Torubu 39

1Isimɛɛliba ba ka Yosɛfu da Egibitiɔ. Ma Potifaa Egibitigii u nùn dwa ben mi. Potifaa wi, u sãawa Egibiti sunɔn sina kpaa kɔ̃sobun wirugii. 2Yinni Gusunɔ u wãa ka Yosɛfu, ma u nùn kua tɔn barukagii. U wãa win yinni Egibitigiin yɛnuɔ. 3Yinni wi, u wa ma Yinni Gusunɔ u ka nùn wãa, ma u maa nùn swaa kusiammɛ yabu baayere sɔɔ ye u mɔ̀. 4Yen sɔ̃, u ka nùn nɔnu geu mɛɛra u nùn kua win yɛnun sɔm kowobu kpuron wirugii, ma win ye u mɔ kpuro u nùn nɔmu sɔndia. 5Saa mìn di u Yosɛfu kua win yɛnun sɔm kowobu kpuron wirugii ma u nùn ye u mɔ kpuro nɔmu sɔndia, Yinni Gusunɔ u win yɛnu ge domaru kua ka ye u mɔ kpuro yɛnuɔ ka gberɔ. 6Potifaa wi, u ye u mɔ kpuro deri Yosɛfun nɔma sɔɔ. U ǹ maa yen gaan gari yɛ̃ ma n kun mɔ win dĩa ni u koo doke nɔɔwɔ baasi. N wee Yosɛfu durɔ burɔwa. Win wasi ka win wuswaa girima mɔ. 7Yera sɔ̃ɔ teeru win yinnin kurɔ u nùn nɔni girari ma u nɛɛ, a de a ka man kpuna. 8Adama Yosɛfu u yina. U kurɔ wi sɔ̃ɔwa u nɛɛ, n wee, nɛn yinni u ǹ yɛnun gãanun gari yɛ̃. Win ye u mɔ kpuro, nɛna u nɔmu sɔndia. 9U ǹ man dam kere yɛnu ge sɔɔ, u ǹ maa man gãanu yinari ma n kun mɔ wunɛ tɔna yèn sɔ̃ a sãa win kurɔ. Yera kon gãa ninin bweseru ko kpa n Gusunɔ torari? 10Baadommawa kurɔ wi, u ra n ka nùn gari yi mɔ̀. Ka mɛ, Yosɛfu u yina u ka nùn kpuna. U ku ra mam kã ba n wãa sannu. 11Sɔ̃ɔ teeru Yosɛfu u dua dirɔ u ka win sɔmburu ko. N deema yɛnu gen tɔnu goo sari turuku. 12Yera kurɔ wi, u Yosɛfun bekuru nɛnua u nɛɛ, a ka man kpunɔ. Yosɛfu u nùn beku te deria u duka yara tɔɔwɔ. 13Ye kurɔ wi, u wa ma u nùn beku te deria u duka yara tɔɔwɔ, 14yera u win yɛnugibu soka u nɛɛ, i na i wa. Heberu wi nɛn durɔ ka na u sun kam mɛɛra. U kĩ u ka man kpuna adama na wura kua tãa tãa. 15Ye u nua na wura kua mɛ, u man win bekuru deria u duka yara tɔɔwɔ. 16Ma kurɔ wi, u beku te yii yeru kua sere win yinni u ka wurama yɛnuɔ. 17Sanam mɛ u wurama mi, kurɔ wi, u nùn sɔ̃ɔwa u nɛɛ, yoo Heberu wi a ka sun naawa mi, u man duwi u ka man sanku. 18Ye na wura kua, yera u man win bekuru deria u duka yara tɔɔwɔ. 19Ye durɔ wi, u win kurɔn gari yi nua, yera u mɔru bɛsira. 20Ma u Yosɛfu sua u doke pirisɔm dirɔ mi ba ra sunɔn pirisɔmba doke. Miya u wãa. 21Adama Yinni Gusunɔ u wãa ka wi. U maa nùn domaru kua u dera u kĩi geeru wa pirisɔm kɔ̃sobun wirugiin mi. 22Ma wirugii wi, u nùn pirisɔm be ba wãa mi kpuro nɔmu sɔndia. Ye ba koo ko kpuro, wiya ra yen wooda wɛ̃. 23Wirugii wi, u ku ra mɛɛri ye Yosɛfu u mɔ̀ domi Yinni Gusunɔ u wãa ka wi. Ma u dera win ye u kua kpuro ya wɛ̃ra.

will be added

X\