Torubu 23

1Saaraa u kuawa wɔ̃ɔ wunaa teeru ka nɔɔba yiru (127) u sere gu. 2Heboroniɔwa u gu Kananin temɔ ma Aburahamu u na u win gɔɔ swĩ. 3N deema u ǹ win goo te sikum kpa. Yera u seewa u da Hɛtiban mi, u bu sɔ̃ɔwa u nɛɛ, 4bɛɛn tii i yɛ̃ ma nɛ sɔɔwa bɛɛn tem mi. Yen sɔ̃, i man tem dɔreo mi ko na n da nɛn tɔmbu sike kpa n da n nɛn kurɔ sike mi tɛ̃, na kun win goru mɛɛra mɛ. 5Ma Hɛti be, ba Aburahamu wisa ba nɛɛ, 6yinni, a bɛsɛn gari swaa dakio. Gusunɔ u nun kuawa sina bii bɛsɛn suunu sɔɔ. A wunɛn kurɔ sikuo bɛsɛn wìn siki wɔru ga nun wɛ̃re sɔɔ. Goo kun ka nun gu yinarimɔ. 7Yera Aburahamu u tɔn be yiira u bu bɛɛrɛ wɛ̃. 8U nɛɛ, ì n kĩ n nɛn kurɔ sike kpa na kun win goru mɛɛra, i Eforoni Sokaan bii sɔ̃ɔwɔ yèn bukata na mɔ, 9kpa u man Makpelan kpee wɔru ge ga wãa win gbee goorɔ deria kpa n nùn gobi kɔsia nge mɛ̀n nɔɔ u gerua, kpa gu ko nɛn siku yeru bɛɛn suunu sɔɔ. 10N deema Eforoni Hɛti wi, u sɔ̃ ka wuun wirugibu gbãra kɔnnɔwɔ mi ba ra sinɛ. Ma u Aburahamu wisa Hɛti be ka be ba dumɔ min nɔni biru u nɛɛ, 11aawo, nɛn yinni, na nun gbee te kãwa ka kpee wɔru ge ga wãa mi. A gu mɔɔ nɛn tɔmbu kpuron nɔni birɔ. A doo a wunɛn kurɔ sike mi. 12Ma Aburahamu u yiira tɔn ben wuswaaɔ 13u Eforoni sɔ̃ɔwa u nɛɛ, a maa nɛgii swaa dakio. Kon nun gbee ten gobi kɔsiawa. A yi mɔɔ kpa n nɛn kurɔ sike mi. 14Adama Eforoni u Aburahamu sɔ̃ɔwa u nɛɛ, 15nɛn yinni, a swaa dakio a nɔ. Mba sii geesun gobi nɛɛru (400) ya tura nɛ ka wunɛn baa sɔɔ. A wunɛn kurɔ sikuo kperu mi. 16Aburahamu u Eforonin gari yi wura, ma u sii geesun gobi nɛɛ te sua u Eforoni wɛ̃ Hɛtiba kpuron nɔni biru. Sii geesun gobi yira tenkuba ba ra ka kiaru dwe saa ye sɔɔ. 17Nge mɛya Eforonin gbee te ka ten kpee wɔru ge ka ten dãa ni nu wãa mi kpuro 18ya kua Aburahamugia Hɛtiba kpuron nɔni biru ka sere be ba maa dumɔ gbãra kɔnnɔn min di. 19Yen biruwa Aburahamu u win kurɔ Saaraa sikua Makpelan kpee wɔru ge sɔɔ Manden deedeeru Heboroniɔ Kananin temɔ. 20Nge mɛya gbee te Aburahamu u dwa Hɛti win mi, ka kpee wɔru ge, n ka kua win tɔmbun siku yeru.

will be added

X\