Torubu 38

1Yen biru Yuda u win maabu ka wɔnɔbu deri u da Hiran mi, Adulamuɔ. 2Miya u Kananin wɔndia bii goo wa wìn tundo ba mɔ̀ Sua. Ma u nùn sua kurɔ, ba mɛnna. 3Kurɔ wi, u gura sua u bii tɔn durɔ mara, ma ba bii wi yĩsiru kã Eru. 4U maa wure u gura sua u bii tɔn durɔ mara, ma ba nùn yĩsiru kã Onani. 5Ye u Onani sarasia, u kpam wure u gura sua u bii tɔn durɔ mara, ma ba nùn yĩsiru kã Sela. Saa yè sɔɔ kurɔ wi, u Sela mara, Yuda u ǹ wãa mi. U da u wãawa Kisibuɔ. 6Eri, Yudan bii gbiikoo wi, u kpɛ̃a ma win tundo u nùn kurɔ kasua. Kurɔ win yĩsira Tamaa. 7Ye Yinni Gusunɔ u wa ma Eri u sãa tɔn kɔ̃so, ma u dera u gu. 8Saa ye sɔɔra Yuda u Onani sɔ̃ɔwa u nɛɛ, a wunɛn mɔɔn kurɔ suo a yɛnu doke kpa a nùn bweseru kasua nge mɛ wooda ya gerumɔ. 9Onani u wa ma kurɔ wi, ù n mara, bii be, ba ǹ ko n sãa wigibu. Yera ù n ka nùn mɛnnamɔ u ku ra wure u tii wa kurɔ wi sɔɔ, u ku ka win mɔɔ bibu maruan sɔ̃. 10Ye Onani u mɔ̀ mi, ya ǹ Yinni Gusunɔ dore. Yen sɔ̃na u maa dera u gu. 11Yera Yuda u Tamaa sɔ̃ɔwa u nɛɛ, a doo a gɔminiru di sere nɛn bii Sela ù n kpɛ̃a. Domi u tii sɔ̃ɔwa u nɛɛ, Sela ù n kurɔ wi sua, u koo ra maa gbi nge win maabu. Ma Tamaa u doona u da u wãa win tundon yɛnuɔ. 12Sanam dɔɔ sanam wee, Yudan kurɔ Suan bii u gu. Ye Yuda u yen gɔminiru di u kpa, win bwɛ̃ra wurama, yera ba da Tinnaɔ wi ka win bɔrɔ Hira Adulamugii wi. Miya ba Yudan yãanun sansu bɔɔrimɔ. 13Yera goo u da u Tamaa sɔ̃ɔwa u nɛɛ, wee wunɛn dwaa tundo u dɔɔ Tinnaɔ u ka win yãanun sansu bɔɔri. 14Ye u nua mɛ, yera u win gɔmini yãnu pota, ma u tii sɔnditia wukiri nge kurɔ tanɔ, u da u sina wuu ge ba mɔ̀ Enaimun kɔnnɔwɔ Tinnan swaaɔ. Domi u wa Sela u kpɛ̃a, ba ǹ maa nùn wi wɛ̃ durɔ. 15Ye Yuda u sarɔ u nùn wa u sɔ̃ mi, ma u nùn garisi kurɔ tanɔ yèn sɔ̃ u win wuswaa sɔnditia wukiri. 16Ma u susi win bɔkuɔ u ka nùn gari kua u nɛɛ, su da wunɛn yɛnuɔ n ka nun kpuna. Domi u ǹ yɛ̃ win biigii kurɔwa. Ma kurɔ wi, u nùn wisa u nɛɛ, mba kaa man kɛ̃ à n ka man kpuna. 17Ma Yuda u nɛɛ, kon de bu ka nun boo kpɛmu naawa. Kurɔ wi, u nɛɛ, ǹ n mɛn na, a man gãanu tɔruba yiiyo sere à n boo ge mɔrisiama. 18- 19Yuda u nùn wisa u nɛɛ, mba a kĩ n nun tɔruba yiiya. Ma u nɛɛ, a man wunɛn taabu ge ga wunɛn yĩreru mɔ ka gen wɛ̃ɛ ka dɛka ye a nɛni wɛ̃ɛma. Yera u ye kpuro kurɔ wi wɛ̃, ma u da u ka nùn kpuna. Yen biru kurɔ wi, u seewa u doona. U da u sɔnditia ye wuna ma u maa win gɔmini yãa ni doke. Amɛn biru u deema wee, u gura mɔ. 20Yuda u win bɔrɔ Hira Adulamugii wi gɔra u ka boo ge kurɔ wi daawa, kpa u win yãa ni u tɔruba yii mi mwaama. Adama ye u tura mi, u ǹ kurɔ wi wa. 21Yera u yam min tɔmbu bikia u nɛɛ, mana kurɔ tanɔ wi u raa wãa Enaimun kɔnnɔwɔ swaa sɔɔ mini. Ma ba nùn wisa ba nɛɛ, kurɔ tanɔ goo sari mini. 22Yera u gɔsira Yudan mi, u nɛɛ, na ǹ kurɔ wi wa. Yam min tɔmbu ba maa nɛɛ, kurɔ tanɔ goo sari ben wuu mi. 23Yuda u nɛɛ, ǹ n mɛn na, u nɛnuɔ, ye u wa kɔ. Wee, na ka nun boo kpɛmu ge gɔra win mi, a ǹ maa nùn wa. Yen sɔ̃, su ku de bu sun yɛ̃ɛ. 24Suru itan biru ba na ba Yuda sɔ̃ɔwa ba nɛɛ, wunɛn biigii kurɔ Tamaa u kurɔ tanaru dimɔ sere u mam ten gura sua. Ma Yuda u nɛɛ, bu nùn yaro wuun di bu dɔ̃ɔ mɛni. 25Sanam mɛ ba ka nùn yariɔ wuun di, yera u gɔra bu Yuda taabu ge ka gen wɛ̃ɛ yi ka dɛka ye sɔ̃ɔsi, kpa bu nùn sɔ̃ ma wi u ye kpuro mɔ, yɛ̃ron gura u mɔ. 26Ye ba ka yãa ni tura, Yuda u nu gia ma u nɛɛ, kurɔ wi, u man gem kere, domi na yina n nùn nɛn bii Sela wɛ̃ durɔ. Yen biru Yuda kun maa ka nùn mɛnnare. 27Sanam mɛ kurɔ wi, u marubu tura yera ba wa ma sikabara ba wãa win nukurɔ. 28Ye u yiire, yera bii ben turo u nɔma yarama, ma marusio u nɔmu ge sɔɔ wɛ̃ɛ wunɔmgii gbinisi u nɛɛ, winiwa koo gbi u yarima. 29Adama u nɔmu ge wesia, ma wi u kun daa nɔma yare mi, u gbia u yarima. Yera marusio u nɛɛ, anna a ka tii swaa kɛnia mɛ! Yen sɔ̃na ba nùn yĩsiru kã Perɛsi. Yen tubusiana, swaa kɛniɔ. 30Yen biruwa wi ba wɛ̃ɛ wunɔmgii gbinisi mi, u yarima. Ma ba nùn yĩsiru kã Seraki.

will be added

X\