Torubu 25

1Saaraan gɔɔn biru Aburahamu u maa kurɔ sua. Kurɔ win yĩsira Ketura. 2Kurɔ wi, u Aburahamu bibu nɔɔba tia marua. Bera Simurani ka Yokusani ka Mɛdani ka Madiani ka Yisibaku ka Sua. 3Ma Yokusani u seewa u Seba ka Dedani mara. Dedanin bibun bwesera Asuriba ka Letusiba ka Lumiba. 4Madiani u maa seewa u bibu mara. Bera Efa ka Efɛɛ ka Enɔku ka Abida ka Ɛlida. Beni kpurowa ba sãa Keturan bibu ka win nikurɔminu. 5Adama ye Aburahamu u mɔ kpuro, Isaki turowa u wɛ̃. 6Ma u win kurɔ be ba tien bibu kɛ̃nu kã kã. Yen biru u bu gira Isakin min di, ba da sɔ̃ɔ yari yerun bera gia. 7- 8Aburahamu u tɔkɔ kua kɔ̃ɔ kɔ̃ɔ, u kuawa wɔ̃ɔ wunaa wata ka wɔkura nɔɔbu (175) ma u kpuna u gu. 9Yera win bibu Isaki ka Isimɛɛli ba na ba nùn sikua Makpelan kpee wɔruɔ Eforoni Sokaan biin gberɔ, Manden deedeeru. Eforoni wi, u sãawa Hɛti. 10Aburahamun tiiwa u gbee te dwa Hɛtiban mi. N deema miya ba raa win kurɔ Saaraa sikua. 11Aburahamun gɔɔn biru Gusunɔ u win bii Isaki domaru kua. Saa ye sɔɔ, u wãawa dɔkɔn bɔkuɔ ye ba mɔ̀ Gusunɔ u man waamɔ. 12Isimɛɛlin bibun bweseru wee. Isimɛɛli u sãawa Aburahamun bii wi u ka Agaa Egibitigii mara. Agaa wi, u sãawa Saaraan yoo wi u Aburahamu wɛ̃ kurɔ. 13Isimɛɛli wiya u seewa u bibu mara. Ben yĩsa wee nge mɛ ba bɔm wɛ̃ɛna. Nɛbayɔtuwa u sãa win bii gbiikoo. Nɛbayɔtun wɔnɔba Kedaa ka Adibɛli ka Mibusamu 14ka Mikima ka Duma ka Masa 15ka Hadadi ka Tema ka Yeturi ka Nafisi ka Kɛdima. 16Ma be wɔkura yiru yen baawure u kua win bwese kɛran wirugii. Ben tiin yĩsa ba ben wusu kã ka ben gberu kpaanɛba. 17Isimɛɛli u kuawa wɔ̃ɔ wunaa teeru ka wɔkura nɔɔbu ka yiru. Yen biru u kpuna u gu u win baababa deema gɔriɔ. 18Win bibu ba wãawa nɛnɛm ba ka Aburahamun bii be ba tie tondinɛ. Ba da ba sina Hafila ka Surin tem baa sɔɔ Egibitin tem sɔ̃ɔ yari yeru gia, Asirin swaaɔ. 19Aburahamun bii Isakin bibun bweseru wee. 20Ye Isaki u kua wɔ̃ɔ weeru yera u Rebeka sua kurɔ. Rebeka u sãawa Labanin sesu. Ben baawa Bɛtuɛli Aramugii. Ben wuuwa maa Padan Aramu. 21Isaki u Yinni Gusunɔ kana win kurɔn sɔ̃ domi u kua wĩro. Gusunɔ u win kanaru mwa, ma win kurɔ Rebeka u gura sua. 22Yera biba kuru karanamɔ win nukurɔ. Ma u nɛɛ, mban sɔ̃na yenin bwesera man deema. Ma u Gusunɔ bikia, mba yenin tubusianu. 23Yera Yinni Gusunɔ u nùn sɔ̃ɔwa u nɛɛ, bwesenu yiruwa nu wãa wunɛn nukurɔ. Bwese ni, nu koo kabana sanam mɛ nu yara wunɛn nukurun di. Nin teera koo tensim dam kera. Mɔɔ wiya u koo win wɔnɔ wiru kpĩiya. 24Ye kurɔ win maru suru yiba, wee sikabara ba wãa win nukurɔ. 25Gbiikoo u yara ma win wasi sansu yiba, ma ba nùn yĩsiru kã Esau. 26Yen biru yiruse maa yarima. Win nɔma Esaun naa tokuru nɛni. Ma ba nùn yĩsiru kã Yakɔbu. Isaki u mɔwa wɔ̃ɔ wata sanam mɛ ba bu mara. 27Bii be, ba seewa ba kpɛ̃a. Esau u kua taaso geo, u ra n wãawa yakasɔ. Adama Yakɔbu u kuawa tɔn sɛ̃ɛ wi u ra n wãa yɛnuɔ. 28Isaki u Esau kĩru bo, domi u ra win taasorun yaa tem. Ma Rebeka u maa Yakɔbu kĩru bo. 29Sɔ̃ɔ teeru nge mɛ Yakɔbu u agbaara ye ya swɛ̃ri mɔ̀, yera Esau u wurama taaso gberun di ka wasira bakaru. 30Yera u Yakɔbu sɔ̃ɔwa u nɛɛ, a man yabu swãa ye sɔko n nɔ, domi na wasira too. Yen sɔ̃na ba Esau soka Edɔmu. Yen tubusiana tɔn swãɔ. 31Ma Yakɔbu u nɛɛ, a gina man wunɛn bii yerumarun tubi dɔreo. 32Esau u nɛɛ, n wee na gɔɔ dɔɔ. Mba nɛn yerumarun arufaani. 33Ma Yakɔbu nɛɛ, a bɔ̃ruo gina. Ma u bɔ̃rua ma u win yerumaru Yakɔbu dɔre. 34Saa yera Yakɔbu u pɛ̃ɛ ka agbaara yè sɔɔ u swii doke sua u Esau wɛ̃. Esau u di u nɔra ma u wigiru doona. Nge mɛya n kua u ka win yerumaru gɛma.

will be added

X\