1 Ye ba dii te bana ba kpa, Isireliban wirugibu ba man susi ba nɛɛ, wee Isireliba ka yãku kowobu ka sere Lefiba ba ǹ ka tem min tɔn be karanɛ, domi ba Kananiban koma kamginu saarimɔ ka Mɛdibaginu ka Feresibaginu ka Yebusibaginu ka Amɔnibaginu ka Mɔabubaginu ka Egibitigibun bũnu ka Amɔrebaginu. 2 Ma ba bwese tuku nin bii wɔndiaba suamɔ kurɔbu. Nge mɛya be Isireliba, be, be ba sãa Yinni Gusunɔn tɔmbu ba ka tem min tɔmbu mɛnnamɔ. Ben wirugibu ka ben siri kowoba ba gbia ba tora te kua. 3 Sanam mɛ na nua mɛsum, yera na nɛn yaberu nɛnua na gɛ̃ɛka ma na nɛn seri wukura ka nɛn toburu ma na sina ka nuku sankiranu. 4 Ma be ba nanda Gusunɔ Isireliban Yinnin garin sɔ̃ ba na ba sina nɛn bɔkuɔ Isireli be ba raa yoru mwɛɛran toranun sɔ̃. Ma na sina ka nuku sankiranu sere n ka kua yokan yãkurun saa. 5 Yokan yãkurun saa ye sɔɔ, na seewa min di ka nɛn yãa ni na gɛ̃ɛka nuku sankirarun sɔ̃ mi. Ma na yiira na nɔma sua wɔllɔ na Yinni Gusunɔ kana na nɛɛ, 6 Gusunɔ nɛn Yinni, wee na wãa sekuru sɔɔ sere na ǹ kpɛ̃ n wuswaa seeya. Bɛsɛn toranu nu dabia nu sun kera. Bɛsɛn durum kpɛ̃a sere ya wɔllu girari. 7 Saa bɛsɛn baababan waatin diya sa tore too sere ka gisɔ. Bɛsɛn tora nin sɔ̃na wunɛ Yinni Gusunɔ a sun bwese tukunu nɔmu bɛria bɛsɛ ka bɛsɛn sinambu ka bɛsɛn yãku kowobu. Wee tɛ̃, tabu sun di ma sa wãa yoru sɔɔ. Ba bɛsɛn yãnu gura ma sa wãa sekuru sɔɔ. 8 Adama Gusunɔ bɛsɛn Yinni, a sun durom kua bɛsɛn gaba wurama yorun di. Ma a sun wãa yeru kua wunɛn tem mɛ a gɔsa sɔɔ kpa a ka bɛsɛn nɔni wukia, a sun wãa geeru wɛ̃ bɛsɛn yoru sɔɔ. 9 Wee sa sãawa yobu. Adama wunɛ Gusunɔ, a ǹ sun deri. A dera Pɛɛsiban sinambu ba ka sun nɔnu geu mɛɛra ma ba dera sa wãa su ka wunɛ Gusunɔ bɛsɛn Yinnin sãa yeru bani. Kpa su wɛ̃ra yeru wa Yerusalɛmuɔ ka Yudan tem kpuro sɔɔ. 10 Tɛ̃, Gusunɔ, mba sa yɛ̃ sa ko gere domi sa wunɛn woodaba deri 11 be a sun wɛ̃ saa wunɛn sɔmɔbun min di. A bu sɔ̃ɔwa a nɛɛ, tem mi sa ko du, mu sãawa mɛ mu disi mɔ baama mɛn tɔmbun daa kɔ̃san sɔ̃. 12 Yen sɔ̃, su ku bu bɛsɛn bii wɔndiaba wɛ̃ bu sua kurɔbu. Kpa su ku maa begibu sua kurɔbu. Mɛya su ku maa ben dukia gaa binɛ ko. Sà n yeni mɛm nɔɔwa, sa ko ko damgibu kpa su tem mɛn dĩa geenu di sere su mam mu bɛsɛn bibu tubi kerea. 13 Bɛsɛn daa kɔ̃sa ka bɛsɛn tora bakanun sɔ̃na yeni kpuro ya sun deema. Adama a ǹ sun sɛɛyasie nge mɛ bɛsɛn tora ni, nu nɛ. Ma a maa dera bɛsɛn gaba yakiarama yorun di. 14 Yera sa ko maa wura su wunɛn wooda sara su ka bwese tuku ni nu kom kɔ̃sum mɔ̀ arukawani bɔke? Sà n maa kua mɛ, a ǹ kaa mɔru se a sun go mam mam baa fiiko a kun deri? 15 Gusunɔ bɛsɛ Isireliban Yinni, wuna a sãa gemgii. Bɛsɛ sa sãawa be ba tiara Isireliba sɔɔ. Bɛsɛ wee wunɛn wuswaaɔ sa tora. Sa ǹ maa kpɛ̃ sa n ka wãa mɛ wunɛn wuswaaɔ.
