1 Yen biruwa Yinni Gusunɔ u Aburamu sɔ̃ɔwa u nɛɛ, a seewo wunɛn tem di a wunɛn wuu deri ka wunɛn tundon yɛnu a da tem gam mi kon nun sɔ̃ɔsi. 2 Wunɛn min diya kon de bwese bakaru tu yari. Kon nun domaru kua kpa wunɛn yĩsiru tu kpɛ̃a kpa a ko domarun nuuru. 3 Baawure wi u nun domaru kua, kon maa yɛ̃ro domaru kua. Wi u maa nun bɔ̃rusi, kon yɛ̃ro bɔ̃rusi. Wunɛn min diya handunian tɔmbu kpuro ba koo domaru wa. 4 Yera Aburamu u swaa wɔri nge mɛ Yinni Gusunɔ u nùn sɔ̃ɔwa ma ba da sannu ka Lɔtu. Sanam mɛ ba yara Haranin di, Aburamu u mɔwa wɔ̃ɔ wata ka wɔkura nɔɔbu. 5 U win kurɔ Saarai sua ka Lɔtu win wɔnɔn bii ka ben arumani ye ba mɔ kpuro ka sɔm kowo be ba wa Haraniɔ. Be kpurowa ba swaa wɔri ma ba tura Kananin temɔ. 6 Ye ba tura mi, ma Aburamu u tem mɛ bukiana sere u ka tura Sikɛmuɔ mi dãa sɔ̃ɔ ga wãa ge ba mɔ̀ Mɔre. Kananiba maa wãa tem mɛ sɔɔ, saa ye. 7 Sɔ̃ɔ teeru yera Yinni Gusunɔ u Aburamu kure u nɛɛ, wunɛn bibun bwesera kon tem mɛ wɛ̃. Ma u yãku yeru bana u ka Yinni Gusunɔ sã wi u nùn kure mi. 8 Yen biruwa u seewa min di u da guuru garun bera gia Betɛlin sɔ̃ɔ yari yerɔ u win dii bekuruginu gira. U Betɛli mɛɛra sɔ̃ɔ kpee yeru gia, Ayi maa sɔ̃ɔ yari yerɔ. Miya u maa yãku yeru bana u Yinni Gusunɔ sãwa. 9 Ma u maa seewa u win sanum wɔri u dɔɔ sɔ̃ɔ yɛ̃san nɔm dwaru gia Nɛgɛbuɔ. 10 Ye Aburamu u tura mi, yera gɔ̃ɔra tunuma tem mɛ sɔɔ. Ma u seewa u da Egibitin temɔ u sina mi, domi gɔ̃ɔ te, ta kpɛ̃a win tem mi. 11 Sanam mɛ ba Egibitin tem turuku kua, Aburamu u win kurɔ Saarai sɔ̃ɔwa u nɛɛ, wee wunɛ kurɔ burɔwa. 12 Egibitigibu bà n nun wa ba koo nɛɛ, a sãa nɛn kurɔ kpa bu man go bu nun deri. 13 Na nun kanamɔ, a nɛɛ, wunɛ nɛn sesuwa kpa bu ku man wahala ko wunɛn sɔ̃, kpa a wa a nɛn wiru dwe. 14 Ye ba tura Egibitiɔ, Egibitigiba wa ma kurɔ wi, u wã gem gem. 15 Egibiti sunɔn bwãaba nùn wa ma ba na ba sunɔ kurɔ win buram gari saaria, ma sunɔ u dera ba ka nùn na win mi. 16 Ma u Aburamu gea kua gem gem kurɔ win sɔ̃. U nùn yãanu kã ka nɛɛ ka kɛtɛkunu ka kɛtɛku mɛrobu ka yooyoosu ka yoo tɔn durɔbu ka tɔn kurɔbu. 17 Adama Yinni Gusunɔ u sunɔ wi ka win yɛnugibu kpuro wahala baka doke Saarai, Aburamun kurɔn sɔ̃. 18 Yera u Aburamu soka u nɛɛ, mban sɔ̃na a man kua mɛ. Mban sɔ̃na a ǹ man sɔ̃ɔwa ma wunɛn kurɔwa. 19 Ma a nɛɛ, wunɛn sesuwa, a dera na nùn sua kurɔ. Tɛ̃ wunɛn kurɔ wee, a nùn suo a ka doona. 20 Ma u wooda wɛ̃ bu de u doona ka win kurɔ ka win ye u mɔ kpuro.
