Ɛsidarasi 8

1Bwese kɛran wirugii be ba nɛ Ɛsidarasi swĩima saa Babilonin di sere Yerusalɛmuɔ sina boko Aatasɛsin waati sɔɔ ben yĩsa wee. 2Gɛɛsɔmu, Finɛɛsin bwese kɛra sɔɔ, ka Daniɛli, Itamaan bwese kɛra sɔɔ, ka Hatusi, Dafidin bwese kɛra sɔɔ, 3ka Sakari, Sekanian bii turo, Pareɔsin bwese kɛra sɔɔ ka win tɔmbu wunɔbu ka weeraakuru (150), 4ka maa Elionai, Serayan bii, Pakati Mɔabun bweseru sɔɔ ka win tɔmbu goobu (200), 5ka Sekania, Yasiɛlin bii, Satun bwese kɛra sɔɔ ka win tɔmbu gooba wunɔbu (300), 6ka Ebɛdi, Yonatam bii, Adinin bweseru sɔɔ ka win tɔmbu weeraakuru, 7ka Esai, Atalian bii, Elamun bweseru sɔɔ ka win tɔmbu wata ka wɔkuru, 8ka Sebadia, Mikaɛlin bii, Sefatian bweseru sɔɔ ka win tɔmbu wɛnɛ, 9ka Abudiasi, Yehiɛlin bii, Yoabun bwese kɛra sɔɔ ka win tɔmbu goobu ka yɛndu yiru sari (218), 10ka Selomiti, Yosifian bii, Banin bweseru sɔɔ ka win tɔmbu wunɔbu ka wata (160), 11ka Sakari, Bebain bii, Bebain bweseru sɔɔ ka win tɔmbu tɛna yiru sari, 12ka Yokanani, Hakatanin bii, Asigadin bweseru sɔɔ ka win tɔmbu wunɔbu ka wɔkuru (110), 13ka Elifelɛti ka Yeyɛli ka Semaya be ba yãkaminu bo Adonikamun bweseru sɔɔ ka ben tɔmbu wata, 14ka Utai ka Sabudu, Bigifain bweseru sɔɔ ka ben tɔmbu wata ka wɔkuru. 15Nɛ Ɛsidarasi, na tɔn be kpuro mɛnna daa te ta kokumɔ Ahafa gia. Miya sa bɛsɛn sansani gira sɔ̃ɔ ita. Ma na tɔn be ka yãku kowo be mɛɛra mɛɛra ka laakari. Adama na ǹ goo wa be sɔɔ wi u sãa Lefi. 16Yera na wirugii beni soka, Ɛliesɛɛ ka Ariɛli ka Semaya ka Ɛlinatani ka Yaribu ka Natani ka Sakari ka Mɛsulamu ka sere woodan keu koosiobu Yoyaribu ka Ɛlinatani. 17Ma na bu gɔra na nɛɛ, bu doo wirugii Idon mi, ka win mɛro bisibu Nɛtiniban mi be ba wãa Kasifiaɔ bu sun sɔm kowobu mɔrisiama Gusunɔ bɛsɛn Yinnin sãa yee ten sɔ̃. 18Nge mɛ Gusunɔn durom mu ka sun wãa, yera ba sun Serebia mɔrisiama wi u sãa Makilin bii, Lefin bweseru sɔɔ, Yakɔbun sikadobu, ka maa win tundo turosibu gabu ka ben bibu. Be kpuro ba kuawa yɛndu yiru sari. N deema Serebia wi, u bwisi mɔ too. 19Mɛrarin bweseru sɔɔ, be ba sun mɔrisiama, bera Hasabia ka Esai ka ben tundo turosibu ka tundo turosi ben bibu. Ba kuawa tɔmbu yɛndu. 20Be Dafidi ka win tabu sinambu ba Lefiba nɔmu bɛria Nɛtiniban bweseru sɔɔ, ba kuawa tɔmbu goobu ka yɛndu (220) ma ba ben baawure soka ka win yĩsiru. 