Torubu 2

1Nge mɛya Gusunɔ u ka wɔllu ka tem ka kpuro ye ya wãa sɔɔ taka kua u wiru go. 2Tɔ̃ru nɔɔba tiase sɔɔra u win sɔma ye u kua kpuro wiru go ma u wɛ̃ra tɔ̃ru nɔɔba yiruse. 3Ma u nɔɔba yiruse te yi nɛnɛm win sɔ̃, u tu domaru kua yèn sɔ̃ te sɔɔra u wɛ̃ra ye u kpuro taka kua u kpa. 4Sanam mɛ Yinni Gusunɔ u wɔllu ka tem taka kua, 5dãru gara kun gina kpia tem sɔɔ, yakasu gasu kun maa kpia domi Yinni Gusunɔ kun gina gura nɛɛsie sanam mɛ. Tɔnu maa sari wi u koo tem mɛ wuku. 6Adama kakoru garu ta ra se tem di tu tem mɛ nikererasia kpuro. 7Yen biruwa Yinni Gusunɔ u tɔnu mɔma ka tem u nùn wãarun wom wɛ̃sie win wɛ̃rɔ, ma tɔnu kua waso. 8Ma Yinni Gusunɔ u gbaaru kua Edɛniɔ sɔ̃ɔ yari yerun bera, ma u tɔnu wi u kua mi sua u doke sɔɔ. 9Ma u dãa bwese bweseka kpiisia te sɔɔ, ni nu waabu wã ka ni nu dim do, ka sere dãa tèn binu nu koo tɔnu wãaru wɛ̃, ka maa tèn binu nu koo tɔnu gea ka kɔ̃sa giasia. Dãnu yiru ye, nu wãawa gbaa ten suunu sɔɔ. 10Daaru gara wãa gbaa te sɔɔ, te ta tu nike nikeru sãa. Min diya ta yara ma ta kɛri kua nnɛ. 11Gbiikaan yĩsira Pisoni. Yeya ya tem mɛ ba mɔ̀ Hafila sikerenɛ. 12Tem mɛ sɔɔra wura gea wãa. Turare nubu durorugia maa wãa mi, ka kpee gobiginu. 13Kɛra yirusen yĩsira maa Gihoni. Yeya ya tem mɛ ba mɔ̀ Kusi sikerenɛ. 14Kɛra itasewa maa Tigiri. Yeya ya kokumɔ tem mɛ ba mɔ̀ Asirin sɔ̃ɔ yari yeru gia. Kɛra nnɛsewa maa Efarati. 15Ye Yinni Gusunɔ u gbaa te sɔɔru kua u kpa Edɛniɔ, yera u tɔnu wi sua u doke sɔɔ u ka tu wuku kpa u n tu kɔ̃su. 16Ma u nùn wooda yeni wɛ̃ u nɛɛ, kaa kpĩ a gbaa ten dãnu kpuron binu di. 17Adama dãa tèn binu nu koo tɔnu gea ka kɔ̃sa giasia, a ku ra ten binu di, domi dɔma te a nu di, kaa gbiwa. 18- 20Ka tema Yinni Gusunɔ u gbeeku yɛɛ kpuro kua ka gunɔsu kpuro, ma u ka ye kpuro na tɔnu win mi, u ka wa mɛ u koo ye yĩsiru kɛ̃. Ma tɔnu wi, u yaa sabenu kpuro ka gunɔsu ka gbeeku yɛɛ kpuro yĩsa kã. Yĩsi te tɔnu wi, u maa yaa baayere kã teya ba ka ye sokumɔ. Adama ye kpuro sɔɔ, sari ye ya ka nùn weenɛ ye ya koo nùn somi. Yen sɔ̃na Yinni Gusunɔ u nɛɛ, n ǹ wã tɔnu u n wãa wi turo. Kon nùn goo kua u n sãa nge wi, wi u koo nùn somi. 21Yera Yinni Gusunɔ u tɔnu wi dom mɔn bakaru kpɛ̃ɛ u dweeya. Ma u win yɛ̃san kuku teeru wuna ma u yɛ̃sa ye kɔrua ka yaa baasi. 22Ma u tɔn kurɔ taka kua ka tɔn durɔn kuku te, te u wuna. Ma u ka nùn na tɔn durɔ win mi. 23Yera durɔ wi, u nɛɛ, wee tɛ̃, wini u wasi mɔ nge nɛgii mam mam. Ba koo nùn sokuwa tɔn kurɔ, domi tɔn durɔn min diya u yara. 24Yen sɔ̃na durɔ u koo win tundo ka win mɛro deri kpa wi ka win kurɔ ba n maninɛ, kpa be yiru kpuro bu ko wasi tee. 25Saa ye sɔɔ, durɔ wi ka win kurɔ terera ba wãa. Sekura kun maa ben goo mɔ̀.

will be added

X\