Torubu 43

1Sanam dɔɔ sanam wee, gɔ̃ɔra dam mɔ̀ Kananin temɔ ta dɔɔ. 2Ye Yakɔbu ka win bibu ba dĩa ni di ba kpa, ni ba raa dweema Egibitin di mi, yera u bu sɔ̃ɔwa u nɛɛ, i maa wuro Egibiti mi, i sun dĩanu fiiko dwiama. 3Yuda u nùn sɔ̃ɔwa u nɛɛ, Egibitin wirugii wi, u sun sɔ̃ɔwa u sirewa u nɛɛ, su ku na win wuswaaɔ ma sa ǹ bɛsɛn wɔnɔ Bɛnyamɛɛ nɛni. 4Ǹ n mɛn na, à n wura u sun swĩi, sa ko da su nun dĩanu dwiama. 5À n maa yina, sa ǹ dɔɔ. Domi durɔ wi, u nɛɛ, su ku ra nɛ win wuswaaɔ ma n kun ka bɛsɛn wɔnɔ wi. 6Ma Yakɔbu wi ba maa sokumɔ Isireli, u bu sɔ̃ɔwa u nɛɛ, gari kɔ̃si yiren bwesera i man kua mɛ, ye i nɛɛ, i maa wɔnɔ mɔ u bɛɛ tie. 7Ba nùn wisa ba nɛɛ, durɔ wi, u sun bikia u sirewa u nɛɛ, amɔna sa sãa. Wara sun mara. Bɛsɛn tundo u wãa hunde sɔɔ? Sa maa wɔnɔ goo mɔ? Ma sa nùn wisa ye u sun bikia kpuro. Amɔna sa ko n ka yɛ̃ ma u koo nɛɛwa su ka bɛsɛn wɔnɔ na. 8Yuda u win tundo Isireli sɔ̃ɔwa u nɛɛ, a de bɛsɛn wɔnɔ wi, u ka man da kpa su doona kpa bɛsɛ kpuro su ku ra gbi, bɛsɛ ka wunɛ ka bɛsɛn bibu. 9Ye n nùn deema kpuro nɛna kon ye sɔbe kpa na n sãa taarɛgii wunɛn mi, nà kun ka nùn wuramɛ. 10Wunɛn tii a wa saa mìn di sa gari yi mɔ̀, sà n dɔɔn na, sa n gɔsiramɛ nɔn mɛɛruse. 11Isireli u gerua u nɛɛ, ǹ n mɛn na, yà n kua tilasi, i gãa buranu suo ni nu sãa bɛsɛn tem miginu ni nu ǹ wãa Egibitiɔ i ka durɔ wi daawa, nge gum sawaram ka tim fiiko ka turare fiiko ka dãa marum fiiko ka tii bi ba ra soku miru. 12Kpa i n gobi nɛni nge mɛ i raa ka dan nɔn yiru. Ì n tura mi, kpa i bu yiɔnɔ wesia yi sa deema bɛɛn saakiba sɔɔ. À ku tuba, ba yi duariwa. 13Yen biru i bɛɛn wɔnɔ wi suo kpa i da. 14Gusunɔ Dam kpurogii u koo de durɔ wi, u bɛɛn wɔnwɔndu wa kpa u de i wurama ka Simɛɔ ka Bɛnyamɛɛ. Nà n kon maa bibu bian na, to, kpa n bia. 15Ma bii be, ba kɛ̃ɛ ni sua ka gobi yi ba raa ka dan nɔn yiru ka Bɛnyamɛɛ sannu. Ma ba seewa ba swaa wɔri ba da Egibitiɔ. Ye ba tura mi, ba da Yosɛfun mi. 16Sanam mɛ Yosɛfu u bu wa ka Bɛnyamɛɛ sannu, u win sɔm kowobun wirugii sɔ̃ɔwa u nɛɛ, a tɔn be duusio nɛn dirɔ. Yen biru a doo a yaa go. Domi sanna sa ko di sɔ̃ɔ sɔɔ ge nɛ ka be. 17Ma sɔm kowo wi, u kua