Esekiɛli 47

1Yen biru durɔ wi, u ka Esekiɛli gɔsira sãa yerun kɔnnɔwɔ. Yera nim mu kuramɔ dii ten kɔnnɔn tem di sɔ̃ɔ yari yeru gia. Domi dii ten kɔnnɔ ga mɛɛrawa sɔ̃ɔ yari yeru gia. Ma nim mɛ, mu kokumɔ mu dɔɔ sãa yerun nɔm geu gia yãku yerun sɔ̃ɔ yɛ̃san nɔm dwaru gia. 2Ma u maa ka nùn da kɔnnɔ, ge ga wãa sɔ̃ɔ yɛ̃san nɔm geu gia. Ma ba besira ba da tɔɔwɔ sere kɔnnɔwɔ ge ga wãa sɔ̃ɔ yari yeru gia. Ma Esekiɛli u wa nim mɛ, mu kokumɔwa nɔm geu gia. 3Durɔ wi, u da sɔ̃ɔ yari yeru gia. N deema u wɛ̃ɛ nɛni win nɔmaɔ. Nge mɛ u dɔɔ, u yam mi yĩira gɔm soonu nɔrɔbu (1.000). Ma u Esekiɛli tɔburasia. Ma nim mɛ, mu na sere win naa wĩinɔ. 4Yen biru u maa gɔm soonu nɔrɔbu yĩira. Ma u dera Esekiɛli u nim mɛ tɔbura. Ma nim mɛ, mu na sere win dũu wĩinɔ. Ma u maa susi u yĩira gɔm soonu nɔrɔbu. Ma mu na sere win pɔraɔ. 5Ma u maa yĩira gɔm soonu nɔrɔbu mi n sãa nim bwee bakaru te Esekiɛli u ǹ kpɛ̃ u tɔbura. Domi nim mɛ, mu duku. Goo kun kpɛ̃ u mu tɔbura ma n kun mɔ ka kɛ̃ɛri. 6Ma u Esekiɛli sɔ̃ɔwa u nɛɛ, tɔnun bii, a ye kpuro mɛɛra sãa sãa? Ma u ka nùn wurama daa ten bɔ̃ɔwɔ. 7Ye u ka nùn tura mi, yera u wa dãnu nu dabi daa ten goo gookaɔ. 8Ma u nùn sɔ̃ɔwa u nɛɛ, nim mɛ, mu koo kokuwa mu da wɔɔ bera ye ya wãa sɔ̃ɔ yari yeru giaɔ ka wɔwa ye ba mɔ̀ Arabaɔ kpa mu sere da nim wɔ̃kuɔ. Mɛya mu koo nim wɔ̃kun nim dɛɛrasia. 9Mi nim mɛ, mu gesi dua kpuro, hunde koni ye ya wãa mi ya ko n wãaru mɔwa. Kpa swɛ̃ɛ yi n dabi. Domi mi nim mɛ, mu dua kpuro mu koo mɛ mu tie dɛɛrasiawa. 10Saa Engɛdin di n ka da Eni Egalaimuɔ, surɔkɔba ba ko n da n wãawa mi, ba n yãakoronu keewa daa ten goorɔ. Ta ko n swɛ̃ɛ bwese bweseka mɔwa nge nim wɔ̃ku ge ba sokumɔ Mɛditeranɛ. Swɛ̃ɛ yi, yi ko n dabi. 11Adama ba koo ten daa burenu ka ten yɛrusu deriwa bɔɔ te ta wãa min sɔ̃. 12Ten goonɔ dãa ko n kpiawa nìn wurusu kun dɛruramɔ, nìn marum kun maa kpeemɔ. Nu ko n da yewa suru baawure. Domi nu ko n nim waamɔwa sãa yerun di. Ba ko n da dãa nin marum diwa kpa bu ka nin wurusu bararun tim ko. 13Amɛniwa nɛ, Yinni Gusunɔ na gerua. Na nɛɛ, bɛɛ Isireliba, tem mɛ i ko i bɔnu ko, kon bɛɛ mɛn nɔɔ bura yenu sɔ̃ɔsi. Yosɛfun bwese kɛra bɔnu yiruwa ya koo wa. 14Bwese kɛri yi yi tien bɔnu ya ko n nɛwa. Domi nɛ, Yinni Gusunɔ na nɔma sua na bɔ̃rua na nɛɛ, bɛɛn baababara kon mu wɛ̃. Yen sɔ̃na bɛɛ i ko i mu wa i tubi di. 15Tem mɛn nɔɔ bura yeru wee. Sɔ̃ɔ yɛ̃san nɔm geu gia, ta torua saa nim wɔ̃ku ge ba mɔ̀ Mɛditeranɛn di n ka da Hɛtilonin swaaɔ sere ka Sedadin wuu duu yerɔ, 16ka Hamatiɔ ka Bɛrɔtaɔ ka Siburaimuɔ. N deema wuu si, su wãawa Damasi ka Hamatin nɔɔ bura yerun baa sɔɔ ka Hasɛɛ Hatikonin temɔ Hafaranin tem nɔɔ bura yeru gia. 17Nge mɛya sɔ̃ɔ yɛ̃san nɔm geun tem nɔɔ bura yee te, ta ko n wãa saa nim wɔ̃ku ge ba mɔ̀ Mɛditeranɛn di n ka girari Hasaa Enɔɔwɔ Damasin tem nɔɔ bura yerɔ ka Safoniɔ Hamatin tem nɔɔ bura yerɔ. 18Sɔ̃ɔ yari yeru gia maa tem mɛn nɔɔ bura yeru ta koo daa te ba mɔ̀ Yuudɛni swĩiwa Hafaraniɔ ka Damasiɔ ka Galadiɔ ka Isireliban tem baa sɔɔ. Ta ko n wãawa saa tem nɔɔ bura yee te ta wãa sɔ̃ɔ yɛ̃san nɔm geu gian di n ka na nim wɔ̃ku bɔruguuɔ sɔ̃ɔ yari yeru gia. 19Sɔ̃ɔ yɛ̃san nɔm dwaru gian tem nɔɔ bura yee te, ta koo dawa saa Tamaan di sere ka Mɛriban bwiaɔ Kadɛsiɔ kpa tu Egibitin daaru swĩi sere n ka girari nim wɔ̃ku ge ba mɔ̀ Mɛditeranɛɔ. Nɔɔ bura yee te ta wãa sɔ̃ɔ yɛ̃san nɔm dwaru gia, tera mi. 20Sɔ̃ɔ duu yeru gian tem nɔɔ bura yeru ta ko n sãawa nim wɔ̃ku ge ba mɔ̀ Mɛditeranɛ ma ya yɔ̃ra Hamatin deedeeru sɔ̃ɔ yɛ̃san nɔm geu gia. Sɔ̃ɔ duu yerugiara maa mi. 21Bɛɛ Isireliban bwese kɛri wɔkura yiru sɔɔ 22i ko i tem mɛ bɔnu ko ka tɛtɛ bɛɛn tii tiinɛ sɔɔ ka sɔɔ be ba wãa ka bɛɛ ba ka bibu mara bɛɛn suunu sɔɔ. I ko i bu garisiwa nge Isireliba. Kpa i tubi ye bɔnu ko ka be sannu ka tɛtɛ. 23I ko i sɔɔ nùn win baa wɛ̃wa bwese kɛra yè sɔɔ u wãa. Nɛ, Yinni Gusunɔwa na yeni gerua.

will be added

X\