Osee 1

1Sanam mɛ sinam beni Osiasi ka Yotamu ka Akasi ka Esekiasi ba bandu di di Yudan temɔ, ka saa ye Yeroboamu Yoasin bii u bandu dii Isirelin temɔ, sanam mɛya Yinni Gusunɔ u ka Osee Berin bii gari kua. 2Gari yi Yinni Gusunɔ u gbia u Osee sɔ̃ɔwa yi wee. U nɛɛ, Osee, a doo a kurɔ sua wi u ra sakararu ko. Bɛɛn bibu ba koo maa win yira swĩi. Domi Isireliba ba bũnu gasirimɔ ba sãamɔ nge kurɔ sakara wi u durɔbu gasirimɔ. Ma ba nɛ, Yinni Gusunɔ deri. 3Ma Osee u seewa u Gomɛɛ Dibilaimun bii sua kurɔ. Yera u ka nùn mɛnna. Ma kurɔ wi, u gura sua u nùn bii tɔn durɔ marua. 4Ma Yinni Gusunɔ u nɛɛ, i bii wi yĩsiru kɛ̃ɛyɔ Yisirɛɛli. Domi saa fiiko sɔɔ kon Yehun yɛnugibu wɔri yèn sɔ̃ ba tɔmbun yɛm yari Yisirɛɛliɔ, kpa n Isireliban bandu kpeerasia. 5Tɔ̃ɔ te sɔɔ, kon Isireliban tabu durɔbun tɛnnu bɔɔku Yisirɛɛlin wɔwaɔ. 6Yeniban biru, Gomɛɛ u maa gura sua ma u bii tɔn kurɔ mara. Ma Yinni Gusunɔ u Osee sɔ̃ɔwa u nɛɛ, a nùn yĩsiru kɛ̃ɛyɔ Lo Ruhama. Yen tubusiana bii wi ba yina. Domi na ǹ maa Isireliba wɔnwɔndu kuammɛ. Na ǹ bu suuru kuammɛ. 7Adama kon Yudaba wɔnwɔndu kua, kpa nɛn tii n bu faaba ko nɛ wi na sãa Gusunɔ ben Yinni. Adama n ǹ mɔ kon ka ben yibɛrɛba tabu ko. Na ǹ tɛndu dendimɔ ǹ kun mɛ takobi ǹ kun mɛ dumi ka yin maasɔbu. 8Yeniban biru, Gomɛɛ u bii wi bom kara. Ma u wure u gura sua u bii tɔn durɔ mara. 9Ma Yinni Gusunɔ u nɛɛ, a nùn yĩsiru kɛ̃ɛyɔ Lo Ami. Yen tubusiana n ǹ nɛn tɔmbu. Domi i ǹ maa sãa nɛn tɔmbu, na ǹ maa sãa bɛɛn Yinni.

will be added

X\