Torubu 15

1Yeniba kpuron biru Yinni Gusunɔ u ka Aburamu gari kua kãsiru sɔɔ u nɛɛ, Aburamu, a ku bɛrum ko, nɛna na wunɛn tɛrɛru, wunɛn are ko n kpã gem gem. 2Aburamu nùn wisa u nɛɛ, Yinni Gusunɔ, mba kaa maa man wɛ̃. Wee na gɔɔ dɔɔ bii sari kpa Ɛliesɛɛ Damasigii u ko nɛn tubi dio. 3Yèn sɔ̃ a ǹ man bii kã, nɛn yoo Ɛliesɛɛ wi ba mara nɛn yɛnuɔ wiya koo nɛn tubi di. 4Yera Yinni Gusunɔ u Aburamu sɔ̃ɔwa u nɛɛ, n ǹ wi, u koo ko wunɛn tubi dio. Wunɛn tii tiin biiwa u koo wunɛn tubi di. 5Ma Gusunɔ u ka nùn da tɔɔwɔ u nɛɛ, a wɔllu mɛɛrio kpa a kperi gari, à n kaa kpĩ. Nge mɛya wunɛn bwesera koo dabiru nɛra. 6Ma Aburamu u Yinni Gusunɔ naanɛ kua. Yen sɔ̃na Gusunɔ u nùn garisi gemgii. 7Ma u kpam nùn sɔ̃ɔwa u nɛɛ, nɛna na Yinni Gusunɔ, nɛ wi na nun yarama saa Urun di Kaladen temɔ kpa n ka nun tem mɛni wɛ̃. 8Adama u wisa u nɛɛ, Yinni Gusunɔ, amɔna ko na n ka yɛ̃ ma tem mɛni mu koo ko nɛgim. 9Ma Yinni Gusunɔ u nɛɛ, a naa gbiiba wɔ̃ɔ itagia tama ka boo niu wɔ̃ɔ itaguu, ka yãa kinɛru wɔ̃ɔ itagiru ka kparuko ka totobɛrɛ buu kpa a man ye goowa a yi. 10Yera Aburamu u yɛɛ yi kpuro mɛnna u yi go u bɛrana yiru u yin bɛsi yi u karinasia, adama u ǹ gunɔsu bɛre si. 11Yaberekunu nu sarama yaa goo ni sɔɔ, ma Aburamu u nu gira. 12Ye sɔ̃ɔ duɔ, dom mɔn bakara Aburamu wɔri ma bɛrum nùn mwa yam wɔ̃ku te sɔɔ. 13Yera Yinni Gusunɔ u nùn sɔ̃ɔwa u nɛɛ, a n yɛ̃ ma wunɛn bibun bwesera ta koo tem tukumɔ sina mi ba koo bu yoru diisia kpa bu bu nɔni sɔ̃ sere wɔ̃ɔ nɛɛru (400). 14- 16Adama kon tem mɛn tɔmbu siri be ba koo bu yoo te diisia. Wɔ̃ɔ dabirun biru ba koo yari tem min di ka dukia baka kpa bu kpam gɔsirama mini, domi Amɔreban durum kun gina yiba n ka bu kpeerasia. Adama wunɛ kaa tɔkɔ kowa kɔ̃ɔ kɔ̃ɔ kpa a da a wunɛn baababa deema ka alafia. 17Ye sɔ̃ɔ kpa yam tĩra niki niki, yera Gusunɔ u kurama yaa bɛsi yin kpoo kpooka sɔɔ. U sãa nge dɔ̃ɔ bokon wiisu ka dɔ̃ɔ yari. 18Nge mɛya u ka Aburamu arukawani bɔkua tɔ̃ɔ te sɔɔ u nɛɛ, wunɛn bwesera kon tem mɛni wɛ̃ saa daa piibu ge ga wãa Egibitin tem nɔɔ bura yerun di sere daa baka ten mi, te ba mɔ̀ Efarati. 19Tem mɛ, mu sãawa Keniban tem ka Kenisibagim ka Kadimɔnibagim 20ka Hɛtibagim ka Feresibagim ka Refaban tem, 21ka Amɔreban tem ka Kananiban tem ka Girigasiban tem ka Yebusiban tem.

will be added

X\