1 Yinni Gusunɔ u nɛɛ, saa Isirelin bweserun torubun diya na tu kĩa. Ma na tu yarama Egibitin di na tu soka nɛn bii. 2 Adama nge mɛ na bu sokumɔ nge mɛya ba ka man tondamɔ. Ba da ba bũu ni ba mɔ̀ Baali sãamɔ. Ma ba nu turare dɔ̃ɔ dokeammɛ. 3 N deema nɛna na bu kpare, na ben nɔma nɛni. Adama ba ǹ tuba ma nɛna na bu nɔɔrimɔ. 4 Na bu gawama nɛn mi ka kĩru ma na bu dĩanu wɛ̃ nge wi u yaa sabenun sugu yiiyamɔ u ka nu nɔɔri. 5 Adama ba yina bu na nɛn mi. Yen sɔ̃na na nɛɛ, ba koo da Egibitiɔ kpa Asirigii u ko ben sunɔ. 6 Ba koo ben wusu tabu wɔri, kpa bu ben damgibu kɔsuku yèn sɔ̃ ba ben tiin kpunaa swĩi. 7 Wee nɛn tɔmbu ba yɔ̃rari bu ka man tonda. Ba bu soka bu gɔ̃ru gɔsia bu wurama nɛ, Wɔrukoon mi. Adama ben goo kun wure. 8 Ka mɛ, bɛɛ Isireliba, na ǹ kpɛ̃ n bɛɛ deri, n bɛɛ tɔnu kandu kua. Na ǹ kpɛ̃ n bɛɛ kam koosia nge mɛ na wuu si ba mɔ̀ Adima ka Seboimu kua. Wee nɛn gɔ̃ru ga sankire, nɛn bwɛ̃ra kun kpunɛ. 9 Na ǹ maa bɛɛ kpeerasiamɔ ka nɛn mɔru baka ye. Na ǹ maa wee n bɛɛ kam koosia. Domi na sãawa Gusunɔ n ǹ mɔ tɔnu. Na sãawa Dɛɛro bɛɛn suunu sɔɔ. Na ǹ bɛɛ wɔrim wee ka mɔru. 10 Bɛɛ nɛn bibu, i ko nɛ, Yinni Gusunɔ swĩi nà n kukura nge gbee sunɔ kpa i duki na saa sɔ̃ɔ duu yerun di. 11 I ko duki na saa Egibitin di nge gunɔ mɔri kpa i na saa Asirin di nge totobɛrɛnu, kpa n de i sina bɛɛn yɛnusɔ. Nɛ, Yinni Gusunɔwa na yeni gerua.
