Torubu 21

1Yinni Gusunɔ u yaaye ye u raa Saaraa sɔ̃ɔwa. U maa win nɔɔ mwɛɛru yibia. 2Saaraa u gura sua ma u Aburahamu bii tɔn durɔ marua win tɔkɔru sɔɔ, saa ye Gusunɔ u raa nùn bura. 3Aburahamu u bii wi yĩsiru kã Isaki. 4Ye Isaki kua sɔ̃ɔ nɔɔba ita u nùn bango kua nge mɛ Gusunɔ u raa nùn wooda wɛ̃. 5Aburahamu mɔwa wɔ̃ɔ wunɔbu (100) sanam mɛ ba win bii Isaki mara. 6Saa ye sɔɔra Saaraa nɛɛ, Gusunɔ u man yɛ̃ɛsu go. Be ba maa nua kpuro ba koo ka man yɛ̃ɛwa. 7U kpam nɛɛ, wara koo raa Aburahamu sɔ̃ ma nɛ Saaraa kon bii bɔm kɛ̃. Wee tɛ̃ na nùn bii tɔn durɔ marua win tɔkɔru sɔɔ. 8Bii wi, u kpɛ̃a ma ba nùn bɔm kara. Yera Aburahamu u yaa dii bakabu kua dɔma te. 9Ye Saaraa wa ma bii wi Agaa Egibitigii wi, u Aburahamu marua u Isaki yɛ̃ɛmɔ, 10yera u Aburahamu sɔ̃ɔwa u nɛɛ, a yoo wi giro ka win bii, domi win bii kun tubi dimɔ ka nɛn bii sannu. 11Gari yi, yi Aburahamu dua gem gem win bii Isimɛɛlin sɔ̃. 12Adama Gusunɔ u Aburahamu sɔ̃ɔwa u nɛɛ, a ku gari yi gɔburu wa wunɛn yoo wi ka win biin sɔ̃. A Saaraa kuo ye u nun bikia kpuro. Domi Isakin min diya bwese baka tèn nɔɔ mwɛɛru na nun kua ta koo yari. 13Kon maa de wunɛn yoo win bii u ko bweseru garun nuuru, domi wunɛn biiwa u sãa. 14Ye n kua sisiru Aburahamu u seewa buru buru yellu u dĩanu ka nim bwãaru sua u Agaa wɛ̃. U maa nùn bii wi nɔmu bɛria u nɛɛ, bu doo. Ma ba doona ba da ba tora gbaburɔ te ba ra soku Beri Seba. 15Ye bwãa ten nim mu kpa, yera u bii wi deri dãa piibu gagun saarɔ. 16Ma u da u sina n dɛsire n tura mi bà n sɛ̃u toba ga koo wen saka. Domi u nɛɛ, u ǹ kpɛ̃ u n win bii mɛɛra u n gbimɔ. Mi u sɔ̃ mi, ma u wura takana u swĩ. 17Gusunɔ u bii win nɔɔ nua ma win gɔrado u Agaa soka wɔllun di u nɛɛ, mba n nun mɔ̀, Agaa. A ku nanda, domi Gusunɔ u bii win nɔɔ nua mi u wãa. 18A seewo a da a nùn sua a kɔkiri domi kon nùn ko bwese bakarun nuuru. 19Saa yera Gusunɔ u kurɔ win nɔni wukia ma u dɔkɔ gaa wa mi. U da u bwãa te nim yibia u bii wɛ̃ u nɔra. 20- 21Gusunɔ u wãa ka bii wi, sanam mɛ u kpɛ̃amɔ. U wãa gbaburɔ te ba mɔ̀ Parani, ma u kua tɛn towo. Win mɛro maa nùn kurɔ sua Egibitin tem di. 22Saa ye sɔɔra Abimɛlɛki ka win tabu sunɔ wi ba mɔ̀ Pikoli ba na Aburahamun mi. Ba nùn sɔ̃ɔwa ba nɛɛ, sa wa ma Gusunɔ u wãa ka wunɛ ye a mɔ̀ kpuro sɔɔ. 23Yen sɔ̃, a bɔ̃ruo ka win yĩsiru ma a ǹ nɛ ka nɛn bibu ka nɛn debuminu bɔrɔ kɔ̃ɔ kom kuammɛ, kpa a nɛ ka nɛn tem mɛgibu durom kua nge mɛ na nun kua. 24Ma Aburahamu u nɛɛ, na wura, kon bɔ̃re. 25Adama u Abimɛlɛki gerusi dɔkɔ gaan sɔ̃ ye Abimɛlɛkin yobu ba nùn mwaari. 26Abimɛlɛki u nɛɛ, na ǹ yɛ̃ wi u yen bweseru kua. Mɛya wunɛn tii, a ǹ maa man sɔ̃ɔre ma n kun mɔ gisɔ. 27Ma Aburahamu u yãanu ka kɛtɛba sua u Abimɛlɛki wɛ̃, be yiru ba ka arukawani bɔkua. 28Ma Aburahamu u maa yãa gbiibi gɔsa nɔɔba yiru u yi nɛnɛm. 29Yera Abimɛlɛki u nùn bikia u nɛɛ, mba kaa ka yãa gbiibi nɔɔba yiru yeni ko. 30Aburahamu u nùn wisa u nɛɛ, a nu mɔɔ kpa nu n sãa seeda ma nɛna na dɔkɔ yeni gba. 31Yen sɔ̃na ba yam mi soka Beri Seba domi miya ba arukawani bɔkua ka bɔ̃ri. Yĩsi ten tubusiana dɔkɔ yèn nuurɔ ba bɔ̃rua. 32Ye ba arukawani bɔkua ba kpa, yera Abimɛlɛki ka win tabu sunɔ Pikoli ba gɔsira ba wura ben wuuɔ Filisitiban temɔ. 33Yen biru Aburahamu u dãru garu duura Beri Seba mi, ni nu ra saa bakaru ko. Ma u Yinni Gusunɔ sãwa mi. Yinni Gusunɔ wi, u ko n wãawa ka baadommaɔ. 34Aburahamu u sina Filisitiban tem mi, u tɛ.

will be added

X\