Ɛsidarasi 5

1Saa ye sɔɔ, Gusunɔn sɔmɔ Asee ka Sakari Idon bii ba Gusunɔn gari gerua ka Gusunɔ Isireliban Yinnin yĩsiru Yerusalɛmuɔ ka Yudaban tem kpuro sɔɔ. 2Yera Sorobabɛli, Sealitiɛlin bii ka Yosue, Yosadakin bii ba seewa ba Yinni Gusunɔn sãa yee te bana torua Yerusalɛmuɔ. Ma Gusunɔn sɔmɔ be, ba bu somimɔ. 3Saa ye sɔɔra Tatinai, bera ye ya wãa Efaratin guru geen kparo ka Setaa Bosinai ka ben sɔm kowosibu ba na ba bu deema ba nɛɛ, wara u bɛɛ wooda wɛ̃ i ka dii te banimɔ. Wara u bɛɛ wooda wɛ̃ i ka gbãra te seeyamɔ. 4Tɛ̃, be ba bani yi mɔ̀ i sun ben yĩsa wɛ̃ɛma. 5Adama Gusunɔ u ka Yuuban bukuro be wãa ma ba ben sɔmburu mɔ̀ ba dɔɔ ba ka mara tireru tu turi sina boko Darusin mi, kpa wi, u maa bu wisima. 6Be ba sina boko Darusi tireru yorua Yuuban sɔ̃ ben yĩsa wee, Tatinai bera min wirugii ka Setaa Bosinai ka wirugii be ba wãa Efaratin guru gee, sɔ̃ɔ duu yeru gia. 7Wee ye ba gerua tire te sɔɔ. Ba nɛɛ, sina boko Darusi, Gusunɔ u nun alafia kɛ̃. 8Wee sa nun nɔɔsiamɔ ma sa da Yudaban temɔ sere Yinni Gusunɔn sãa yerɔ. Ba tu banawa ka kpee bakanu ma ba ten gani dãa wukirimɔ tɛ̃. Sɔmbu te, ta dɔɔ gem gem. 9Ma sa ben bukurobu bikia sa nɛɛ, wara u bu wooda wɛ̃ bu ka dii te bani kpa bu ten gani seeya. 10Ma sa ben yĩsa bikia kpa su wa su ka nun ye mɔrisiama. 11Wee ye ba sun wisa. Ba nɛɛ, ba sãawa Gusunɔ wɔllu ka tem Yinnin sɔm kowobu. Yera ba win sãa yeru seeyamɔ te ba raa nùn bania saa yellun di. Be, Isireliban sina boko wi u yĩsiru yara, wiya u raa tu bana. 12Adama ye ben baababa ba Wɔrukoon mɔru seeya, yera u bu Babilonin sina boko Nɛbukanɛsaa nɔmu sɔndia. Yera sina boko wi, u Yinni Gusunɔn sãa yee te kɔsuka. Ma u bu gura u ka da win temɔ. 13Yen biruwa Sirusi Babilonin sina boko u wooda wɛ̃ win bandun wɔ̃ɔ gbiikuu sɔɔ bu da bu Yinni Gusunɔn sãa yee te bani. 14N deema sina boko Nɛbukanɛsaawa u raa Yinni Gusunɔn sãa yerun dendi yãa ni ba kua ka wura ka sii geesu gurama saa Yerusalɛmun di u doke ben bũu dirɔ. Yera Sirusi u dendi yãa ni sua bũu dii ten min di u Sesibasaa wɛ̃ wi u kua Isireliban tem kparo. 15Ma u Sesibasaa sɔ̃ɔwa u nɛɛ, u doo u dendi yãa ni doke Yerusalɛmun sãa yerɔ kpa u de bu maa Yinni Gusunɔn sãa yee ten bansu seeya mi ba raa tu bana. 16Sesibasaa wi, u na u sãa yee ten kpɛɛkpɛɛku swĩi Yerusalɛmuɔ. Saa yen dɔma ten di, ba bana torua. Adama sere ka gisɔ, ba ǹ tu kpa. 17Yen sɔ̃, ǹ n wunɛ sina boko wɛ̃re, a de bu kasu sinambun faagin tireru sɔɔ, Sirusi ù n wooda wɛ̃ɛre bu Yinni Gusunɔn sãa yee te seeya Yerusalɛmuɔ, kpa a sun sɔ̃ɔma ye a kĩ bana yen sɔ̃.

will be added

X\