Ɛsidarasi 4

1Yudaba ka Bɛnyamɛɛban yibɛrɛba ba nua ma be ba raa yoru mwɛɛra ba wurama ba Gusunɔ Isireliban Yinni sãa yeru baniammɛ. 2Yera yibɛrɛ be, ba na Sorobabɛli ka Yudaban bukurobun mi ba bu sɔ̃ɔwa ba nɛɛ, sa ko ka bɛɛ bana ye ko, domi bɛsɛn tii sa ra Gusunɔ bɛɛn Yinni sã, kpa su nùn yãkuru kua saa Esari Hadoni, Asirin sina bokon waatin di, wi, wi u ka sun na mini. 3Adama Sorobabɛli ka Yosue ka Isireliban yɛnu yɛ̃ro be ba tie, ba bu sɔ̃ɔwa ba nɛɛ, n ǹ ka bɛɛ, bɛsɛ tɔnawa nge mɛ Sirusi Pɛɛsiban sina boko u gerua. Domi Gusunɔ bɛsɛ Isireliban Yinnin sãa yera. 4Saa yera tɔn be ba wãa tem mɛ sɔɔ, ba Yudaban dam bua. Ma ba bu nandasia bu ku ka bana ye ko. 5Ba bwisi kɛ̃ɔbu gabu gobi kã bu ka tɔmbu swaa nim wia bu ka sɔmbu te kpana. Nge mɛya n koora Sirusin bandun waati kpuro sɔɔ, sere n ka girari Darusi Pɛɛsiban sina bokon bandu sɔɔ. 6Asuresin bandun tore sɔɔ, ba tireru yorua bu ka Yudaba ka Yerusalɛmugibu taarɛ wɛ̃. 7Aatasɛsi Pɛɛsin sina bokon waati sɔɔ, Bisilamu ka Miteredati ka Tabɛɛli ka sere ben sɔm kowosibu ba Aatasɛsi wi tireru yorua. Ba tu yoruawa ka Aramun barum ka mɛn yora. 8Rehumu, bera min kparo ka win tire yoro Simusai ba sina boko Aatasɛsi tire te yorua te ta ka Yerusalɛmu yã. 9- 11Wee ye tire te, ta gerua. Ta nɛɛ, Aatasɛsi, sina boko, bɛsɛ wunɛn sɔm kowobu, bɛsɛ be sa wãa daa guru gee, nɛ, Rehumu, bera minin kparo ka Simusai nɛn tire yoro ka sere bɛsɛn sɔm kowosibu be ba wãa Diniɔ ka Aafasatakiɔ ka Taapɛliɔ ka Afarasiɔ ka Erɛkiɔ ka Babiloniɔ ka Susiɔ ka Dehaɔ ka Elamuɔ ka sere bwese ni nu tie ni Asinapari wi u sãa tɔn boko u swĩi Samariɔ ka sere wuu si su wãa Efaratin guru gee, sɔ̃ɔ duu yeru gia, bɛsɛra sa nun yoruammɛ. Sa nɛɛ, 12sina boko, a de a n yɛ̃ ma Yuu be ba na saa wunɛn min di ba tunuma bɛsɛn suunu sɔɔ Yerusalɛmu mini. Ba na ba Yerusalɛmu ye seeya yèn tɔmba sãa tɔn kɔ̃sobu ba ku ra mɛm nɔ mi. Ba yen gbãrarun kpɛɛkpɛɛku sɔmmɔ. 13Yen sɔ̃, a n yɛ̃ ma bà n wuu gen gbãraru seeya, ba ǹ maa wɔ̃ɔ gobi kɔsiamɔ ǹ kun mɛ gbererun gobi. Yen biru wunɛn arumani ye a ra raa wa ya koo kaarawa. 14Nge mɛ sa maa waamɔ sa dimɔ wunɛn min di, yera sa nɛɛ, n ǹ weenɛ bu nun gɛm. Yen sɔ̃na sa nun labaari yeni sɔ̃ɔmɔ. 15A de a kasu wunɛn sikadoban faagin tireru sɔɔ, kaa wa nge mɛ Yerusalɛmu ya sãa. Ya sãawa wuu ge ga ra sinambu seesi ka sere bera mi ya wãan tɔmbu. Saa yellun diya ya ra ko mɛ. Yen sɔ̃na ba ye bansu koosia. 16Yen sɔ̃, wunɛ sina boko, à n wura wuu ge, ga banira, ma ba gen gbãraru seeya, a ǹ kaa maa Efaratin daa guru ge nɔma sikerena a n mɔ. 17Sina boko Aatasɛsi u bu wisa u nɛɛ, Rehumu, wunɛ wi a sãa bera yen kparo, ka wunɛn tire yoro Simusai ka bɛɛn sɔm kowosibu be ba wãa Samariɔ ka be ba wãa Efaratin daarun guru giɔ, bɛɛ kpurowa na tɔbura. 18Tire te i man mɔrisiama mi, ba man tu garia mam mam. 19Ma na wooda wɛ̃ bu kasu nɛn sikadoban faagin tireru sɔɔ. Ma ba kaso ge kua ba wa ma saa yellun di wuu ge, ga ra sinambun wooda yinɛ kpa ba n bu seesimɔ. 20Yerusalɛmu mi, sinam damgiba ba bandu di ma ba beri min tem kpuro mɔ. Ma sinambu gabu ba ra bu wɔ̃ɔ gobi ka gbere gobi kɔsie. 21Yen sɔ̃, i tɔn ben sɔmburu yɔ̃rasio kpa bu ku raa wuu gen bansu seeya ma n kun mɔ na bu wooda wɛ̃. 22I ku gari yi atafiiru ko kpa kɔ̃sa yu ku raa sosi yu ka sinambu asɔrɔ naawa. 23Ye ba yande Aatasɛsin tire te wa, ba gara Rehumu ka win tire yoro Simusai ka sere ben sɔm kowosibun wuswaaɔ, yera ba da fuuku Yerusalɛmuɔ Yuuban mi, ba ben sɔmbu te yɔ̃rasia ka dam. 24Sãa yee ten sɔmbu te, ta yɔ̃ra n ka kua Darusi Pɛɛsiban sina bokon bandun wɔ̃ɔ yiruse sɔɔ.

will be added

X\