Esekiɛli 34 - Bariba - 1996 Edition - Bible.is

1 Yinni Gusunɔ u Esekiɛli sɔ̃ɔwa u nɛɛ, 2 wunɛ tɔnun bii, a Isireliban kparobu gerusio. A bu nɛn kirɔba sɔ̃ɔwɔ. Wee ye na bu sɔ̃ɔmɔ. Na nɛɛ, be, Isireliban kparobu, ba kuawa bɔ̃rurobu. Domi ben tiin gariya ba mɔ̀. Ba ǹ yãa gɔ̃ɔ nɔɔrimɔ. 3 Wee ba yãa ni nu gum mɔ goomɔ ba temmɔ ma ba nin bom nɔrumɔ. Adama ba ǹ nu kparamɔ. 4 Ba ǹ ni nu kpanamɔ somi. Ba ǹ ni nu barɔ nɔɔri. Ba ǹ ni nu mɛɛra wan bosu tim doke. Ba ǹ ni nu gɛramɔ sure swaa gea sɔɔ. Mɛya ba ǹ ni nu kɔ̃ɔra kasu. Adama ba nu dam dɔremɔwa. 5 Ma nu yarina domi nu ǹ kparo mɔ. Nu kua gbeeku yɛɛn dĩanu. 6 Ma nu sirenɛ guunu ka gungunu wɔllɔ nu yarinɛ tem kpuro sɔɔ. Goo kun nin bwisikunu kue u sere mam nu kasum da. 7 Yen sɔ̃, be, Isireliban kparobu bu swaa dakio bu nɔ ye na bu sɔ̃ɔmɔ. 8 Nɛ, Yinni Gusunɔ, sere ka nɛn wãaru, na wa ma ba nɛn yãanu wɔri ba goomɔ. Ma nu kua gbeeku yɛɛn dĩanu yèn sɔ̃ nin kparoba kun nin bwisikunu kue bu nu nɔɔri. Ma ba sere ben tii nɔɔrimɔ. 9 Yen sɔ̃, bu swaa dakio bu nɔ ye na bu sɔ̃ɔmɔ. 10 Nɛ, Yinni Gusunɔ, na bu seesimɔ. Ba ǹ ko n maa sãa nɛn yãanun kparobu bu sere nin arufaani di. Kon nu wɔra ben nɔman di, kpa nu kun maa sãa ben dĩanu. 11 Wee ye nɛ, Yinni Gusunɔ na gerumɔ saa tɛ̃n di. Na nɛɛ, nɛn tiiwa kon nɛn yãanu mɛnna n nu nɔɔri. 12 Kon nu mɛnnawa nge mɛ yãa kparo u ra win yãanu mɛnnɛ nù n yarina. Tɔ̃ɔ te nu yarina ta sãawa yam wɔ̃ku bakaru. Kon da n nu kasuwa baama mi nu yarinɛ. 13 Kon nu yarama tem tukum di. Kpa n nu mɛnna n ka na nin temɔ Isireliɔ. Kon nu kpara guunɔ ka wɔwi sɔɔ ka sere mi tɔmba wãa kpuro. 14 Kon ka nu da kpara yee geeru sɔɔ. Kpa nu di nu wɛ̃ra. Nu koo yɔ Isireliban guunɔ kpa nu yaka geesu wa nu di. 15 Nɛn tiiwa kon nu kpara kpa n de nu wɛ̃ra. Nɛ, Yinni Gusunɔwa na yeni gerua. 16 Kon ni nu kɔ̃ɔra kasuma n ka na. Kpa n ni nu mɛɛra wan bosu tim doke. Kpa n maa ni nu barɔ nɔɔri nu dam ko. Adama kon ni nu bɔɔru go. Nɛn tiiwa kon nɛn yãanu kpara gem sɔɔ. 17 Wee ye nɛ, Yinni Gusunɔ na Isireliba be ba sãa nge yãanu sɔ̃ɔmɔ. Na nɛɛ, kon nin geenu ka kɔ̃sunu wunana. Kon yãanu ka bonu wunana. 18 Domi yaka gee si nin ganu di su nu tura sere nu si nu ǹ di taakumɔ. Nu nim gem nɔra n nu tura ma nu mɛ mu tie taaka nu burisi. 19 Yaka si nu taaka mi, siya nɛn yãa ni nu tie nu dimɔ. Nim mɛ nu maa burisi mi, mɛya nu nɔrumɔ. 20 Yen sɔ̃na nɛ, Yinni Gusunɔ na nu sɔ̃ɔmɔ na mɔ̀, kon yãa ni nu bɔɔru ka ni nu woore wunana. 21 Domi ni nu bɔɔru nu ni nu woore ka kɔbi bɔrikia nu yarinasia. 22 Wee na nu somiru wee. Kpa goo u ku raa maa nu mwɛɛri. Kon nu siria. 23 Kon nu kparo turo wɛ̃ wi u koo nu nɔɔri. U koo yariwa nɛn sɔm kowo Dafidin bweserun di. U koo nu nɔɔri kpa u n sãa nin kparo geo. 24 Nɛ Gusunɔ ko na n sãa nin Yinni. Kpa nɛn sɔm kowo Dafidi u n sãa nin kparo. Nɛ, Yinni Gusunɔwa na yeni gerua. 25 Na nɔɔ mwɛɛru kua ma kon nu bɔri yɛndu wɛ̃. Kon de gbeeku yɛɛ kpuro yi doona tem minin di. Saa ye sɔɔ, nu koo kpĩ nu kpuna gbaburɔ ka dãa sɔ̃ɔwɔ. 26 Kon de nu n wãa guu te na gɔsan bɔkuɔ. Kpa n nu domaru kua n de gura yu nɛ yen saa sɔɔ. 27 Dãnu nu koo binu ma. Tem mu koo de dĩanu nu ma, kpa baawure u n wãa bɔri yɛndu sɔɔ. Kon nɛn tɔmbun yorun yɔni kasuku kpa n bu yakia be ba bu yoru mwɛɛran nɔman di. Kpa bu gia ma nɛna Yinni Gusunɔ. 28 Tɔn tukobu ba ǹ maa bu dimɔ. Gbeeku yɛɛ yi ǹ maa bu mwɛɛrimɔ. Ba koo yariwa karin di. Goo kun maa bu narumɔ. 29 Kon bu gbea wɛ̃ ye ya koo yĩsiru yari. Ba ǹ maa gɔ̃ɔrun wahala mɔ̀ ben tem sɔɔ. Tɔn tukobu ba ǹ maa bu sekuru dokemɔ. 30 Ba koo gia ma nɛ Gusunɔ na sãawa ben Yinni. Nɛna na ka be, Isireliba wãa. Ba sãawa nɛn tɔmbu. Nɛna na yeni gerua. 31 Be nɛn tɔmbu, beya ba sãa nɛn yãa ni na nɔɔrimɔ mi. Domi na sãawa ben Yinni. Nɛ, Yinni Gusunɔwa na yeni gerua.

Esekiɛli 34 - Bariba - 1996 Edition - Bible.is - BBABSB

Annotations