1 Sina boko Darusi u wooda wɛ̃ bu kaso ko Babilonin tem sɔɔ mi ba ra sinambun kookoosun tirenu ka ben gãa geenu bere. 2 Yera ba tireru garu wa Mɛdin wuu maro bɔkɔwɔ ge ba mɔ̀ Eki Batani. 3 Wee ye tire te, ta gerumɔ. Ta nɛɛ, sina boko Sirusin wɔ̃ɔ gbiikuu sɔɔ, u wooda yara u nɛɛ, ba koo wure bu Yinni Gusunɔn sãa yee te ta wãa Yerusalɛmuɔ baniwa mi yerukiru ta raa wãa. Kpa ba n da yãkuru ko mi. Ten ganan gunum mu ko n sãawa gɔm soonu wata. Ten yasum maa gɔm soonu wata. 4 Ba koo ten gana seeyawa ka kpee sɔkenu ita kpa bu dãa sɔke teeru sɔndi. Yen biru maa kpee sɔkenu ita ka dãa sɔke teeru sere bu ka ye bani bu kpe. Sina bokowa u koo yen sɔmburun gobi kɔsia. 5 Yen biru, Gusunɔn sãa yerun dendi yãa wuraginu ka sii geesugii ni sina boko Nɛbukanɛsaa u raa gurama u ka na mini, ba koo ni wesia kpa bu nin baanire doke nin ayerɔ. 6 Yen sɔ̃na Darusi u tireru yorua u nɛɛ, bɛɛ Tatinai, Efaratin sɔ̃ɔ duu yeru gian kparo ka Setaa Bosinai ka bera min wirugibu gabu, i tii wunɔ Yudaban garin di. 7 I bu derio sɛ̃ɛ, kpa ben kparobu ka ben wirugibu bu sɔmbu te kpara bu ka sãa yee te bani mi yerukiru ta raa wãa. 8 Yen sɔ̃na na bɛɛ wooda wɛ̃ɛmɔ. I Yuuban wirugii be somiɔ sãa yee ten bana sɔɔ. Gobi yi ba koo di, yi ko n sãawa nɛn arumani ye ya naamɔ bera min tɔmbun wɔ̃ɔ gobin di. Kpa i sɔm kowobu kɔsia dee dee sɔmbu te, tu ku raa ka yɔ̃ran sɔ̃. 9 I de i n sɔɔru sãa i ka Yuuban yãku kowobu wɛ̃ yèn bukata ba mɔ tɔ̃ɔ baateren yãku dɔ̃ɔ mwaararugirun sɔ̃ te ba koo Wɔrukoo kua. Yera kɛtɛ kinɛnu ka yãa kinɛnu ka yãa kpɛmminu ka sere alikama ka tam ka bɔru ka gum. 10 Nge mɛya ba koo kpĩ bu ka nùn yãku nubu durorugiru kua kpa bu kanaru ko nɛ sina boko ka nɛn bibun sɔ̃. 11 Wi u yina u wooda yeni mɛm nɔɔwa, i yɛ̃ron dirun dãru garu wuko i nɔɔ sɛm ko kpa i ka nùn ye sɔku i suasia wɔllɔ. Yen biru kpa i dii te kɔsuku. 12 Gusunɔ wi u ra tii sɔ̃ɔsi Yerusalɛmuɔ, u sina boko ǹ kun mɛ bwese te ta kĩ tu sãa yee te sura kam koosio, yèn sɔ̃ ta nɛn wooda gɛma. Nɛ Darusiwa na wooda yeni wɛ̃. I ye mɛm nɔɔwɔ mam mam. 13 Ma Tatinai Efaratin sɔ̃ɔ duu yeru gian kparo wi, ka Setaa Bosinai ka ben sɔm kowosibu ba wooda ye mɛm nɔɔwa mam mam. 14 Gusunɔn sɔmɔbu Asee ka Sakari, Idon bii ba Isireliban wirugibu dam kã ba ka sãa yee te bana ba kpa mam mam. Ba tu banawa nge mɛ Gusunɔ Isireliban Yinni u gerua ka nge mɛ Pɛɛsin sinam beni, Sirusi ka Darusi ka Aatasɛsi ba yen wooda yi. 15 Ba bana ye kpawa suru wi ba mɔ̀ Adarin sɔ̃ɔ itase sɔɔ, Darusin bandun wɔ̃ɔ nɔɔba tiase sɔɔ. 16 Isireliba ka ben yãku kowobu ka Lefiba ka be ba wurama yorun di kpuro, ba sãa yee te dendibu torua ka tɔ̃ɔ bakaru, nuku dobu sɔɔ. 17 Yen tɔ̃ɔ te, ba kɛtɛ kinɛnu wunɔbu (100) go ba ka yãkuru kua ka yãa kinɛnu goobu ka yãa kpɛmminu nɛɛru (400). Ma ba maa boo kinɛnu wɔkura yiru go toranun yãkunun sɔ̃. Boo teuwa bwese kɛra baayere ya go. 18 Ma ba yãku kowobu ka Lefiba bɔnu kua wuu wuuka nge mɛ ben baawuren sɔmbura sãa Yinni Gusunɔn sãa yerɔ ka nge mɛ ya yorua woodan tireru sɔɔ ye Gusunɔ u Mɔwisi wɛ̃. 19 Isireli be ba wurama yorun di kpuro ba Gɔɔ sararibun tɔ̃ɔ bakaru kua wɔ̃ɔ kpɔɔn suru gbiikoon sɔ̃ɔ wɔkura nnɛse sɔɔ. 20 Yãku kowobu ka Lefiba ba tii dɛɛrasia sannu. Ma Lefiba ba Isireliba Gɔɔ sararibun yãku yãanu sakiria ka ben yãku kowosibuginu ka sere ben tiiginu. 21 Ma Isireliba kpuro ba tɔ̃ɔ baka ten dĩanu di ka be ba wurama yorun di ka Isireli be ba tem min tɔn tukobun koma ni nu ǹ dɛɛre deri ma ba Gusunɔ Isireliban Yinni sãamɔ. 22 Yen biru, ba pɛ̃ɛ ye ba ǹ seeyatia doken tɔ̃ɔ bakaru kua sɔ̃ɔ nɔɔba yiru ka nuku dobu. Yinni Gusunɔ u bu nuku dobu yibia yèn sɔ̃ u dera sina boko u ka bu nɔnu geu mɛɛra, u bu dam kã ba ka sãa yee te bana.
