1 N deema waa ya bwisi bo gbeeku yɛɛ kpuro sɔɔ yi Yinni Gusunɔ u taka kua. Yera ya na kurɔ win mi, ya nùn bikia ya nɛɛ, ka gem Gusunɔ u nɛɛ, i ku gbaa tenin dãa binu kpuro di? 2 Ma kurɔ wi, u ye wisa u nɛɛ, sa ra gbaa ten dãa binu di ni, 3 ma n kun mɔ te ta wãa suunu sɔɔ. Tera u nɛɛ, su ku mam ten binu baba su sere di su ku ka gbin sɔ̃. 4 Yera waa ye, ya kurɔ wi wisa ya nɛɛ, i ǹ gbimɔ pai! 5 Domi Gusunɔ u yɛ̃ dɔma te i ten binu di, bɛɛn nɔni koo wukiarawa kpa i n sãa nge win tii, i n gea ka kɔ̃sa yɛ̃. 6 Ma kurɔ wi, u wa dãa te, ta ka dii dobu weenɛ ta waabu wã, ta koo maa kpĩ tu nùn ko bwisigii. Ma u ten bii ni sɔra u di. U maa win durɔ wɛ̃ ka wi ba wãasinɛ, ma wi, u maa di. 7 Yera be yiru kpuron nɔni wukiara ba gia ma terera ba wãa. Ma ba da ba dãa te ba mɔ̀ figien wuru bakasu bura ba swɛɛna ba ka tii gandi. 8 Ye ba Yinni Gusunɔn nɔɔ nua u bɔsu gbaa te sɔɔ yoka, yera ba da ba nùn kukue gbaa ten dãnun suunu sɔɔ. 9 Adama Yinni Gusunɔ u durɔ wi soka u nɛɛ, mana a wãa. 10 Durɔ wi, u wisa u nɛɛ, ye na wunɛn nɔɔ nua gbaaru sɔɔ, bɛrum man mwa domi terera na wãa, ma na kukua. 11 Gusunɔ u nɛɛ, wara nun sɔ̃ɔwa ma terera a wãa. Nge a dãa ten binu diwa te na nɛɛ, a ku di. 12 Durɔ wi, u nɛɛ, kurɔ wi a man wɛ̃ u n ka man wãa wiya man dãa ten binu wɛ̃ ma na di. 13 Ma Yinni Gusunɔ u kurɔ wi bikia u nɛɛ, mban sɔ̃na a kua mɛ. Ma u wisa u nɛɛ, waa ya man kɔkura na ka di. 14 Yinni Gusunɔ u waa ye sɔ̃ɔwa u nɛɛ, yèn sɔ̃ a kua mɛ, a kua bɔ̃rura n yɛɛ kpuro kere. Wunɛn nukura kaa n da ka kabiri. Tema kaa n da di sere ka wunɛn wãarun nɔrɔ. 15 Na kon maa yibɛrɛ tɛɛru doke wunɛ ka kurɔ win baa sɔɔ, ka maa wunɛn bweseru ka win bweserun baa sɔɔ. Win bweserun goo u koo nun wiru kɔra, kaa maa win naa tokuru mɛɛra ko. 16 Yera u maa kurɔ wi sɔ̃ɔwa u nɛɛ, kon wunɛn guran wahala sosi. Kaa n da mawa ka nɔni swãaru. Wunɛn kĩru kpuro ta ko n wãawa wunɛn durɔ sɔɔ, wiya ko n maa sãa wunɛn wirugii. 17 U maa durɔ wi sɔ̃ɔwa u nɛɛ, yèn sɔ̃ a wunɛn kurɔn gari wura, ma a dãa ten binu di te na nɛɛ, a ku di, na tem bɔ̃rusi wunɛn sɔ̃. Sãkunu ka awĩiya mu koo nun kpiiya, wunɛn wãaru kpuro sɔɔ, nɔwiawa kaa n da ko kpa a wɛnya a sere wunɛn dĩanu wa gberɔ. Yen biru kaa gbi kpa bu nun sike temɔ, domi tema na ka nun kua. Kaa maa wura a ko tem mɛ. 20 Ma Adamu u win kurɔ yĩsiru kã Efa, domi wiya u sãa tɔmbu kpuron mɛro. 21 Ma Yinni Gusunɔ u Adamu ka win kurɔ yaa gɔnan yabenu kua u bu sebusia. 22 Ma Yinni Gusunɔ u nɛɛ, wee tɔnu wi, u kua nge mɛ na sãa, u gea ka kɔ̃sa gia. Tɛ̃ na ǹ kon de u dãa bii ni nu koo nùn wãaru wɛ̃ sɔri u di u n ka wãa ka baadommaɔ. 23 Yera u nùn gira Edɛnin gbaa ten min di u da u tem wuku mɛ u ka nùn mɔma. 24 Nge mɛya u ka Adamu gira ma u wɔllun kɔ̃sobu doke Edɛnin gbaa ten kɔnnɔwɔ, ge ga wãa sɔ̃ɔ yari yerun bera gia. Ba takobi nɛni ba ye fĩamɔ ma ya ballimɔ sɔ̃ɔ sɔɔ nge dɔ̃ɔ yara, ba ka dãa tèn binu nu koo tɔnu wãaru wɛ̃ kɔ̃su.
