Esekiɛli 6

1Yinni Gusunɔ u nɛɛ, 2wunɛ tɔnun bii, a wunɛn wuswaa seeyo Isireliban guunun bera gia, kpa a nɛn gari gere be ba wãa min sɔ̃. 3A nɛɛ, nɛ, Yinni Gusunɔ kon be ba wãa Isireliban guunɔ ka gungunɔ ka nin wɔwi sɔɔ wɔrima ka takobi, kpa n ben gunguu nìn mi ba ra bũu yãkuru ko kɔsuku. 4Kon ben bũu yãku yenu kɔsuku ka mi ba ra nu turare dɔ̃ɔ dokeye, kpa ben gonu nu n wɔruka ben bũnun nuurɔ. 5Kon Isireliban gonu kpĩ ben bwãarokunun wuswaaɔ. Kpa n ben kukunu yaruku ben bũu yãku yenɔ. 6Wuu sìn mi ba wãa kpuro, su koo kowa bansu. Kpa n ben yãku yenu kɔsuku ni ba kua gungunu wɔllɔ. Kon ben bwãaroku ni gura n kɔsuku, kpa nu kun maa wãa mi. Mɛya kon bwãaroku ni ba ra ka sɔ̃ɔ sã suriri. Ye ba gesi seka ka nɔma ya koo kam kowa mam mam. 7Ben suunu sɔɔ gaba koo wɔruku bu gbisuku. Saa ye sɔɔ, ba koo gia ma nɛna na sãa Yinni Gusunɔ. 8Adama kon de bu kisira tabun di, kpa ba n yarinɛ tem tukumɔ. 9Saa ye sɔɔ, be, be ba kisira ba koo man yaaya mi ba yoru dimɔ. Domi kon ben gɔ̃ru ge wĩa ge ga ǹ ka nɛ turo yɔ̃. Kon ben sakara nɔni wĩa yi ba ka bũnu mɛɛra. Ben tii ba koo tii tusi, kɔ̃sa kpuro ye ba kuan sɔ̃. 10Saa ye sɔɔra ba koo gia ma nɛna Yinni Gusunɔ. N ǹ kam sɔɔ na ka bu gerusi, ye na nɛɛ, kon bu wahala yeni kpɛ̃ɛ. 11Wee ye nɛ, Yinni Gusunɔ na nun sɔ̃ɔmɔ. A nɔma suo kpa a ka naasu tem so a nɛɛ, wanyo. Wee Isireliba ba kɔ̃sa kua ya kpã. Yen sɔ̃, ba koo gbi tabu sɔɔ, ka gɔ̃ɔru sɔɔ, ka bararu sɔɔ. 12Wi u toma, barara ta koo nùn go. Wi u maa wãa turuku, tabu sɔɔra ba koo nùn go. Wi u koo sina yɛnuɔ, ba koo nùn tarusiwa kpa u gbi gɔ̃ɔrun sɔ̃. Kon bu mɔru seesiwa mam mam. 13Saa ye sɔɔ, ba koo gia ma nɛna na sãa Yinni Gusunɔ bà n wa gonu kpĩ ben bũnun bɔkuɔ ka sere ben yãku yenɔ ka gungunɔ ka guunɔ ka dãa kubenɔ ka dãa koo bakanɔ mi ba ra raa bũnu turare dɔ̃ɔ dokeye, ya n nubu duroru mɔ. 14Kon bu nɛn nɔmu dɛmiɛ kpa n de tem mɛ, mu ko bansu saa sɔ̃ɔ yɛ̃san nɔm dwarun di n ka girari Dibilaɔ sɔ̃ɔ yɛ̃san nɔm geu gia. Mi ba wãa kpuro kpa bu gia ma nɛna na sãa Yinni Gusunɔ.

will be added

X\