Torubu 47

1- 2Yen biruwa Yosɛfu u win maa ben nɔɔbu sua ba da Egibiti sunɔn mi. Ma Yosɛfu u nùn sɔ̃ɔwa u nɛɛ, nɛn maabu ka nɛn tundo ba na saa Kananin tem di ka ben yãanu ka ben kɛtɛba ka ben ye ba mɔ kpuro. Wee, ba wãa Gosɛnin temɔ. Ma u win maa be Egibiti sunɔ tusia. 3Sunɔ wi, u bu bikia u nɛɛ, sɔmbu terà i ra ko. Ba nùn wisa ba nɛɛ, yaa sabena sa ra kpare, yinni. Mɛya maa bɛsɛn baababan tii. 4Ba maa nɛɛ, sa nawa su ka sina tem mi, domi yaka bekusu sari si bɛsɛn yaa sabenu koo di, yèn sɔ̃ gɔ̃ɔ te, ta Kananin tem nɛni. Yen sɔ̃na sa nun kanamɔ a de su sina Gosɛnin temɔ. 5Yera sunɔ wi, u Yosɛfu sɔ̃ɔwa u nɛɛ, wee, wunɛn tundo ka wunɛn maabu ba wɔma wunɛn mi. 6Egibitin tem kpuro wee wunɛn nɔmuɔ. A de bu sina Gosɛniɔ, domi min tema mu gea sãa. À n maa yɛ̃ gaba kparabun hania mɔ be sɔɔ, a bu nɛn yaa sabenu nɔmu sɔndio. 7Yen biru Yosɛfu u ka win tundo Yakɔbu da Egibiti sunɔn mi, ba tɔbirina. Ma Yakɔbu u sunɔ wi domaru kua. 8Yera sunɔ u nùn bikia u nɛɛ, wunɛn wɔ̃ɔ nyewa mini. 9Yakɔbu u nùn wisa u nɛɛ, nɛn wɔ̃ɔ wunaa teeru ka wɔkura mi, mìn di na handunia dua, na maa sirenɛwa. Nɛn wɔ̃ɔ ga ǹ dabi, ga ǹ maa nuku dobu mɔ, mɛya ga ǹ maa nɛn baababaguu tura ge ba kua sanam mɛ ba wãa hunde sɔɔ. 10Ma Yakɔbu u kpam sunɔ domaru kua ba sere yara win min di. 11Yosɛfu u win tundo ka win maabu sin yeru kua, u bu tem wɛ̃ Ramusɛsin bera gia mi n gea bo Egibitin tem sɔɔ, nge mɛ sunɔ u raa nùn sɔ̃ɔwa u ko. 12Ma u win tundon yɛnugii be kpuro dĩanu wɛ̃ nge mɛ ben geera nɛ. 13Sanam dɔɔ sanam wee, gɔ̃ɔra kpɛ̃a tem mɛ sɔɔ. Baa dĩa bura kun maa wãa. Egibitigibu ka Kananiba ba wururawa kpuro gɔ̃ɔ ten sɔ̃. 14Ba ka ben gobi kpuro dĩanu dwa. Ma Yosɛfu u gobi yi mɛnna u yi sunɔn yɛnuɔ. 15Sanam mɛ gobi kpa Egibitiɔ ka Kananiɔ, Egibitigibu kpuro ba na ba Yosɛfu deema ba nɛɛ, a sun dĩanu wɛ̃ɛma. Mban sɔ̃na sa ko gbi a n sun mɛɛra, domi bɛsɛn gobi kpa. 16Yosɛfu u bu sɔ̃ɔwa u nɛɛ, ì kun gobi mɔ, i man bɛɛn yaa sabenu wɛ̃ɛma kpa n bɛɛ dĩanu wɛ̃. 