Habakuku 3

1Wee kana te Gusunɔn sɔmɔ Habakuku u kua ka weeweenu. 2U nɛɛ, Yinni Gusunɔ, na nua ye a gerua. Ma na nanda. A de yu koora wɔ̃ɔ sini sɔɔ. A de tɔmbu bu ye wa bɛsɛn waati yeni sɔɔ. Adama wunɛn mɔru ye sɔɔ, a yaayo a sun wɔnwɔndu kua. 3Gusunɔ, a na saa Edɔmun di. Wunɛ, Dɛɛro, a na Paranin guurun di. Wunɛn yiiko ya wɔllu yam bururasie. Ma tem kpuro mu nun siaramɔ. 4A na, ma yam mu burura. Sɔ̃ɔ yãna yara wunɛn nɔman di, mi wunɛn dam mu wãa. 5A dera baranu nu pusimɔ. A nu derimɔ mi a sara kpuro. 6À n yɔ̃ra, tem mu ra yĩiriwa. À n bwesenu mɛɛra, nu ra diiriwa. Guu ni nu wãa saa yee yellun di, nu wɔruka, gunguu ni nu wãa saa tɛɛbun di, nu kɔsikira, domi niya nu raa sãa wunɛn swaa ye a ra sĩ. 7Na Kusanigibun weeweenu nɔɔmɔ. Na maa wa ma Madianiba ba bɛrum soore. 8Yinni Gusunɔ, a ka daanu mɔru mɔ̀wa? Nge nim wɔ̃kuwa a ka mɔru mɔ̀. Wee a yɔɔwa guru winu wɔllɔ nge wi u yɔɔwa tabu kɛkɛn wɔllɔ, ma ya nùn nasara wɛ̃. 9A wunɛn tɛndu bɛri. Wunɛn bɔ̃ri yi sãawa nge sɛ̃ɛnu. A tem bɛra ma daanu koka min di. 10Guunu nù n nun wa, nu ra diiriwa. Gura ya nɛmɔ ka dam, ma nim wɔ̃kun nim mu wɔki, mu nim kurenu kɔ̃ɔmɔ sere wɔllɔ. 11Sɔ̃ɔ ka suru ba yɔ̃ra ye ba wunɛn guru maakinu wa nu ballimɔ nge yaasa, ma nu dɔɔ nge sɛ̃ɛnu. 12Wee a tem bukianamɔ, a bwesenu kɔsukumɔ ka mɔru baka. 13Wee a yara a wunɛn tɔmbu ka wunɛn sunɔ wi a gɔsa somiru na. A tɔn kɔ̃sobun sunɔ go. A win bwãabu kpeerasia mam mam. 14A yibɛrɛban sinambun winu yabura ka ben tiin sɛ̃ɛnu. Ba raa sun wɔrim wee ka sɛndaru nge woo bɔkɔ, bu ka sun yarinasia. Ba nuku dobun kuuki mɔ̀. Ba sɔɔru sãa bu ka sun go bɛsɛn kuku yenɔ. 15Yinni Gusunɔ, a sɔ̃ wunɛn dumin wɔllɔ, a nim wɔ̃ku taakumɔ ge ga nim kɔ̃ɔmɔ ga wɔki. 16Na gen wɔkinu nɔɔmɔ too. Ma na nanda gem gem, nɛn nɔɔ ga diirimɔ bɛrum sɔ̃. Ma nɛn wasi yi wɔkɔnu wɔrimɔ, na yɔ̃ sɛ̃ɛ na nuku sankiranun tɔ̃ru mara te ta wee bwese ni nu koo sun dam dɔren sɔ̃. 17Figien dãnu nu ǹ ko n binu mɔ. Resɛm dãnu nu ǹ maa marumɔ. Olifin dãnu nu ǹ maa binu marumɔ. Gbea kun maa dĩanu wɛ̃ɛmɔ. Yãanu ka kɛtɛ kun ko n maa wãa gɔ̃ɔwɔ. 18Adama nɛ, nɛn nuku dobu weewa wunɛ Yinni Gusunɔn min di. Na nuku dobu mɔ yèn sɔ̃ a ra man faaba ko. 19Wuna a sãa nɛn dam. A ra de na n sãu nge nɛmu. Kpa na n sĩimɔ guunu wɔllɔ. Womu geniwa ba wom kowobun wirugii kua ka mɔrɔku.

will be added

X\