Habakuku 2

1Adama nɛ, Habakuku na yɔ̃wa gbãraru wɔllɔ nɛn kɔ̃su yerɔ nge wi u yɔɔru bwɛ̃ɛ, kpa n ka nɔ ye Gusunɔ u koo man sɔ̃, ka nge mɛ u koo man wisi nɛn weeweenun sɔ̃. 2Yera Yinni Gusunɔ u man wisa u nɛɛ, n gari yi yoruo yi u man sɔ̃ɔmɔ. N yi yoruo kpasasa kpee bɛsi sɔɔ. 3Yin tɔ̃ra kun gina tura yi ka koora. Adama yi koo koora yin saa yà n tura. Baa yì n tɛɛmɔ, na n gesi yi mara. Domi yi koo koorawa kam kam. 4N yoruo ma wi u tii sue u ǹ wãa swaa gea sɔɔ. Adama wi u kua gemgii naanɛ dokebu sɔɔ, u ko n wãawa. 5Wi u tii sue, u ku ra sinɛ sɛ̃ɛ. U ra n sãawa nge tam nɔro, kpa u n nɔɔ wukie nge gɔribun wãa yeru. U ku ra debu nge gɔɔ. U ra n tii bwesenu gawemɔwa u ka ko nin yinni. 6Adama bwese ni u mwɛɛra mi, nu koo nùn seesi nu nùn gari sɔ̃ ka wɔma ka mɔnnu, nu nɛɛ, u kuawa bɔ̃ruro wi, wi u dukia mɛnnamɔ ye ya ǹ sãa wigia, ma u gabun yãnu guramɔ u tɔruba yiimɔ. Sere saa yerà u ko n mɔ̀ nge mɛ. 7Bèn dibu u nɛni, ba koo nùn seesi subaru sɔɔ, kpa bu gura ye u mɔ. 8Nge mɛ u tɔn dabinu wɔri u nin yãnu gura, nge mɛya be ba tie, ba koo maa nùn wɔri bu win yãnu gura yèn sɔ̃ u tɔmbun yɛm yari, ma u tem ka mɛn wusu ka mɛn tɔmbu dam dɔre. 9Bɔ̃rurowa wi u dukia guramɔ ye ya ǹ dɛɛre win berusebun mi, kpa u wa u n wãa aye bɛɛrɛgiru sɔɔ, mi u ǹ maa nɔni swãaru wasi. 10Adama win yɛnun sekura u sɔɔru kua mi, ye u ka bwese dabinu go. Win tiin wãara u kari bɔrie. 11Domi baa ka ganiɔ, yi koo wuri ko yi nùn taarɛ wɛ̃, kpa kpɛɛrun yari yi wuri wura. 12Bɔ̃rurowa wi u win wuun kpɛɛkpɛɛku swĩimɔ yɛm wɔllɔ, ma u tɔmbu dam dɔremɔ. 13Ye tɔmba mɔ̀ kpuro, ya koo dɔ̃ɔ mwaara. Ba tii nɔwia mɔ̀wa kam sɔɔ. Gusunɔ wɔllu ka tem Yinniwa u koo ye kpuro kam koosia. 14Saa ye sɔɔ, Yinni Gusunɔn bɛɛrɛ yɛ̃ru ta ko n yibawa tem sɔɔ nge mɛ nim wɔ̃ku ga ra n nim yiba. 15Bɔ̃rurowa wi u win beruse tam bɔɔbɔm wɛ̃ɛmɔ mu ka nùn go nge dɛ̃ɛ, u n yɔ̃ tereru, kpa u nùn sekuru doke u n mɛɛra. 16Yɛ̃ro u tii sekuru dokemɔwa mi, n ǹ mɔ bɛɛrɛ. Win tii u mu nɔruo kpa u tereru yɔ̃ra. Yinni Gusunɔ u koo nùn tilasi ko u ka win mɔrun nɔra nɔ kpuro, kpa win bɛɛrɛ ye u raa mɔ yu gɔsia sekuru. 17Daa kɔ̃sa ye u kua Libaniɔ, ya koo wɔri win wiru wɔllɔ. U yɛɛ go. Adama yɛɛ yi, yi koo nùn nandasia. Yeni kpuro ya koo nùn deema yɛm mɛ u yarin sɔ̃, ka dam mɛ u tem mɛ ka mɛn wusu ka mɛn tɔmbu dɔren sɔ̃. 18Arufaani yerà bwãarokunu nu mɔ tɔnu u ka sina u nu seku. Nu sãawa ni ba seka ka sisu, ma nu dera u weesu naanɛ sãa. Mban sɔ̃na tɔnu u koo win naanɛ doke bwãaroku ni u seka sɔɔ, ni, ni nu ǹ kpɛ̃ nu gari gere. 19Bɔ̃rurowa wi u dãa kuku sɔ̃ɔmɔ u mɔ̀, gu seewo, ma u kperu sɔ̃ɔmɔ u mɔ̀, tu dom yando. Yen gaa ya koo kpĩ yu nùn bwisi kɛ̃? Geema, u nu wura ka sii geesu pote. Adama nu ǹ hunde mɔ, nu n sere wãaru mɔ. 20Yinni Gusunɔ u wãa win sãa yee dɛɛrarɔ. Tɔmbu kpuro bu nɔɔ mario win wuswaaɔ.

will be added

X\