nge mɛ Yosɛfu u nùn sɔ̃ɔwa. U ka bu da diru mi. 18Ye ba wãa diru mi, yera bɛrum bu mwa ba tii sɔ̃ɔwa ba nɛɛ, gobi yi ba wesia bɛsɛn saakiba sɔɔ, yin sɔ̃na ba ka sun na mini, kpa bu sun mwa ka dam ka bɛsɛn kɛtɛkunu, kpa su ko ben yobu. 19Yera saa Yosɛfun dii kɔnnɔn di ba sɔm kowo wi sɔ̃ɔwa ba nɛɛ, 20yinni, a sun suuru kuo. Ye sa gbia sa na mini sa dĩanu dwa, 21saa ye sa ka nu dɔɔ yɛnuɔ, sa yɔ̃ra swaaɔ su ka wɛ̃ra. Yera sa bɛsɛn saakiba kusia ma sa deema gobi yi sa kɔsia kpuro wee, yi wãa bɛsɛn baawuren saaki sɔɔ. Yi wee, sa ka wurama. 22Domi sa ǹ yɛ̃ wi u yi wesia bɛsɛn saakiba sɔɔ. Mɛya sa maa ka gobi na su ka wure su dĩanu dwe. 23Sɔm kowo wi, u bu wisa u nɛɛ, i ku nanda, i ku wurura. Gusunɔ, bɛɛn baaban Yinniwa u bɛɛ yi kã. Na raa bɛɛn gobi yi mwa. Yen biru u bu Simɛɔ yarama. 24Ma u bu duusia Yosɛfun yɛnuɔ u dera ba ben kɔ̃ri kpakia, u maa ben kɛtɛkunu taka wɛ̃. 25Ma Yosɛfun maa be, ba ben kɛ̃nu sɔɔru mɔ̀ sere u ka tunuma sɔ̃ɔ sɔɔ, domi ba nua ma sanna ba koo di ka wi. 26Ye Yosɛfu u tunuma yera ba da ba yiira ba nùn kɛ̃ɛ ni wɛ̃. 27Ma u ben alafia bikia u nɛɛ, bɛɛn durɔ tɔkɔ wìn gari i gerua mi, u bwãa do? U wãa hunde sɔɔ sere ka tɛ̃? 28Ba nùn wisa ba nɛɛ, bɛsɛn tundo, wunɛn bɔ̃ɔ u wãa hunde sɔɔ, u bwãa do. Ma ba kpam nùn yiira. 29Ye Yosɛfu u nɔni seeya u win wɔnɔ Bɛnyamɛɛ wa, yera u bikia u nɛɛ, bɛɛn wɔnɔ wìn gari i man sɔ̃ɔwa mi, wiya mini? Ma u Bɛnyamɛɛ domaru kua u nɛɛ, Gusunɔ u nun durom kua nɛn bii. 30Ma u seewa fia u bu deri u da u swĩ dii sɔɔwɔ, domi win wɔnɔn kĩra nùn nɛnua too too. 31Ye u swĩ u kpa, u wuba ma u yarima. Ka mɛ, u maa tii dam kãawa u ku ka swĩ ben wuswaaɔ. Ma u wooda wɛ̃ bu ka dĩa ni na. 32Ma u sina nɛnɛm, win maabu ka wɔnɔ maa nɛnɛm, Egibitigii be ba ra maa ka nùn di, be maa nɛnɛm. Domi Egibitigibu ba ku ra kã bu ka Heberuba di sannu yèn sɔ̃ ba bu garisi disigibu. 33Yosɛfu u win maa be sinasia nge mɛ ba ka keranɛ saa gbiikoon di sere ka dãakowɔ. Ma ba mɛɛrina ka biti ye u ka bu sinasia. 34Ma ba bu dĩa ni wɛ̃ɛmɔ ni nu wãa Yosɛfun tabulu wɔllɔ, adama Bɛnyamɛɛginu nu sãawa beginun nɔn nɔɔbu. Ma ba di ba nɔra ba nuku dobu kua.

will be added

X\