Esekiɛli 37

1Yinni Gusunɔn dam mu Esekiɛli nɛnua ma mu win bwɛ̃ra sua mu ka da wɔwa gaan suunu sɔɔ. Wɔwa ye sɔɔ, kukuna nu yiba. 2Ma dam mɛ, mu dera u sĩa kuku nin suunu sɔɔ. U deema nu dabi wɔwa ye sɔɔ, ma nu gbere woko woko. 3Ma Yinni Gusunɔ u nɛɛ, tɔnun bii, kuku ni, nu koo kpĩ nu wãaru wa? Ma u wisa u nɛɛ, wuna a yɛ̃ mɛ, Yinni. 4Ma u nùn sɔ̃ɔwa u nɛɛ, a gari geruo kuku gbebu nin sɔ̃ a nu sɔ̃ a nɛɛ, nu nɛ, Yinni Gusunɔn gari swaa dakio nu nɔ. 5Na nɛɛ, kon nu hunde kpaa wɛ̃ kpa nu maa se nu n wãa. 6Kon nu sĩi kpaanu wɛ̃ kpa n de nu wasi kpara. Kon nu hunde kpaa wɛ̃ kpa nu se nu n wãa. Saa yera ba koo gia ma nɛna na sãa Yinni Gusunɔ. 7Ma Esekiɛli u gari yi gerua nge mɛ Yinni Gusunɔ u nùn sɔ̃ɔwa. Sanam mɛ u gari yi mɔ̀, yera u damu gagu ka yĩiribu gabu nua ma kuku ni, nu susina. 8Yera u wa nu sĩinu kua ma nu wasi kpara, adama nu ǹ gina hunde mɔ. 9Yinni Gusunɔ u maa nɛɛ, tɔnun bii, a gari geruo a hunde sɔ̃ a nɛɛ, amɛniwa nɛ, Yinni Gusunɔ na gerua. Na nɛɛ, hunde yu na saa handunian goonu nnɛn di kpa yu goo ni wom wure kpa nu se nu n wãa. 10Ma u gari gerua nge mɛ Yinni Gusunɔ u nùn sɔ̃ɔwa. Ma hunde ya na ni sɔɔ, nu wãaru wa ma nu seewa nu yɔ̃ra. Nu dabi nge tabu kowobu. 11Yinni Gusunɔ u maa nɛɛ, tɔnun bii, kuku ni, nu sãawa Isireliba. Wee ba mɔ̀, ben kukunu nu gbera. Ben yĩiyɔbu bu doona ma ba kɔ̃ɔra. 12Yen sɔ̃ tɛ̃, a bu sɔ̃ɔwɔ a nɛɛ, wee kon be, nɛn tɔmbun sika wukia kpa n bu yara min di n ka bu wurama ben temɔ. 13Nà n bu kua mɛ, ba koo gia ma nɛna na sãa Yinni Gusunɔ. 14Kon bu nɛn Hunde dokea kpa bu wa ba n wãa. Kon de bu wura bu sina ben temɔ. Saa ye sɔɔra ba koo gia ma nɛ, Yinni Gusunɔ na gari gerua na maa yi kua. 15Yinni Gusunɔ u maa nɛɛ, 16wunɛ tɔnun bii, a dãa kukuru garu suo kpa a Yudaban bandun yĩsiru yore ten wɔllɔ. Kpa a maa dãa kukuru garu sua a Isireliban bandun yĩsiru yore ten wɔllɔ. 17Kpa a dãa kukunu yiru ye swɛɛna nu ko nge dãa kuku teeru wunɛn nɔma sɔɔ. 18Sanam mɛ tɔmba koo nun bikia bu nɛɛ, a ǹ kaa sun dãa yen tubusianu sɔ̃? 19Saa ye sɔɔra kaa bu wisi a nɛɛ, amɛniwa nɛ, Yinni Gusunɔ na gerua. Na nɛɛ, kon Isireliban bandun dãa kuku te sua kpa n tu swɛɛna ka Yudaban bandugiru nu ko dãa kuku teeru nɛn nɔmaɔ. 20Dãa kuku ni, nu ko n wãawa wunɛn nɔmaɔ ba n waamɔ. 21A maa bu sɔ̃ɔwɔ a nɛɛ, wee, kon Isireliba mɛnnama beri berikan di mi ba yarinɛ bwesenu sɔɔ, kpa n de bu wurama ben temɔ. 22Ba koo ko bwese teeru sere ka be ba wãa guunɔ kpa ba n sunɔ turo mɔ. Ba ǹ ko n maa sãa bwesenu yiru. Ba ǹ ko n maa sinambu yiru mɔ. 23Ba ǹ maa tii disi dokemɔ ben bũu sãanun sɔ̃ ka ben toranun sɔ̃. Kon bu yaramawa mi ba wãa ba ka tora kpuron di. Kon bu dɛɛrasiawa mam mam. Ba ko n sãawa nɛn tɔmbu kpa na n maa sãa ben Yinni. 24Dafidi nɛn sɔm kowon bibun bweseru sɔɔra ba koo sunɔ wa. Kparo turowa ba ko n mɔ. Ba koo nɛn woodaba mɛm nɔɔwa kpa bu ka ye sɔmburu ko. 25Ba koo wure ba n wãa tem mɛ sɔɔ mɛ na nɛn sɔm kowo Yakɔbu wɛ̃. Miya ben baababa ba sina. Ben tii ba koo maa sina mi sere ka ben bibun bibɔ ka baadommaɔ. Dafidin bibun bwesera ta ko n bandu dii mi sere ka baadommaɔ. 26Kon ka bu arukawani bɔri yɛndugia bɔke ye ya ko n wãa sere ka baadommaɔ. Kon de bu sina tem mi, kpa bu dabia. Kpa n nɛn sãa yeru gira ben suunu sɔɔ sere ka baadommaɔ. 27Nɛn wãa yeru ta ko n wãawa ben suunu sɔɔ. Ba ko n sãawa nɛn tɔmbu kpa na n sãa ben Yinni. 28Nɛn sãa yeru tà n wãa ben suunu sɔɔ sere ka baadommaɔ, saa ye sɔɔra bwesenu nu koo gia ma nɛna na sãa Yinni Gusunɔ wi u Isireliba gɔsa nɛnɛm.

will be added

X\