Torubu 8

1Adama Gusunɔ kun Nɔwɛ duari ka gbeeku yɛɛ kpuro ka yaa sabe ni kpuro yi yi ka nùn wãa kpakoro te sɔɔ. Ma u dera woo ga kua tem sɔɔ ma nim mɛ, mu kaaram torua. 2Nim mɛ mu kuramɔ tem di mu yɔ̃ra, wɔlla maa kɛnua, gura yɔ̃ra. 3Nim mu doonamɔ fiiko fiiko. Sɔ̃ɔ wunaa weeru ka wɔkurun biru ma mu kaara. 4Suru nɔɔba yirusen sɔ̃ɔ wɔkura nɔɔbu ka yiruse sɔɔ, yera kpakoro te, ta da ta yɔ̃ra guu te ba mɔ̀ Araratin wɔllɔ. 5Nim mu kaaramɔ sere n ka kua suru wɔkuruse. Suru win tɔ̃ɔ gbiikiru sɔɔra guunun wii wɔlla tera. 6Ye n maa kua sɔ̃ɔ weeru, ma Nɔwɛ u kpakoro ten fɛnɛnti wukia. 7U gbanamgbaaru yɔ̃su ta n ka yaayaare mɔ̀ ta n daamɔ ta n wuramamɔ sere nim mu ka gbera temɔ. 8Yen biru u totobɛrɛru yɔ̃su u ka wa nim mù n kaara temɔ. 9Adama totobɛrɛ te, ta ǹ ayeru wa mi ta koo sura. Ma ta wura win mi, kpakoro te sɔɔ, yèn sɔ̃ nim gina tie tem sɔɔ kpuro. Ma Nɔwɛ u nɔmu dɛmia u tu mwa u doke kpakororu sɔɔ. 10U maa mara n kua sɔ̃ɔ nɔɔba yiru u sere maa totobɛrɛ te yɔ̃su. 11Ta wurama win mi yoka ta dãa wuru beku nɔɔ bɛri. Ma Nɔwɛ u gia ma nim mu kaarawa temɔ. 12Ma u maa mara sɔ̃ɔ nɔɔba yiru, u kpam totobɛrɛ te yɔ̃su. Ta ǹ maa wuramɛ win mi. 13Yen dɔma tera n kua Nɔwɛn wɔ̃ɔ nata ka tiasen (601) suru gbiikoon tɔ̃ɔ gbiikiru. Ma u kpakoro te kpɛɛya u deema wee, nim mu kpa tem mu gberama. 14Ye n kua suru yirusen sɔ̃ɔ yɛnda nɔɔbu ka yiru, yera u deema wee, tem mu gbera mam mam. 15Yera Gusunɔ u Nɔwɛ sɔ̃ɔwa u nɛɛ, 16i yario kpakororun di wunɛ ka wunɛn kurɔ ka wunɛn bibu ka ben kurɔbu. 17I ka yɛɛ bwese bweseka kpuro yario saa gunɔsu sere yɛɛ naasu nnɛgii ka yɛɛ yi yi ra kabiri temɔ, kpa yi marura yi dabia kpa yi tɛria temɔ. 18Ma Nɔwɛ u yara wi ka win kurɔ ka win bibu ka ben kurɔbu. 19Ma yɛɛ yi yi naasu nnɛ mɔ kpuro ka yi yi ra kabiri ka gunɔsu kpuro, yaa baayere gesi ye ya wãa temɔ kpurowa ya yara goon di, baayere ka yen bweseru. 20Saa yera Nɔwɛ u yãku yeru bana mi u koo Yinni Gusunɔ sã. Ma u yɛɛ ka gunɔsu gɔsa bweseru baatere sɔɔ te ba ra ka yãkuru ko. Ma u ka yãku dɔ̃ɔ mwaararuginu kua yãku yee ten wɔllɔ. 21Ma Yinni Gusunɔ u yãku ni mwa ma u tii sɔ̃ɔwa u nɛɛ, na ǹ kon maa tem bɔ̃rusi tɔnun sɔ̃. Domi tɔnun gɔ̃run bwisikunu sãawa kɔ̃sunu saa win birun di. Na ǹ maa hunde koniba kpuro kpeerasiamɔ nge mɛ na kua. 22Sere dunia yu ka kpe, duurubu ka gɛ̃ɛbun saa ka wooru ka yam susurun saa ka sɔ̃ɔ sãreru ka wuburun saa, ka sere maa sɔ̃ɔ sɔɔ ka wɔ̃kuru, yen gaa kun kpeemɔ.

will be added

X\