm mɛ ba yari mi, mu wɔri ben wiru wɔllɔ. U koo de bu yen sekuru wa.

will be added

X\