1 Yakɔbu wi ba mɔ̀ Isireli u seewa u swaa wɔri ka ye u mɔ kpuro u tura Beri Sebaɔ. Miya u Gusunɔ yãkuru kua nge mɛ win tundo Isaki u ra raa ko. 2 Yera wɔ̃kuru Gusunɔ u ka nùn gari kua kãsiru sɔɔ u nɛɛ, Yakɔbu, Yakɔbu. Ma u wura u nɛɛ, nɛ wee. 3 Ma Gusunɔ u nɛɛ, nɛna Gusunɔ, wunɛn tundon Yinni. A ku bɛrum ko, a doo Egibiti mi, domi miya kon nun ko bwese bakarun nuuru. 4 Nɛn tii kon ka nun da kpa n maa ka nun wurama. Yosɛfun nɔmu sɔɔra kaa gbi. 5 Yakɔbu ka win tɔmbu kpuro ba seewa Beri Seban di, ma win biba nùn doke sarɛti sɔɔ ka ben tiin bibu ka ben kurɔbu. Sarɛti be, Egibiti sunɔwa u bu mɔrisiama bu ka bu sua. Yen biru ba ben yaa sabenu gura ka ben dukia ye ba wa Kananin temɔ. Ma ba doona Egibitiɔ, 7 wi ka win bii tɔn durɔbu ka tɔn kurɔbu ka maa win debuminu, win yɛnugibu kpuro gesi. 8 Be ba sãa Yakɔbun bweseru be ba na Egibitiɔ, ben yĩsa wee. Rubɛni, win bii gbiikoo, 9 ka win bibu Enɔku ka Paalu ka Hɛsironi ka Kaami. 10 Simɛɔ ka win bibu Yɛmuɛli ka Yamini ka Ohadi ka Yakini ka Sokaa ka sere Sɔɔlu wìn mɛro u sãa Kananigii. 11 Lefi maa ka wigibu Gɛɛsɔni ka Kehati ka Mɛrari. 12 Yuda ka wigibu Eri ka Onani ka Sela ka Perɛsi ka Seraki. Adama Eri ka Onani ba gu Kananin temɔ. Ma ben wɔnɔ Perɛsi wi, u Hɛsironi mara ka Hamulu. 13 Isakari ka maa wigibu Tola ka Pufa ka Yoobu ka Simuroni. 14 Sabuloni maa ka wigibu Serɛdi ka Eloni ka Yalɛɛli. 15 Beni ka sere win bii tɔn kurɔ Dina ba sãa Lean bibu be u Yakɔbu marua Padan Aramuɔ. Be ka ben bibu ba sãawa mi tɔnu tɛna ka ita. 16 Gadi ka maa wigibu Sifioni ka Hagi ka Suni ka Ɛsiboni ka Eri ka Arodi ka Areli. 17 Asɛɛ ka maa wigibu Yimina ka Yisifa ka Yisifi ka Beria ka ben sesu Seraki. Ma Beria u Heberu mara ka Maakiɛli. 18 Bera ba sãa Yakɔbun bweseru be ba maa marura Silipan min di. Be kpuro ba sãawa tɔnu wɔkura nɔɔbu ka tia. Silipa wi, u sãawa Lean yoo wi Labani win tundo u nùn wɛ̃. 19 Yosɛfu ka Bɛnyamɛɛwa ba sãa Rasɛlin bibu. 20 Yosɛfu u wãawa Egibitiɔ u ka Manase ka Efaraimu mara. Bii ben mɛron yĩsira Asinati. U sãawa Potifera, Onin yãku kowon bii. 21 Ma Bɛnyamɛɛ u seewa u Bela mara ka Bekɛɛ ka Asibɛli ka Gera ka Namani ka Ehi ka Rɔsi ka Mupimu ka Hupimu ka Aadu. 22 Be ba sãa Yakɔbun bweseru be ba maa marura Rasɛlin min di, bera mi. Be kpuro ba kuawa tɔnu wɔkura nnɛ. 23 Biliha u bibu yiru mara, beya Danu ka Nɛfitali. Danu u seewa u Husimu mara. 24 Nɛfitali u maa seewa u Yasɛɛli ka Guni ka Yesɛɛ ka Silɛmu mara. 25 Bera ba sãa Yakɔbun bweseru be ba maa marura Bilihan min di. Be kpuro ba sãawa mi tɔmbu nɔɔba yiru. Biliha wi, u sãawa Rasɛlin yoo wi Labani win tundo u nùn wɛ̃. 26 Tɔn be ba ka Yakɔbu da Egibitiɔ be ba sãa win tiin yɛm, ba sãawa tɔnu wata ka nɔɔba tia, win bibun kurɔbu baasi. 27 N deema Yosɛfu u maa bibu yiru mara Egibiti mi. Ma Yakɔbun tɔmbu be ba sãa win yɛm ba ka wãa Egibitiɔ, ben geera kua tɔnu wata ka wɔkuru. 28 Ye ba sisi mi, yera Yakɔbu u Yuda gɔra u da u Yosɛfu sɔ̃ ma u dɔɔ Gosɛni gia. 29 Ma Yosɛfu u win kɛkɛ ye dumi gawe dua u ka da Gosɛniɔ u ka win tundo Isireli yinna. Ye ba yinna u nùn gaba wĩirɔ u bɔkasi ma u swĩisi n ka tɛ. 30 Ma Yakɔbu wi ba maa sokumɔ Isireli, u Yosɛfu sɔ̃ɔwa u nɛɛ, baa nà n gu gisɔ, ya ǹ taarɛ, domi na wunɛn wuswaa wa, na maa wa ma a wãa hunde sɔɔ. 31 Yera Yosɛfu u win maabu ka sere maa win tundon yɛnugii be ba tie sɔ̃ɔwa u nɛɛ, na kon da n sunɔ nɔɔsia ma bɛɛ nɛn tundon yɛnugibu i tunuma, bɛɛ be i raa wãa Kananin temɔ. 32 Kon nùn sɔ̃ ma yaa sabenun sɔmbura i ra ko. I maa ka bɛɛn yãanu ka bɛɛn kɛtɛba na, ka sere bɛɛn ye i mɔ kpuro. 33 Yen sɔ̃, ù n da bɛɛ bikia u nɛɛ, 34 sɔmbu terà i ra ko, i nùn wisio i nɛɛ, yaa sabenun nɔɔriba bu sãa bɛɛn sɔmburu saa bɛɛn birun di sere ka gisɔ, bɛɛ ka bɛɛn baababa. Nge mɛya i ko wa i ka sina Gosɛnin temɔ, domi Egibitigiba ku ra sabe kparobu kã.