21Daa te ba mɔ̀ Ahafan bɔku miya na nɛɛ, su tii kawa su nɔɔ bɔke su Gusunɔ bɛsɛn Yinni kana bɛsɛn sanum mu dora su ka turi baani bɛsɛ ka bɛsɛn bibu ka sere arumani ye sa mɔ. 22Seku bakara n ka maa sina boko kana u ka man tabu kowobu ka maasɔbu kɛ̃ bu sun yɔ̃siri bɛsɛn sanum mɛ sɔɔ yibɛrɛban sɔ̃. Domi sa raa nùn sɔ̃ɔwa sa nɛɛ, be ba Gusunɔ kasu, bera u ra n ka wãa, kpa u be ba nùn biru kisi dam sɔ̃ɔsi ka mɔru. 23Yen sɔ̃na sa nɔɔ bɔkua ma sa Gusunɔ kana. U maa sun wurari. 24Ma na yãku kowobun wirugibu wɔkura yiru wuna nɛnɛm. Bera Serebia ka Hasabia ka ben mɛro bisibu gabu tɔmbu wɔkuru. 25Ma na sii geesu yĩira ben wuswaaɔ ka wura ka sere gãa ni sina boko ka win bwisi kɛ̃ɔbu ka win sina asakpɔbu ka sere Isireliba kpuro be ba wãa mi, ba wɛ̃ sãa yee ten sɔ̃. 26Ma na bu sii geesun tɔnnu yɛndu nɔmu sɔndia ka gãa ni ba kua ka sii geesu tɔnnu ita ka wura tɔnnu ita 27ka gbɛ̃ɛ basilanu yɛndu ni ba kua ka wura. Yen geera sãawa wuran gobi nɔrɔbu (1.000) ka sere boo sii gandugisu yiru si su ballimɔ. Boo si, su ka wuragisu bɛɛrɛ nɛwa. 28Yen biru, na bu sɔ̃ɔwa na nɛɛ, nge mɛ ba wãa nɛnɛm Yinni Gusunɔn sɔ̃, nge mɛya yãa ni, nu maa wãa nɛnɛm Yinni Gusunɔn sɔ̃. Sii gee si, ka wura ye, ya sãawa kɛ̃ɛ ni ba Gusunɔ ben baababan Yinni wɛ̃ ka nuku tia. 29Yen sɔ̃, bu de ba n tii sɛ. Kpa bu ye nɛnɛ ka laakari sere bu ka ye yĩire yãku kowobun wirugibu ka Lefiba ka Isireliban bwese kɛrin wirugibun wuswaaɔ Yerusalɛmuɔ Yinni Gusunɔn sãa yerɔ. 30Ma yãku kowo be, ka Lefi be, ba sii gee si, ka wura ye, ka sere dendi yãa ni ba wɛ̃ sãa yee ten sɔ̃ mi sua ba ka dɔɔ Yerusalɛmuɔ Gusunɔ bɛsɛn Yinnin sãa yerɔ. 31Wɔ̃ɔ gen suru gbiikoon sɔ̃ɔ wɔkura yiruse sɔɔra sa seewa sa Yerusalɛmun swaa wɔri, Gusunɔ bɛsɛn Yinni u ka sun wãa. Ma u sun gbara bɛsɛn yibɛrɛban yina ka ben sannɔsun di gbaburɔ. 32Ye sa tura Yerusalɛmuɔ, sa wɛ̃ra sɔ̃ɔ ita. 33Sɔ̃ɔ nnɛse sa sii gee si, ka wura ye, ka sere maa dendi yãa ni yĩira Gusunɔ bɛsɛn Yinnin sãa yerɔ. Ma ba ye Mɛremɔtu, Uri yãku kowon bii nɔmu sɔndia ka Eleasaa Finɛɛsin bii ka sere maa Lefi beni, Yosabadi, Yosuen bii ka Nɔadia, Binuin bii. 34Ye ba ye kpuro gara ba yĩira, ma ba ye kpuron geeru doke tireru sɔɔ. 35Be ba raa yoru mwɛɛra ba wurama Isireliɔ ba Gusunɔ Isireli ben Yinni yãku dɔ̃ɔ mwaararuginu kua Isireliba kpuron sɔ̃ ka naa kinɛnu wɔkura yiru ka yãa kinɛnu wɛnɛ ka wɔkura nɔɔbu ka tia ka yãa kpɛmminu wata ka wɔkura nɔɔbu ka yiru ka boo kinɛnu wɔkura yiru ben toranun sɔ̃. 36Ma ba Aatasɛsin wooda ye bera geen wirugibu wɛ̃. Ma ba ka Isireliba yɔ̃ra ba ka dii te bana.

will be added

X\