Torubu 16

1Aburamu ka win kurɔ Saarai ba ǹ bii mara. Wee Saarai wi, u yoo tɔn kurɔ goo mɔ wi u sãa Egibitigii. Win yĩsira Agaa. 2Ma Saarai u win durɔ sɔ̃ɔwa u nɛɛ, wee, Yinni Gusunɔ u man kua wĩro. Na nun kanamɔ, a ka nɛn yoo duo. Sɔrɔkudo kon bibu wa saa win min di. Ma Aburamu u win kurɔn gari wura. 3Saa ye sɔɔra Saarai u win yoo Agaa wi sua u win durɔ kã kurɔ. N deema ba wɔ̃ɔ wɔkuru kua kɔ Kananin temɔ. 4Ma Aburamu u ka Agaa mɛnna ma Agaa u gura sua. Ye u wa u gura mɔ, yera u win yinni Saarai gɛndu wɔri. 5Ma Saarai u Aburamu sɔ̃ɔwa u nɛɛ, nɛn wɔmburu tu wɔri wunɛ sɔɔ. Na nun nɛn yoo kã kurɔ, adama ye u wa ma u gura mɔ, yera u man gɛndu wɔri. Yinni Gusunɔwa koo sun siria nɛ ka wunɛ. 6Aburamu u Saarai wisa u nɛɛ, wuna a wunɛn yoo mɔ, a ka nùn koowo nge mɛ a kĩ. Saa yera u Agaa nɔni mɛni ma Agaa u duka sua win min di. 7Yinni Gusunɔn gɔrado u nùn wa gbaburɔ bwia gaan bɔkuɔ Surin swaaɔ. 8U nɛɛ, Agaa, Saarain yoo, man diya a wee. Mana a dɔɔ. Agaa u nɛɛ, na duka suɔwa nɛn yinni Saarain min di. 9Ma gɔrado wi, u nùn sɔ̃ɔwa u nɛɛ, a gɔsiro wunɛn yinnin mi, kpa a nùn wiru kpĩiya. 10Kon wunɛn bweseru dabiasia sere goo kun kpɛ̃ u tu gari. 11Wee a gura mɔ, kaa bii tɔn durɔ ma kpa a nùn yĩsiru kɛ̃ Isimɛɛli. Domi Yinni Gusunɔ u wunɛn nɔɔ nua nɔni swãa te sɔɔ. 12Bii wi, u ko n sãawa nge kɛtɛku gbeeku. U ko n ka tɔmbu kpuro nɔɔ gɔmunu mɔ̀. Tɔmbu kpuro ba koo maa ka nùn nɔɔ gɔmunu ko. U ko n ka win dusibu tondinɛ. 13Ye Yinni Gusunɔ u ka Agaa gari yi kua u kpa, ma Agaa u nùn yĩsiru kã u nɛɛ, wuna Yinni wi u waamɔ. Domi u tii bikia u nɛɛ, ka gem na Gusunɔ wa ka nɔni, ma na wãa na ǹ gu? 14Yen sɔ̃na ba dɔkɔ ye soka Gusunɔ u man waamɔ. Dɔkɔ ye, ya wãawa Kadɛsi ka Barɛdin baa sɔɔ. 15Yen biru Agaa u Aburamu bii tɔn durɔ marua, ma Aburamu u bii wi yĩsiru kã Isimɛɛli. 16Aburamun wɔ̃ɔ ga sãawa wɛnɛ ka nɔɔba tia sanam mɛ ba Isimɛɛli mara.

will be added

X\