Esekiɛli 35

1Yinni Gusunɔ u Esekiɛli sɔ̃ɔwa u nɛɛ, 2tɔnun bii, a mɛɛrio Seirin guurun bera gia, kpa a tu sɔ̃ a nɛɛ, 3amɛniwa nɛ, Yinni Gusunɔ na gerua. Na nɛɛ, wee kon tu wɔrima. Kon tu nɛn nɔmu dɛmiɛ kpa n tu ko bansu. 4Kon ten wusu bansu koosia, kpa tu yɔ̃ra diiru. Saa ye sɔɔra ta koo gia ma nɛna na sãa Yinni Gusunɔ. 5Wee ta ka Isireliba yibɛrɛ tɛɛru nɛni sere ka gisɔ. Isireliban wahalan saa sɔɔ, ta bu takobi sɔkura sanam mɛ ben durum ya yewa. 6Yen sɔ̃, nɛ, Yinni Gusunɔ na nɛɛ, sere ka nɛn wãaru, kon ten yɛm yari. Yɛm mɛ ta raa yari mi, mu ko n tu swĩi. Domi ta ǹ tɔmbun yɛm yaribu yinɛ. Yen sɔ̃, ba koo ten tiin yɛm yari. 7Kon de Seirin guu te, tu ko bansu. Kon be ba sarɔ mi kpuro go. 8Tɔn be ba gon gonu nu ko n tɛriewa baama guunɔ ka gungunɔ ka wɔwi sɔɔ ka sere maa wɔrusɔ. 9Kon de tu kowa bansu sere ka baadommaɔ. Goo kun maa sinamɔ ten wusu sɔɔ. Saa ye sɔɔra ba koo gia ma nɛna na sãa Yinni Gusunɔ. 10Seiri ya nɛɛ, Isireli ka Yudan temgibu ba koo ko yegibu. Ya koo be kpuro mwa baa mɛ na wãa mi. 11Yen sɔ̃, sere ka nɛ, Yinni Gusunɔn wãaru, kon ye mɔru ka nisinu ka tusiru kɔsie nge mɛ ya raa bu kua. Kon bu tii sɔ̃ɔsi sanam mɛ kon ye siri. 12Saa ye sɔɔ, ya koo gia ma nɛ, Yinni Gusunɔ na nua wɔma ye ya Isireliban guunu wɔnwa. Ya nɛɛ, wee nu kam kua. Wee ba ye nu nɔmu sɔndia nge gbeeku yɛɛ. 13Ya tii sua nɛn wuswaaɔ ka yen gari gerubu. Ya man tɔn bia gari gerusi. Nɛn tiiwa na ye nua. 14Nɛ, Yinni Gusunɔ na maa nɛɛ, sanam mɛ tem kpuro mu ko n wãa nuku dobu sɔɔ, yen tem mu koo ko bansu. 15Domi ya nuku dobu kua sanam mɛ ya Isireliban tem kam koosia. Nge mɛya kon Seirin guuru ka Edɔmun tem mɛ kpuro kam koosia kpa n ko bansu. Saa ye sɔɔra ba koo gia ma nɛna na sãa Yinni Gusunɔ.

will be added

X\