Torubu 17

1Ye Aburamu kua wɔ̃ɔ wunɔbu tia sari yera Yinni Gusunɔ u nùn kure u nɛɛ, nɛna na Gusunɔ Dam kpurogii. A n sĩimɔ nɛn wuswaaɔ kpa a kun taarɛ mɔ. 2Kon ka nun arukawani bɔke kpa n wunɛn bweseru dabiasia gem gem. 3Yera Aburamu u yiira mii mii u wuswaa tem girari. Ma Gusunɔ u kpam ka nùn gari kua u nɛɛ, 4nɛn arukawani wee, ye na ka nun bɔkumɔ. Kon nun kowa bwese dabinun baaba. 5Ba ǹ koo maa nun soku Aburamu, ba koo nun sokuwa Aburahamu, ye ya gerumɔ bwese dabinun baaba. 6Kon de wunɛn bibu bu marura bu sosi sere ba ǹ garirɔ, kpa bwesenu ka sinambu bu kɔwara wunɛn min di. 7Kon wure n ka bɛɛ nɛn arukawani bɔke, wunɛ ka wunɛn bibu ka ben bweseru kpuro kpa na n sãa wunɛn Yinni ka wunɛn bweserun Yinni sere ka baadommaɔ. 8Kpa n wunɛ ka wunɛn bibun bweseru Kananin tem mɛ wɛ̃, mɛ̀ sɔɔ a wãa mi, a sɔru dimɔ. Mɛ kpuro mu koo ko begim sere ka baadommaɔ kpa na n sãa ben Yinni. 9Ma u kpam Aburahamu sɔ̃ɔwa u nɛɛ, i nɛn arukawani nɛnuɔ, wunɛ ka wunɛn bibun bweseru. A ku de bu ye duari wunɛn bweserɔ. 10Arukawani ye wee, ye na ka bɛɛ bɔkumɔ, ye i ko nɛnɛ wunɛ ka wunɛn bibun bweseru. I ko i tɔn durɔ baawure bango kua wi u wãa bɛɛn suunu sɔɔ. 11Kpa ya n sãa arukawani yen yĩreru ye ya wãa nɛ ka bɛɛn suunu sɔɔ. 12I n da bii tɔn durɔ baawure bango kue ù n sɔ̃ɔ nɔɔba ita tura. N ǹ mɔ be ba mara bɛɛn yɛnuɔ tɔna, ka maa be i ka gobi dwawa tɔn tukobun mi. 13I ko be kpuro bango kuawa kpa nɛn arukawani yen yĩreru ta n wãa bɛɛn wasi sɔɔ sere ka baadommaɔ. 14Tɔn durɔ wi ba ǹ bango kue, i ko i nùn wunawa wigibun min di i go. Domi u nɛn arukawani sanka. 15Gusunɔ u kpam Aburahamu sɔ̃ɔwa u nɛɛ, a ku maa wunɛn kurɔ soku Saarai. Saaraawa kaa n da nùn soku. 16Kon nùn domaru kua kpa u nun bii tɔn durɔ marua. Nɛn doma ten saabu bwese dabinu ka sinambu ba koo kɔwara win min di. 17Yera Aburahamu u Gusunɔ yiira mii mii u siriru tem girari u yɛ̃ɛ ma u gerua win tii sɔɔ u nɛɛ, ba koo maa tɔnu wɔ̃ɔ wunɔbugii bii marua? Saaraa wi u kua wɔ̃ɔ wɛnɛ ka wɔkuru mini, u koo bii ma? 18Yera u Gusunɔ sɔ̃ɔwa u nɛɛ, a de Isimɛɛlin sanu sanusu su nun wɛ̃re kpa u nɛn tubi di. 19Ma Gusunɔ u nɛɛ, aawo, wunɛn kurɔ Saaraawa koo nun bii tɔn durɔ marua kam kam, kpa a nùn yĩsiru kɛ̃ Isaki. Wiya kon wure n ka nɛn arukawani bɔke ye ya ǹ kpeemɔ win bweserɔ. 20Mɛya na wunɛn kanaru nua te a kua Isimɛɛlin sɔ̃. Wee, kon maa nùn domaru kua kpa u marura, win bibu bu dabia sere ba ǹ garirɔ. U koo bibu wɔkura yiru ma, kpa bii be, bu ko bwese bakarun kɛri wɔkura yirun nuuru. 21Adama nɛn arukawani ye, ya ko n wãawa Isakin mi, wi Saaraa koo nun marua gasɔku amadaare. 22Ye Gusunɔ u ka Aburahamu gari kua u kpa, u nùn deri u doona wɔllɔ. 23Yen biru Aburahamu u Isimɛɛli sua ka yobu kpuro be ba mara win yɛnuɔ ka be u ka gobi dwa, tɔn durɔ be ba wãa win yɛnuɔ kpuro gesi, ma u bu bango kua dɔma te, nge mɛ Gusunɔ u nùn sɔ̃ɔwa. 24Aburahamu u mɔwa wɔ̃ɔ wunɔbu tia sari sanam mɛ u bango kua. 25Win bii Isimɛɛli u maa mɔwa wɔ̃ɔ wɔkura ita. 26Sɔ̃ɔ tee tera ba Aburahamu ka win bii Isimɛɛli bango kua. 27Tɔn durɔbu kpuro be ba mara win yɛnuɔ ka be u dwa tɔn tukobun mi, ba bu bango kuawa ka wi sannu.

will be added

X\