17Ba ka ben dumi ka yãanu ka bonu ka nɛɛ ka kɛtɛkunu Yosɛfu naawa. Ma u ka ye kpuro bu dĩanu kɔsina. Nge mɛya ba ka ben sabenu kpuro dĩanu kɔsina wɔ̃ɔ ge. 18Ye wɔ̃ɔ ge, ga doona, ba kpam na Yosɛfun mi, ba nɛɛ, yinni, sa ǹ kpɛ̃ su nun gãanu berua. Bɛsɛn gobi kpa, bɛsɛn yaa sabenu kpuro maa wãa wunɛn mi. A yɛ̃ ma gãanu kun maa sun tie ma n kun mɔ bɛsɛn wasi ka bɛsɛn gbea. 19Mban sɔ̃na kaa n sun mɛɛra sa n gbiɔ, kpa bɛsɛn gbea yu kam ko. Yen sɔ̃, a ka sun dĩanu kɔsinɔ kpa bɛsɛn gbea yu ko sunɔgia kpa su ko win yobu. A sun dĩa bweseru wɛ̃ɛyɔ su duure ni sa ko ra di sa n ka wãa, kpa gbea ye, yu ku ko gbee diinu. 20Ma Yosɛfu u Egibitigibun gbea kpuro sunɔ dwia, domi gɔ̃ɔra dera ba nùn ye dɔre. Yera tem mɛ kpuro mu kua sunɔgim. 21Ma Yosɛfu u tɔmbu kpuro yarinasia u bu yoo sɔmburu koosia Egibitin tem kpuro sɔɔ. 22Adama u ǹ yãku kowobun gbea dwa, domi Egibiti sunɔ u wooda gaa mɔ ye ya dera u ra bu dĩanu wɛ̃. Yen sɔ̃na ba ǹ ben gbea dɔre. 23Ma Yosɛfu u tɔmbu sɔ̃ɔwa u nɛɛ, gisɔ na bɛɛ dwa bɛɛ ka bɛɛn gbea i kua sunɔn yobu. Wee, na bɛɛ dĩa bweseru wɛ̃ɛmɔ i ka duure gbea ye sɔɔ. 24Sanam mɛ dĩanu ra ye, i nu bɔnu koowo suba nɔɔbu, i sunɔ sube teeru wɛ̃ kpa i suba nnɛ tii yiiya. Mi sɔɔra ko i bweseru wuna i ka duure kpa i ye ya tie di, bɛɛ ka bɛɛn tɔmbu. 25Ma ba nɛɛ, wunɛn durom mɛ, mu sun faaba kua. Tɛ̃ sa ko ko sunɔn yobu. 26Nge mɛya Yosɛfu u ka wooda yeni yi, ye ya nɛɛ, ba n da Egibitin gbean dĩanu bɔnu ko suba nɔɔbu kpa sube teeru tu ko sunɔgiru. Wooda ye, ya wãa sere ka gisɔ. Yãku kowobun gbea tɔnawa ya ǹ kue wigia. 27Yakɔbu wi ba maa sokumɔ Isireli ka wigibu ba sina Egibitin temɔ Gosɛnin bera gia. Ba dukia kpaasinamɔ mi, ba maruramɔ ba dabiamɔ. 28Yakɔbu u kua wɔ̃ɔ wɔkura nɔɔbu ka yiru Egibitin temɔ. Ma win wãarun sanam kpuro mu kua wɔ̃ɔ wunaa weeru ka nɔɔba yiru. 29Ye win gɔɔ turuku kua, u win bii Yosɛfu soka u nùn sɔ̃ɔwa u nɛɛ, nà n wunɛn kĩi geeru wa, na nun kanamɔ, a wunɛn nɔmu dokeo nɛn tɔbuɔ a ka bɔ̃re ma a ǹ man sikumɔ Egibitin tem mini. 30Sanam mɛ kon kpuna n gbi n nɛn baababa deema, a nɛn goru suo a ka yari Egibitin di kpa a tu sike ben sikaɔ. Yosɛfu u nùn wisa u nɛɛ, kon ko nge mɛ a gerua. 31Yakɔbu nɛɛ, a bɔ̃ruo. Ma Yosɛfu u bɔ̃rua. Yen biru Yakɔbu u yiira win kpin yerun wiru gia u Gusunɔ siara.

will be added

X\