Esekiɛli 7

1Yinni Gusunɔ u Esekiɛli sɔ̃ɔwa u nɛɛ, 2wunɛ tɔnun bii, a swaa dakio a nɔ ye na gerumɔ bɛɛ Isireliban sɔ̃. Na nɛɛ, kpeera wee. Ta pusi bɛɛn tem goonu nnɛ kpuro sɔɔ. 3Tɛ̃ ta koo bɛɛ deema. Kon de nɛn mɔru yu bɛɛ wɔri. Kon bɛɛ siriwa nge mɛ bɛɛn sanu sanusu sãa. Kpa n bɛɛ kɔ̃sa ye i kua kpuron are kɔsie. 4Na ǹ bɛɛ mɛɛrimɔ ka wɔnwɔndu. Nà n bɛɛ sɛɛyasiamɔ, na ǹ tii nɛnumɔ. Kɔ̃sa ye i kua yera kon bɛɛ kɔsia. Kpa i gia ma nɛna na sãa Yinni Gusunɔ. 5Amɛniwa nɛ, Yinni Gusunɔ na gerua. Na nɛɛ, kɔ̃sa wee, ya ǹ maa ka gaa weenɛ. 6Kpeera wee, kpeera wee. Wee ta seemɔ ta wee bɛɛn mi. Wee ta sisi. 7Bɛɛ Isireliba, bɛɛ be i wãa tem mɛ sɔɔ, saa ya turuku kua. Tɔ̃ɔ te, ta turuku kua, ta ko n sãawa wahalan tɔ̃ru. Tɔ̃ɔ te sɔɔ, nuku dobun kuuki kun maa nɔɔramɔ guunu wɔllɔ. 8Tɛ̃ kon de nɛn mɔru yu se. Na ǹ ye yɔ̃rasiamɔ ma n kun mɔ ya ka tii sara. Kon bɛɛ siriwa nge mɛ bɛɛn daa ya nɛ. 9Na ǹ bɛɛ mɛɛrimɔ ka wɔnwɔndu. Nà n bɛɛ sɛɛyasiamɔ, na ǹ maa tii nɛnumɔ. Kɔ̃sa ye i kua yera kon bɛɛ kɔsie kpa i gia ma nɛ, Yinni Gusunɔwa na bɛɛ sɛɛyasia. 10Tɔ̃ɔ te wee ta tunuma, ta turuku kua. Bɔbunu ka tii suabu bu sosimɔ. 11Bɔbunu nu kua nge dɛka ye ba ra ka tɔmbu so. Gãanu kun maa bɛɛ tiammɛ. Tɔn dabiru ta koo gbi. Baa wɔkinu kun maa nɔɔramɔ. Goo kun maa weeweenu mɔ̀ bɛɛn sɔ̃. 12Saa ya turuku mɔ̀. Tɔ̃ɔ te, ta wee. Wi u dwemɔ u ku yɛ̃ɛri. Wi u maa dɔramɔ u ku swĩ. Domi nɛ, Yinni Gusunɔn mɔru sisi tɔn be ba wãa tem mɛ sɔɔ kpuron sɔ̃. 13Wi u dɔra u ǹ maa ye u dɔra wasi u mwa baa ù n wãa wãaru sɔɔ. Domi gari yi ba gerua tɔn be kpuron sɔ̃, yi koo koora. Goo sari wi u koo yakiara yèn sɔ̃ baawure u wãa kom bɛrɛtɛkɛ sɔɔ. 14Wee ba kɔba so ba sɔɔru kpa. Adama ben goo kun tabu seemɔ, domi nɛ, Yinni Gusunɔn mɔru seewa be tɔn dabi ten sɔ̃. 15Yinni Gusunɔ u maa Esekiɛli sɔ̃ɔwa u nɛɛ, tabu ko n wãawa swɛɛ sɔɔ kpa baranu ka gɔ̃ɔnu nu n wãa yɛnusɔ. Tɔmbu ba koo gbi tabu sɔɔ yakasɔ. Be ba maa wãa wuu sɔɔ ba koo gbiwa gɔ̃ɔru ka baranun sɔ̃. 16Be ba maa kisira ba koo kpikiru dawa guunu wɔllɔ nge kparukonu kpa bu weeweenu ko ben toranun sɔ̃. 17Ben nɔma ko n sãare dam sarirun sɔ̃. Kpa ben dũa yu diiri. 18Ba koo saaki sebewa kpa bu ben seri kɔni nuku sankiranun sɔ̃. Ba koo nanda kpa sekuru bu mwa. 19Ba koo gobi kɔ̃ swɛɛ sɔɔ, kpa bu ben wuraba garisi nge kubanu, domi sii geesu ǹ kun mɛ wura yen gaa kun kpɛ̃ yu bu faaba ko Gusunɔn mɔrun tɔ̃ru sɔɔ. Ba ǹ gãanu wasi ye ya koo bu debu, ǹ kun mɛ ye ya koo ben binɛ kpunasia, domi sii geesu ka wura yera ya dera ba tora. 20Ba tii sua ben wuran sɔ̃. Ma ba ka ye bwãaroku bakanu kua ni nu nanum mɔ. Yen sɔ̃na nɛ, Yinni Gusunɔ kon de bu ye tusi. 21Kon de tɔn tukobu bu ben dukia ye gura, kpa be ba ǹ Gusunɔn bɛɛrɛ yɛ̃ bu ye tubi di bu ye kpuro disi doke. 22Na ǹ ka bɛɛ yinamɔ sanam mɛ gbɛnɔbu ba koo nɛn sãa yerun dukia disi doke bu gura. 23A yɔni sɔɔru koowo domi tem mɛ, mu tɔn gowobu yibawa. Mɛya bɛɛn wuu ge, ga tɔmbu yiba be ba daa bɔɔbɔya mɔ. 24Kon bwesenu sokuma ni nu nuku kɔ̃suru bo, kpa nu bɛɛn yɛnusu mwɛɛri. Kon bɛɛn damgibun tii suabu kpeesia. Kpa n de bu bɛɛn sãa yenu disi doke. 25Kam kobu wee. I ko i faaba kasu, adama i ǹ wasi. 26Kɔ̃sa ya koo sosi kɔ̃sa sɔɔ. Mɛya labaari kɔ̃si yi ko yi n nɔɔramɔ yi n dɔɔ. I ko i Gusunɔn sɔmɔbu bikia bu kãsiru kasu kpa bu bɛɛ sɔ̃ ye ya koo na. Adama yãku kowobu ba ǹ ko n Yinni Gusunɔn wooda yɛ̃. Bɛɛn guro gurobu ba ǹ maa bwisi gɛɛ mɔ bu tɔnu kɛ̃. 27Bɛɛn sina boko u koo gɔɔ sina kpa sina bibu ba n wurure. Tɔmbu kpuro ba ko n diirimɔ. Kon bu kuawa nge mɛ ben kookoosu nɛ. Saa ye sɔɔra ba koo gia ma nɛna na sãa Yinni Gusunɔ.

will be added

X\