Torubu 37

1Yakɔbu u sina Kananin temɔ mi win tundo u raa sina. 2Win bibun gari wee. Ye Yosɛfu u kua wɔ̃ɔ wɔkura nɔɔbu ka yiru, u yaa sabenu kparamɔ ka win maabu. U ra n wãawa ka win tundo turosibu, Biliha ka Silipan bibu sannu. Yera u ra ben tundo dɔmɛyɛ daa kɔ̃sa ye win maa be, ba mɔ̀. 3N deema Yakɔbu wi ba maa mɔ̀ Isireli u Yosɛfu kĩ n win bii be ba tie kpuro kere, yèn sɔ̃ tɔkɔru sɔɔra u nùn mara. Ma u nùn tako nɔni bwese bwesekagia kua. 4Ye win maaba wa ben tundo u nùn kĩ n be kpuro kere, yera ba nùn tusiru seewa. Ba ku ra kpĩ bu ka nùn kĩru gari sɔ̃. 5- 7Sɔ̃ɔ teeru Yosɛfu u dosa. Yera u win maabu dosu ge saaria. U bu sɔ̃ɔwa u nɛɛ, i swaa dakio n bɛɛ nɛn dosu sɔ̃. Doo bɔka sa bɔkumɔ gberɔ, yera nɛn doo bɔkuru ta seewa ta yɔ̃ra, ma bɛɛginu na nu tu sikerena nu tu kpunammɛ. Ye ba win gari nua yera ba nùn tusiru sosi 8ba nɛɛ, wuna a tamaa kaa ko bɛsɛn sunɔ kpa a n sun kpare? Ma ba kpam nùn tusa ba sosi win dosu ka win garin sɔ̃. 9Yen biru u kpam dosu gagu kua u gu win maabu saaria u nɛɛ, wee na kpam dosa na wa sɔ̃ɔ ka suru ka kperi wɔkura tia man kpunammɛ. 10U maa gu win tundo sɔ̃ɔwa. Ma win tundo u nùn gerusi u nɛɛ, mba wunɛn dosu genin tubusianu. Nɛ ka wunɛn mɛro ka wunɛn maabu sa ko na su nun kpunawa? 11Win maaba ka nùn nisinu nɛni, adama win tundo u ye kpuro lasabu mɔ̀ win gɔ̃ruɔ. 12Sɔ̃ɔ teeru Yosɛfun maaba ka ben tundon sabenu kɔsɔru da Sikɛmuɔ. 13Ma Isireli u Yosɛfu sɔ̃ɔwa u nɛɛ, n ǹ Sikɛmu gia wunɛn maaba kɔsɔru da? A na n nun gɔri ben mi. Yosɛfu u nɛɛ, too. 14Ma Isireli u nɛɛ, a doo a mɛɛri bà n bwãa do kpa a wa sabenu nù n maa alafia mɔ, kpa a wurama a man sɔ̃. Nge mɛya u ka Yosɛfu gɔra Sikɛmuɔ saa Heboronin di. 15Sanam mɛ u sirenɛ gbabu te sɔɔ, yera durɔ goo u ka nùn yinna u nùn bikia u nɛɛ, mba a kasu. 16Yosɛfu u nɛɛ, nɛn maaba na kasu. A gem mɔ a man sɔ̃ɔwɔ mi ba ben sabenu kparamɔ. 17Durɔ wi, u nɛɛ, ba doona minin di. Domi na nua ba nɛɛ, bu doona Dotani gia. Ma Yosɛfu u win maabu naa gira u bu deema Dotaniɔ. 18Ye ba nùn wa sarun di, u sere turi ben mi, ba wesiana kɔ bu ka nùn go. 19Ba sɔ̃ɔna ba nɛɛ, bɛsɛn dosusugii wee u sisi. 20I de su nùn go tɛ̃ su kpɛ̃ɛ dɔkɔ kpiri ninin teeru sɔɔ, kpa su nɛɛ, yaa kɔ̃sa gaa ya nùn tema, kpa su wa mɛ win dosu si, su koo ka koora. 21Ye Rubɛni u nua mɛ, u kasu u nùn faaba ko. Ma u nɛɛ, i ku de su nùn go. 22I nùn kpɛ̃ɛyɔ dɔkɔ kpiri teni sɔɔ gbaburu mi. Adama i ku nùn nɔma doke. N deema Rubɛni u bwisikumɔ u nùn wɔra ben nɔman di kpa u nùn gɔsia ben tundon mi. 23Saa ye Yosɛfu u tunuma ben mi, ba nùn win tako nɔni bwese bwesekagia ye potari. 24Ma ba nùn sua ba kpɛ̃ɛ dɔkɔ kpiri te sɔɔ, te ta ǹ nim mɔ. 25Yen biru ba sina ba dimɔ. Ye ba nɔni seeya ba tenku wuuru garu wa be ba sãa Isimɛɛliba ba swĩinɛ ba wee Galadin di ba ben yooyoosu turare ka gum sawaram ka tim mɛ ba ra soku miru sɔbi ba ka dɔɔ Egibiti gia. 26Ma Yuda u win maabu ka wɔnɔbu sɔ̃ɔwa u nɛɛ, arufaani yerà sa ko wa sà n bɛsɛn wɔnɔ go sa tii marisi. 27I na su da su nùn Isimɛɛliba dɔre, su ku nùn nɔma doke. U sãawa bɛsɛn yɛm domi bɛsɛn wɔnɔwa. Ma ba win gari wura. 28Ye Isimɛɛli be, be ba sãa Madianin temgibu, ba sarɔ, yera Yosɛfun maaba nùn gawa ba yara dɔkɔ kpiri ten min di ba nùn Isimɛɛli be dɔre ka sii geesun gobi yɛndu, ma ba ka nùn doona Egibitiɔ. 29Ma Rubɛni u wurama dɔkɔ kpiri ten mi, u deema wee, Yosɛfu kun maa wãa mi. Yera u win tiin yaberu nɛnua u karana nuku sankiranun sɔ̃. 30Ma u gɔsira u wigibu deema u nɛɛ, bii wi kun maa wãa mi ni! Nɛn wãaru! Mana kon du! 31Sanam mɛya ba boo kinɛru go ma ba Yosɛfun yaberu sua ba ka tu boo gen yɛm tɛɛra. 32Yera ba goo gɔra ben tundon mi ka tako nɔni bwese bwesekagia ye, u nùn sɔ̃ u nɛɛ, u mɛɛrio ye ba wa. Win biin yabera mi? Nge n ǹ te. 33Ye u tura mi, Yakɔbu u yabe te tuba. Ma u nɛɛ, nɛn biin yabera mi. Gbeeku yaa ya nùn kasuka ya tema. 34Yera u win tiin yaberu nɛnua u karana ma u saaki sua u deewa nuku sankiranun sɔ̃. U win biin gɔɔ wooru sina sɔ̃ɔ dabi dabinu. 35Win bii tɔn durɔbu ka tɔn kurɔbu kpuro ba na bu ka nùn nukuru yɛmiasia, adama u yina u ben goon gari nɔ. U nɛɛ, u koo win biin gɔɔ swĩwa sere u ka nùn naamwɛ gɔriɔ. Ma u gɔɔ wi swĩ n ka tɛ. 36Saa ye sɔɔ, Madiani be, ba tura Egibitiɔ, ma ba Yosɛfu Potifaa dore wi u sãa Egibiti sunɔn sina kpaa kɔ̃sobun wirugii.

will be added

X\