Torubu 40

1Yeba kpuron biru Egibiti sunɔn sɔm kowobun wirugibu yiru ba nùn torari. Turo u sãa pɛ̃ɛ kowobun wirugii, turo maa wi u ra nùn nɔra wɛ̃. 2Ma u ka be yiru ye mɔru bara. 3U bu doke pirisɔm kɔ̃sobun wirugiin dirɔ mi ba Yosɛfu kɛnua. 4Pirisɔm kɔ̃sobun wirugii wi, u bu Yosɛfu nɔmu sɔndia u n bu sɔmburu kuammɛ. Ma ba sɔ̃ɔ mɛɛru kua pirisɔm diru mi. 5Yera wɔ̃kuru garu be yiru ye, ba dosa pirisɔm diru mi. Ben baawure ka wiguu ka gen tubusianu nɛnɛm. 6Ye Yosɛfu u na ben mi bururu u bu mɛɛra, yera u deema ben nuki sankire. 7Ma u bu bikia u nɛɛ, amɔna bɛɛn wuswaa ka burisinɛ mɛ gisɔ. 8Ba nùn wisa ba nɛɛ, sa dosawa. Goo maa sari wi u koo sun dosu si tubusia. Yosɛfu u bu sɔ̃ɔwa u nɛɛ, n ǹ Gusunɔwa u ra n gãanu kpuron tubusianu yɛ̃? Ǹ n mɛn na, i man bɛɛn dosu si saario. 9- 10Ma wi u ra Egibiti sunɔ tam nɔra wɛ̃, u win dosu Yosɛfu saaria u nɛɛ, nɛn dosu sɔɔ wee, na resɛm dãru wa nɛn wuswaaɔ ta kpia. Dãa te, ta kãasi ita mɔ. Ma ta wɛ̃su kua ta binu mara nu ye. 11N deema na Egibiti sunɔn nɔra nɛni nɛn nɔmuɔ. Na resɛm ye wɔka na gamɛ nɔra ye sɔɔ. Ma na ye sua na nùn wɛ̃. 12Ma Yosɛfu u nùn sɔ̃ɔwa u nɛɛ, dosu gen tubusianu wee. Kãasi ita ye, sɔ̃ɔ itawa mi. 13N tie sɔ̃ɔ ita sunɔ u ka nun yara pirisɔm di kpa u nun wesia wunɛn sɔmburu sɔɔ. Kaa kpam nùn win nɔra wɛ̃ nge mɛ a ra raa ko sanam mɛ a sãa win sɔm kowo. 14Adama a n man yaaye sanam mɛ a doo nɔɔru wɔri. Na nun kanamɔ, a man durom kuo a sunɔ nɛn gari sɔ̃ kpa a man yara dii tenin di. 15Domi ba man gbɛnawa saa Heberuban tem di, ba ka man na mini. Yen biru na ǹ maa gãanu kue ba ka man kpɛ̃ɛma pirisɔm diru mi. 16Ye pɛ̃ɛ kowobun wirugii wi, u wa ma Yosɛfu u wiɔnɔn dosu ge tubusia n dora, yera u nɛɛ, wee, nɛn dosu sɔɔ, nɛna maa birenu ita sɔɔwa nì sɔɔ ba ra pɛ̃ɛ doke. 17Bire te ta wãa wɔllɔ, kira bwese bwesekawa wãa mi, ye ba yeesia pɛ̃ɛ doo sɔɔ. Ma gunɔsu kira ni dimɔ bire te sɔɔ, nɛn wiru wɔllɔ. 18Yosɛfu nùn wisa u nɛɛ, gen tubusianu wee. Birenu ita ye, sɔ̃ɔ itawa mi. 19N tie sɔ̃ɔ ita sunɔ u ka wunɛn wiru bura kpa bu nun sãarusia dãa wɔllɔ, gunɔsu su wunɛn yaa di. 20Ye n kua sɔ̃ɔ ita ye, Egibiti sunɔ u win marubun tɔ̃ɔ bakaru kua. Ma u sɔm kowobu yiru ye yara pirisɔm di, u bu yɔ̃rasia win sɔm kowo be ba tien wuswaaɔ. 21Ma wi u ra nùn nɔra wɛ̃ mi, u nùn wesia win sɔmburu sɔɔ. 22Adama ba pɛ̃ɛ kowobun wirugii wi sãarusia nge mɛ Yosɛfu u raa bu tubusia. 23Yen biru sunɔn nɔri wɛ̃ɔ wi, u Yosɛfu duari.

will be added

X\