1 Yosɛfu u win yɛnun sɔm kowobun wirugii sɔ̃ɔwa u nɛɛ, a tɔn ben saakiba yibio nge mɛ ben baawure u koo kpĩ u sɔbe, kpa a ben baawuren gobi wesia win saakiɔ. 2 Kpa a nɛn nɔra ye ba kua ka sii geesu doke ben yãkabun saakiɔ ka sere maa win dĩanun gobi. Sɔm kowo wi, u kua kpuro nge mɛ Yosɛfu u nùn sɔ̃ɔwa. 3 Bururu yam sãreru ba bu kara ba doona ka ben kɛtɛkunu. 4 Ye ba swaa wɔri n ǹ tɛ, yera Yosɛfu u win sɔm kowo wi sɔ̃ɔwa u nɛɛ, a tɔn be naa swĩiyɔ kpa a bu sɔ̃ a nɛɛ, mban sɔ̃na ba bu gea kua ma ba kɔ̃sa wesia. 5 Ba ǹ yɛ̃ ma nɔra yera nɛ wunɛn yinni na ra ka tam nɔ, kpa n ka wa ye ya wee sia? Mban sɔ̃na ba kɔ̃sa yenin bweseru kua. 6 Ma sɔm kowo wi, u bu naa swĩi. Ye u bu naamwɛ, u bu gari yi sɔ̃ɔwa. 7 Ba nùn wisa ba nɛɛ, mban sɔ̃na a gari yinin bweseru gerua. Sere ka Gusunɔ wi sa sãamɔn yĩsiru, sa ǹ yenin bweseru kue. 8 Bɛsɛ be sa ka nun gobi yi a duari bɛsɛn saakiba sɔɔ naawa saa Kananin di, bɛsɛra sa ko maa sii geesu ǹ kun mɛ wura gbɛni wunɛn yinnin dirun di? 9 Yen sɔ̃, wìn mi a nɔra ye wa, yɛ̃ro u gbi, kpa bɛsɛ be sa tie, su ko wunɛn yobu. 10 Ma sɔm kowo wi, u bu wisa u nɛɛ, ya wã ye i gerua. Adama wìn mi na nɔra ye wa, wi turowa u koo ko nɛn yoo. Bɛɛ be i tie, kpa i doona. 11 Ma ben baawure u win saaki yi temɔ ka sɛndaru u kusia. 12 Ma sɔm kowo wi, u na u saaki be mɛɛra mɛɛra saa bukurogian min di n ka girari ben yãkabugiaɔ. Ma u nɔra ye wa Bɛnyamɛɛn saakiɔ. 13 Ma ba ben tiin yabenu nɛnua ba kasuka nuku sankiranun sɔ̃. Yera ba maa ben kɛtɛkunu sɔmunu sɔbi ba wura wuuɔ. 14 Yuda ka wigibu ba tunuma Yosɛfun yɛnuɔ ba deema u ǹ gina yara. Ma ba yiira win wuswaaɔ. 15 Yosɛfu u bu sɔ̃ɔwa u nɛɛ, mban bwesera i kua mɛ. I ǹ yɛ̃ ma tɔnu nge nɛ u koo kpĩ u wa ye ya wee sia? 16 Ma Yuda nùn wisa u nɛɛ, yinni, yen yerà kon maa gere su ka yari taarɛn di. Domi Gusunɔ u sun wa ma sa sãa taarɛgibu. Tɛ̃ a sun mɔɔ su ko wunɛn yobu, bɛsɛ ka wìn mi ba nɔra ye wa. 17 Yera Yosɛfu u nɛɛ, su ku wa mɛ bu nɛɛ, nɛna na yen bweseru kua. Adama wìn mi ba nɔra ye wa, wiya u koo ko nɛn yoo. Ǹ n mɛn na, bɛɛ be i tie, i gɔsiro yɛnuɔ ka bɔri yɛndu i bɛɛn tundo deema. 18 Ma Yuda u maa Yosɛfu susi u nɛɛ, a suuru koowo yinni, nà n maa gãanu gerua, a ku mɔru ko, domi a sãawa nge Egibitin sunɔ. 19 Yinni, wuna a sun bikia a nɛɛ, sa tundo mɔ? Sa wɔnɔ mɔ? 20 Ma sa nun wisa sa nɛɛ, sa tundo mɔ u tɔkɔ kua, ka wɔnɔ turo wi ba mara tɔkɔru sɔɔ. Bii win mɔɔ u gu, wi turowa u tie win mɛron bera gia. Bɛsɛn tundo wi, u maa nùn kĩ too. 21 Ye sa yeni gerua, yinni, ma a nɛɛ, su ka nùn na wunɛn mi, a nùn wa ka nɔni. 22 Ma sa wisa sa nɛɛ, n ǹ koorɔ bii wi, u bɛsɛn tundo deri, domi ù n nùn deri, tundo wi, u koo gbi. 23 Ma a sun sɔ̃ɔwa a nɛɛ, sà kun ka nùn sisi, su ku ra nɛ wunɛn mi. 24 Saa ye sa tura bɛsɛn tundon mi, sa wunɛn gari yi nùn sɔ̃ɔwa. 25 Sɔ̃ɔ mɛɛrun biru ma u nɛɛ, su gɔsirama mini su ka maa nùn dĩanu dwia fiiko. 26 Yera sa nùn wisa sa nɛɛ, sa ǹ dɔɔ ma n kun mɔ ka bɛsɛn wɔnɔ sannu, domi sa ǹ kpɛ̃ su na wunɛn wuswaaɔ n kun ka wi. 27 Ma bɛsɛn tundo u sun sɔ̃ɔwa u nɛɛ, sa yɛ̃ ma bibu yiruwa win kurɔ Rasɛli u nùn marua. 28 Ben turo u yara yɛnun di, u ǹ maa nùn wa sere ka gisɔ. U yĩiyɔ ma gbeeku yaa ya nùn sɛ̃re ya kasuka. 29 Yen sɔ̃, sà n maa nùn yiruse wi suari, ù n nua wahala gaa ya nùn deema, nuku sankiranu koo be nùn go, domi u tɔkɔ kua. 30 Yen sɔ̃ tɛ̃, yinni, nà n wura bɛsɛn tundon mi, bii wi sari, sa ko de durɔ tɔkɔ te, tu gbi ka nuku sankiranu bii win kĩrun sɔ̃. 32 Yen biru nɛ wi na gari mɔ̀ mini, nɛna na tii bii wi sɔbi, domi na nɛɛ, nà kun ka nùn wuramɛ, n kua nɛn sɔmunu sere ka baadommaɔ. 33 Yen sɔ̃ tɛ̃, na nun kanamɔ a man koowo yoo bii win ayerɔ, kpa wi ka be ba tie bu gɔsira yɛnuɔ. 34 Domi na ǹ yɛ̃ amɔna kon bɛsɛn tundo tusia nà n sĩa bii wi sari. Gusunɔ u ku de nɛn nɔni yi wa kɔ̃sa ye ya koo durɔ tɔkɔ te deema.
