Torubu 4

1Yen biru Adamu ka win kurɔ Efa ba mɛnna ma Efa u gura sua u Kaɛni mara. Ma u nɛɛ, ka Yinni Gusunɔn somira na tɔnu taka kua. 2Ma u maa gura sua u Abɛli, Kaɛnin wɔnɔ mara. Abɛli wiya u ra yãanu kpare, Kaɛni maa kua gbee wuko. 3Sɔ̃ɔ mɛɛrun biru, Kaɛni u ka win kɛ̃ru na Yinni Gusunɔn mi, te ta sãa win gberun dĩanu. 4Ma Abɛli maa ka wigiru na te u gɔsa saa win yaa sabenun bii gbiikinun di ni nu bɔɔru. Yinni Gusunɔ u ka Abɛli nɔni geu mɛɛra ma u win kɛ̃ru mwa. 5Adama u ǹ ka Kaɛni nɔnu geu mɛɛra, u ǹ maa win kɛ̃ru mwɛ. Ma Kaɛni u mɔru bara sere win wuswaa burisina. 6Yera Yinni Gusunɔ u Kaɛni bikia u nɛɛ, mban sɔ̃na a mɔru bare, mban sɔ̃na wunɛn wuswaa burisinɛ. 7Geema, à n gea mɔ̀, wunɛn bwɛ̃ra ko n kpĩ. Ǹ n maa kɔ̃san na a mɔ̀, durum ya kpĩ wunɛn dii kɔnnɔwɔ nge yaa gɔba ya nun mara. Adama a de a ye kamia. 8Sɔ̃ɔ teeru Kaɛni u win wɔnɔ Abɛli sɔ̃ɔwa u nɛɛ, su da gberɔ. Sanam mɛ ba wãa mi, yera u win wɔnɔ wi sɛ̃re u go. 9Ma Yinni Gusunɔ u da Kaɛnin mi, u nùn bikia u nɛɛ, mana wunɛn wɔnɔ Abɛli u wãa. U wisa u nɛɛ, na yɛ̃ ro? Nɛna na nɛn wɔnɔn kɔ̃so? 10Ma Yinni Gusunɔ u kpam nɛɛ, mba a kua mi. Wunɛn wɔnɔn yɛm mɛ mu yari temɔ, mu nɛn laakari seeye. 11Tɛ̃ kaa ko bɔ̃ruro n kere tem mɛ a dera mu wunɛn wɔnɔ win yɛm nɔra. 12À n tem mɛ wuka, mu ǹ maa nun dĩanu kuammɛ sãa sãa. Kaa n sãawa kpiko ka yaayaare kowo handunia sɔɔ. 13Yera Kaɛni u Yinni Gusunɔ sɔ̃ɔwa u nɛɛ, wee, a man sɛɛyasiamɔ bi bu man kere. 14A man gire gisɔ tem mɛn di. Na dɔɔ na n kukua mi n toma wunɛn min di, kpa na n sãa kpiko na n yaayaare mɔ̀ handunia sɔɔ. Wi u man wa kpuro, kpa u man go. 15Adama Yinni Gusunɔ u nùn sɔ̃ɔwa u nɛɛ, aawo, n ǹ mɛ. Goo ù n nun go, kon yɛ̃ro mɔru kɔsiawa tia tian nɔn nɔɔba yiru. Ma u Kaɛni yĩreru koosi, wi u nùn wa u ku ka nùn gon sɔ̃. 16Ma Kaɛni u doona n toma Yinni Gusunɔn min di, u da u sina Edɛnin sɔ̃ɔ yari yerun bera gia, Nɔduɔ. Yĩsi ten tubusiana yaayaaren tem. 17Yen biru Kaɛni ka win kurɔ ba mɛnna ma kurɔ wi, u gura sua u Enɔku mara. Ma Kaɛni u wuu gagu bana u gu soka Enɔku nge win biin yĩsiru. 18Enɔku wi, u Iradi mara, Iradi maa Mɛhuyaɛli mara. Mɛhuyaɛli u Mɛtusaɛli mara ma Mɛtusaɛli u Lemɛki mara. 19Lemɛki wi, u kurɔbu yiru sua. Turon yĩsira Ada, turogira maa Sila. 20Ada u Yabali mara. Wiya u sãa be ba wãa kunɔ ba yaa sabenu kparamɔn baaba. 21Win wɔnɔn yĩsira Yubali. Wiya maa sãa be ba ra mɔrɔkunu ka guunu so kpuron baaba. 22Sila wi maa, u Tubali Kaɛni mara wi u ra dendi yãnu kpuro seku ye n sãa sisu ka sii gandu. Win sesun yĩsira Naama. 23Yera Lemɛki u win kurɔbu sɔ̃ɔwa u nɛɛ, i man swaa dakio, bɛɛ nɛn kurɔbu, Ada ka Sila. Na tɔnu go bɛɛn sɔ̃ yèn sɔ̃ u man mɛɛra kua. 24Bà n wi u Kaɛni go mɔru kɔsia nɔn nɔɔba yiru, ba koo nɛ Lemɛki mɔru kɔsia nɔn wata ka wɔkura nɔɔbu ka yiru. 25Adamu ka win kurɔ Efa ba mɛnna kpam, ma Efa u gura sua u bii tɔn durɔ mara u nùn yĩsiru kã Sɛti. U nɛɛ, domi Yinni Gusunɔ u kpam man bii tɔn durɔ kã u kua Abɛlin kɔsire, wi Kaɛni u go. 26Sɛtin tii, u bii tɔn durɔ mara ma u nùn yĩsiru kã Enɔsi. Sanam mɛ sɔɔra tɔmba Yinni Gusunɔ sãaru torua.

will be added

X\