Esekiɛli 42

1Durɔ wi, u ka man da sãa yee ten yaara tɔɔkaaɔ sɔ̃ɔ yɛ̃san nɔm geu gia, sere dia ye ya wãa batuma ye ba deri ka dii te ta wãa sãa yee ten biruɔn deedeeru. 2Dia yen dɛ̃ɛbu bu sãawa gɔm soonu wunɔbu (100) ma yen yasum mu sãa gɔm soonu weeraakuru. 3Yen bee tia ya batuma ye ba deri mi nɔɔ kisi. Batuma yen dɛ̃ɛbu bu sãawa gɔm soonu yɛndu. Ma ya ka sãa yee te sikerenɛ. Bee tia, dia ye, ya maa yaara tɔɔkaa ye ba simaa doke nɔɔ kisi. Ya gidambisa ita mɔ. Ma ba ye kɔbɛ kua kua. 4Dia yen wuswaaɔ, ba batuma deri gɔm soonu wɔkurun saka. Ma ba swaa wĩa ye sɔɔ gɔm soo teeru. Dia yen kɔnnɔsu su nɔɔ tĩiwa sɔ̃ɔ yɛ̃san nɔm geu gia. 5Dia ye ya wãa wɔllɔ ya piiminu bo ya kere ye ya wãa temɔ ka ye ya wãa suunu sɔɔ. Domi kɔbɛ ye ba kua mi, ya yen sukum kawawa. 6Adama yen kɔbɛ ya ǹ gbereba mɔ nge yaara yen dinun gbereba. Yen sɔ̃na dia ye ya wãa wɔllɔ ya ǹ suunukinu ka temkinu kpãaru tura. 7Dia yen gana ye ya yaara tɔɔkaa mɛɛra, yen dɛ̃ɛbu bu sãawa gɔm soonu weeraakuru. 8Domi dia yen tiin dɛ̃ɛbu bu sãawa gɔm soonu yɛnda nɔɔbu. Adama sãa yee ten bera gia, yen dɛ̃ɛbu bu sãawa gɔm soonu wunɔbu (100). 9Bà n wee saa yaara tɔɔkaan di, kɔnnɔ gaga wãa dia yen temɔ sɔ̃ɔ yari yeru gia gèn min di ba ra ka du. 10Kɔnnɔ ge, ga wãa mi yaara tɔɔkaan gana ya torua. Dia maa wãa yaara tɔɔkaaɔ sɔ̃ɔ yɛ̃san nɔm dwaru gia batuma ye ba deri ka dii te ta wãa sãa yee ten biruɔn deedeeru. 11Dia yen wuswaaɔ, swaa wãa. Dia ye, ya ka ye ya wãa sɔ̃ɔ yɛ̃san nɔm geu gia weenɛ. Yen dɛ̃ɛbu ka yen yasum ka nge mɛ ba ye banisina ka yen kɔnnɔsu ye kpuro ya sãawa tia. 12Nge mɛya dia ye ya wãa sɔ̃ɔ yɛ̃san nɔm dwaru gian kɔnnɔsu su sãa. Kɔnnɔ gaga wãa swaa yen duu yerɔ, yaara tɔɔkaan ganaɔ sɔ̃ɔ yari yeru gia. Min diya ba ra ka du. 13Durɔ wi, u man sɔ̃ɔwa u nɛɛ, dia ye ya wãa sɔ̃ɔ yɛ̃san nɔm geu gia mi, ka ye ya wãa sɔ̃ɔ yɛ̃san nɔm dwaru gia mi, ya wãawa Yinni Gusunɔn sɔ̃. Miya yãku kowo be ba ra du Yinni Gusunɔn sãa yerɔ ba ko n da yãku dĩa ni di. Dia ye, ya dɛɛrewa. Miya ba koo maa kɛ̃nu yi ka yãku yaa ye ba ka toranun yãkunu kua ka ni ba ka toranu sɔnwa. 14Yãku kowobu bà n dua mi, ba ǹ yariɔ tɔɔwɔ ka ben yãnu. Ba koo gina nu potiriwa. Domi yãa ni, nu sãawa sãa yãnu. Ben tiin yãna ba ko n da doke bu ka da sãa yerun yaaraɔ mi tɔn be ba tie ba yɔ̃. 15Sanam mɛ durɔ wi, u dii ten sɔɔwɔ yĩira u kpa, yera u dera na yara ka sɔ̃ɔ yari yeru gian kɔnnɔ. Ma u batuma ye ya ka sãa yee te sikerenɛ yĩirubu wɔri. 16Yera u sɔ̃ɔ yari yeru gian bera yĩira ka win dɛka ma ya kua dɛka yen nɛɛra wunɔbu (500). 17Ma u maa sɔ̃ɔ yɛ̃san nɔm geu gia yĩira. Ma ya maa kua dɛka yen nɛɛra wunɔbu. 18U maa sɔ̃ɔ yɛ̃san nɔm dwaru gia yĩira ma ya kua dɛka yen nɛɛra wunɔbu. 19U maa yĩira sɔ̃ɔ duu yeru gia ma mi gian tii maa kua dɛka nɛɛra wunɔbu. 20Nge mɛya u gana yen goonu nnɛ kpuro yĩira u ka sikerena. Yen dɛ̃ɛbu ka yen yasum mu nɛwa. Yen baayere dɛka nɛɛra wunɔbu. Gana ye, ya sãa yee te wuna nɛnɛm Yinni Gusunɔn sɔ̃.

will be added

X\