Torubu 9

1Yen biru Gusunɔ u Nɔwɛ ka win bibu domaru kua u nɛɛ, i maruro i dabia kpa i yibu tem sɔɔ. 2Handunian yaa baayere ka gunɔ baagere ka ye ya kabirimɔ temɔ ka swãa baayere nim wɔ̃ku sɔɔ ya ko n bɛɛn bɛrum mɔ, domi na bɛɛ ye kpuro nɔmu sɔndia. 3Ye ya sĩimɔ ya wasi kpuro, ya ko n sãawa bɛɛn dĩanu nge mɛ na raa bɛɛ dãa binu ka yaka bii wɛ̃, mɛya na maa bɛɛ ye kpuro wɛ̃ɛmɔ. 4Adama i ku yaa tem ka yen yɛm sannu, i kun ye sake, domi yen yɛma mu dera ya wãa. 5I n maa yɛ̃ ma hunde koni baayere ye ya tɔnu go, kon ye win yɛm kɔsire bikia. 6Wi u tɔnun yɛm yari, tɔnuwa koo maa yɛ̃ron yɛm yari, domi na tɔnu taka kuawa nɛn weenasii. 7Adama i n maruramɔ i n dabiamɔ kpa i tɛria tem sɔɔ. 8Gusunɔ u kpam Nɔwɛ ka win bibu sɔ̃ɔwa u nɛɛ, 9wee, na wure na ka bɛɛ nɛn arukawani bɔkumɔ ka bɛɛn bwese te ta koo marura bɛɛn min di, 10ka sere hunde koni baayere ye ya ka bɛɛ wãa, saa gunɔsu sere yaa sabenu ka gbeeku yɛɛ yi yi ka bɛɛ yara kpakoro ten di kpuro gesi. 11Arukawani yera, nim yiburu ta ǹ maa hunde koniba kpuro kam koosiamɔ, mɛya ta ǹ maa handunia kpeesiamɔ. 12Arukawani ye na wure na bɔkumɔ ka bɛɛ ka hunde koni baayere sere ka baadommaɔ, yen yĩreru wee. 13Tera guru waa ye na dokemɔ wɔllɔ. 14Nà n guru winu doke wɔllɔ, guru waa ye, ya koo sɔ̃ɔsira ni sɔɔ, 15kpa n nɛn arukawani yaaya ye na ka bɛɛ bɔkua ka hunde koni baayere, kpa nim mu ku maa yibu mu sere baayere kam koosia ye ya wasi. 16Guru waa ye, ya koo sɔ̃ɔsira guru wiru sɔɔ. Nà n ye mɛɛra kpa n arukawani nɔru sarigia ye yaaya ye ya wãa nɛ Gusunɔ ka hunde koni baayeren baa sɔɔ. 17Nɛn arukawani yen yĩrera mi. 18Nɔwɛn bibu ita be ba raa dua kpakoro te sɔɔ ba yara, bera Sɛmu ka Kamu ka Yafɛti. Kamu sãawa Kananin tundo. 19Be ita beya ba sãa Nɔwɛn bibu. Ben min diya handuniagiba tɛriara kpuro. 20Sanam mɛya Nɔwɛ u wukubu torua u dãa bii ni ba mɔ̀ resɛm duura. 21Sɔ̃ɔ teeru u nin tam nɔra ya nùn goomɔ, ma u da win kurɔ u kpuna tereru. 22Ye Kamu Kananin tundo u win baan tere te wa u da tɔɔwɔ u win mɔɔ ka wɔnɔ, Sɛmu ka Yafɛti sɔ̃ɔwa. 23Yera ba na ba kumbooro sua ba sɔndi ben senɔ ba ka birum birum sĩa ba ben tundon tereru wukiri. Ba ǹ tu wa yèn sɔ̃ ba ben wuswaa sĩiyɛ. 24Sanam mɛ Nɔwɛn tam mu kpalla, yera u nua ye win bii yiruse u nùn kua. 25Ma u nɛɛ, kam koorewa Kanani. U koo kowa win maabu ka win wɔnɔbun yoo. 26U maa nɛɛ, bu Gusunɔ siaro wi u sãa Sɛmun Yinni. Wiya u koo Kanani ko Sɛmun yoo, 27kpa u maa Yafɛti dukia sosia, u de wi ka Sɛmu ba n wãa sannu, kpa Kanani u ko ben yoo. 28Nim yibu baka ten biru Nɔwɛ u kua wɔ̃ɔ gooba wunɔbu ka weeraakuru (350). 29Win wɔ̃ɔ kpuro ga kuawa nɛnɛ ka wunaa weeru ka wɔkuru (950) ma u kpuna u gu.

will be added

X\