Osee 10

1Isirelin bweseru ta raa sãawa nge resɛm gea ye ya ra ma too. Adama nge mɛ ba dabiamɔ, nge mɛya ba bũu yenu dabiasiamɔ. Nge mɛ ben tem mu kuuramɔ, nge mɛya ba bũu yenu sɔmmɔ ka kpee geenu. 2Tɔn be, ba sãawa gɔ̃rusu yirugibu. Ba koo yen are sɔbe. Yinni Gusunɔ u koo ben bũu yee ni ka nin kpee geenu kɔsuku. 3Ba koo tɛ̃ nɛɛ, yèn sɔ̃ sa ǹ Gusunɔ nasie, yen sɔ̃na sa ǹ sina boko mɔ. Adama tɛ̃n wãa te sa wãa mini, mba sina boko koo maa kpĩ u sun wunana. 4Wee ba gari kam gerumɔ, ma ba arukawani bɔkumɔ ka bɔ̃ri weesugii. Yen sɔ̃, siribu dabiamɔ nge yaka kɔ̃susu si su ra kpi gbee te ba wuka sɔɔ. 5Kpa Samarigii be ba naa buu wuraguu sãamɔ ge ge wãa Betɛli Afɛniɔ bu nanda kpa bu gɔɔ sina gen sɔ̃. Gen yãku kowobu ba koo diiri bà n wa gen bɛɛrɛ ya kpa. 6Domi ba koo ka gu da Asiriɔ bu gu ben sina boko wɛ̃. Isireliba ba koo sekuru wa. Ba koo nà n daa yɛ̃ ko ye ba ka bũu kua ben suunu sɔɔ. 7Ǹ n Samarin sɔ̃n na, ye kpuro ya kpawa mi. Domi ba koo ka yen sina boko doona nge dɛka ye nim mu ka doonɔ. 8Ba koo ben bũu yenu kpuro kɔsuku mi ba tora. Kpa yakasu ka sãki yi kpi mi. Saa gaa sisi yè sɔɔ ba koo guunu ka gungunu sɔ̃ bu nɛɛ, i sun sɛ̃sikio i wukiri. 9Yinni Gusunɔ u nɛɛ, saa dɔma tèn di Isireliba ba durum kua Gibeaɔ, ba toramɔ ba dɔɔwa. N ǹ weenɛ tabu bu tɔn kɔ̃so be wɔri mi? 10Nɛ, Yinni Gusunɔ kon bu sɛɛyasia nge mɛ na kĩ, kpa bwesenu nu nɔɔ tia ko nu bu wɔri ben tora bakanun sɔ̃. 11Isireliba ba sãawa nge naa kpɛmi yi yi ra dobi taaku. Adama kon sugu doke ben wĩi bura ni sɔɔ. Kon de Yudaba bu kɔrɔ ko, kpa be, Yakɔbun bweseru bu tem kusanu kɔsuku. 12Yen sɔ̃ tɛ̃, bɛɛ Isireliba i gbee kpaaru koowo i gem duure. Kpa i durom gɛ̃. Domi saa ya tura i ka gɔsirama nɛ, Yinni Gusunɔn mi, kpa n bɛɛ susi n bɛɛ gea kua. 13Adama bɛɛ, i kɔ̃sa duura ma i kɔ̃sa gã. Ma i bɛɛn weesun are di. I bɛɛn naanɛ doke bɛɛn tiin dam ka tabu kowo dabi dabiru sɔɔ. 14Yen sɔ̃na tabun wurenu koo nɔɔra bɛɛn suunu sɔɔ. Kpa bu bɛɛn gbãranu kpuro kɔsuku nge mɛ Saluman sina boko u Bɛti Aribɛli wɔri, ma u bii mɛrobu ka ben bibu munka. 15Bɛɛ Betɛligibu, wee ye kon bɛɛ kua bɛɛn nuku kɔ̃surun sɔ̃. Bururu yam sãreru yande, tabu sɔɔra ba koo bɛɛn sina boko go.

will be added

X\