Habakuku 1

1Gari wee yi Yinni Gusunɔ u win sɔmɔ Habakuku sɔ̃ɔwa. 2Yinni Gusunɔ, sere saa yerà ko na n nun somiru kanamɔ. Sere saa yerà kaa n man maari. Sere saa yerà kaa de na n nun sɔ̃ɔmɔ ma tɔmba dam dɔrenamɔ. Nge sere saa yerà kaa na a sun wɔra. 3Mban sɔ̃na a dera na kɔ̃sa mɛɛra. Mban sɔ̃na kaa n tɔmbu mɛɛra ba n gem biranamɔ. Wee, tɔmba dam dɔrenamɔ ba daa kɔ̃sa mɔ̀ baama kpuro. Sannɔsu yiba, ma tɔmba siribu sokunamɔ baama kpuro. 4Goo sari wi u wooda mɛm nɔɔwammɛ. Ba ku ra tɔmbu ben gem wɛ̃ nge mɛ n weenɛ. Tɔn kɔ̃sowa u ra gemgii siribu di. 5Yinni Gusunɔ u nɛɛ, i bwesenu mɛɛrio i ka sikerena. I de biti yu bɛɛ mwa. Domi kon gãanu ko bɛɛn nɔni biru ni i ǹ naanɛ mɔ̀, baa goo ù n bɛɛ nu tusia. 6Wee, kon Babilonigibu seeyama. Tɔn be, ba nuki sum. Ba tem kpuro bukianamɔ bu wa bu ka bwesenu ganun wãa yenu mwɛɛri. 7Ba nanum mɔ ben dam saabu. Bera ba ra gɔsi ye ba kĩ. 8Ben dumi yi sannɛkunu ǹ kun mɛ gbeeku bɔ̃nu duka kere. Saa tontonden diya yi ra yɔ̃, kpa yi yibɛrɛ wɔri nge kasa ye ya goo buu wa. 9Be kpurowa ba wee bu ka tɔmbun yãnu gura. Ba nɔni girariwa mi ba dɔɔ. Ma ba yobu mwɛɛrimɔ ba mɛnnamɔ nge yani sɛɛri. 10Ba sinambu gɛma. Ba tem yɛ̃robu yɛ̃ɛmɔ. Ba ǹ wusun gbãranu gara. Domi ba ra tem turenu kowa bu ka gbãra ni yɔ kpa bu wuu si mwa. 11Yen biru kpa bu yari min di nge woo guna, kpa bu maa da bu gam wɔri bu kɔ̃sa ko. Ben dama ba naanɛ sãa, mu sãa nge ben bũu. 12Saa yellun di, wuna a sãa Gusunɔ. Wuna a sãa nɛn Yinni. A dɛɛre. Yen sɔ̃, sa ǹ gbimɔ. Yinni, wuna a sãa nɛn kpee baa mi na ra kuke. Wuna a Babilonigibu gɔsa, ma a bu dam kã kpa bu ka sun sɛɛyasia. 13Adama a ǹ kpɛ̃ a yɔ̃ra a n kɔ̃sa mɛɛra, domi a dɛɛre too. Ǹ n mɛn na, mban sɔ̃na a mɛɛra ye tɔn kɔ̃soba mɔ̀, ma a ǹ gãanu gerumɔ. Mban sɔ̃na a maari tɔn kɔ̃sobu ba gemgibu goomɔ. 14Mban sɔ̃na a tɔmbu kuammɛ nge swɛ̃ɛ, ǹ kun mɛ nge kɔkɔ ni nu ǹ kparo mɔ. 15Babilonigibu ba tɔmbu mwɛɛrimɔ nge swɛ̃ɛ yi ba mwa ka kɔkɔnu ǹ kun mɛ ka yãakoronu, kpa bu bu gura bu ka doona ka nuku dobu. 16Yen sɔ̃na ba ra ben yãakoronu yãkunu kue, kpa bu nu turare dɔ̃ɔ dokea. Domi nin saabuwa ba koo ka kpĩ bu dĩa geenu wa ni nu do bu di. 17Domma ba koo den ben takobiba wesia ben karanɔ. Ba ko n bwesenu sakirimɔwa wɔnwɔndu sariru sɔɔ sere ka baadommaɔ?

will be added

X\