Esekiɛli 31

1Isireliban yorun wɔ̃ɔ wɔkura tiasen suru itasen tɔ̃ɔ gbiikiru sɔɔra Yinni Gusunɔ u nɛɛ, 2tɔnun bii, a Egibitin sunɔ ka win tɔn dabi dabi te sɔ̃ɔwɔ a nɛɛ, wara ka nùn weenɛ win kpãaru sɔɔ. 3Wee u sãawa nge Libanin dãa ye ba mɔ̀ sɛduru. Yen kãasi yi wã ma yen wurusu kubenu sãa. Ma ya gunu ya guru winu girari. 4Gura ya ye kpɛ̃asia. Nim mɛ mu dua tem sɔɔ mu dera ya gunia. Nim mɛ kpuro mu kokumɔwa mi yen gbini yi wãa. Min diya mu kokumɔ mu daamɔ dãa ni nu tien mi. 5Yen sɔ̃na ya kpɛ̃a ya dãnu kpuro gunum kera. Yen kãasi yi dabia ma yi tɛria. Domi ya nim waamɔ too. 6Gunɔsu na su sin sokunu kua yen kãasiɔ. Ma gbeeku yɛɛ na yi maruramɔ yen kɔkɔrɔ. Ma bwese dabira na ta sɔ̃ yen saarɔ. 7Ya sãawa dãa buraru ma ya gunu ya kãasi dɛ̃u. Domi yen nuwi yi duawa sere tem sɔɔwɔ mi nim mu kpã. 8Baa nɛ, Gusunɔn dãa gbaa te ba mɔ̀ Edɛni sɔɔ, sɛduru gaa sari ye ya ka ye weenɛ. Mɛya dãa ye ba maa mɔ̀ sipɛrɛ yen gaa sari ye ya kãasi burɛ mɔ nge ye. Dãa wuru bakasu gasu maa sari si su ka yegisu weenɛ. Dãru garu sari te ta ka ye buram nɛ. 9Kãasi burɛya na ye wɛ̃ sere dãa ni nu wãa nɛ, Gusunɔn dãa gbaa te ba mɔ̀ Edɛniɔ nu nisinu seewa. 10Wee ye nɛ, Yinni Gusunɔ na gerua. Na nɛɛ, sɛduru ye, ya kpɛ̃a ya guru winu girari. Ma ya tii sua. 11Yen sɔ̃na kon ye gira kpa n ye sina boko wi u sinambu kpuro dam kere nɔmu bɛria kpa u ye kua nge mɛ yen torara nɛ. 12Tɔn tuko be ba nuku kɔ̃suru bo ba koo ye kĩi bu sura bu kɔ̃. Kpa yen kãasi yi wɔri guunu ka wɔwi sɔɔ kpa yi bɔɔkira tem mɛ kpuron wɔwi sɔɔ. Kpa tɔn be ba raa wãa yen saarɔ bu yarina bu ye deri. 13Yen bĩirun wɔllɔwa gunɔsu su koo na su sina. Kpa gbeeku yɛɛ yi yin wãa yeru ko yen kɔkɔrɔ. 14Yeni ya koo koorawa kpa dãa ni nu nim waamɔ nu ku raa ka gunia nu guru winu girari nu sere tii sua nin gunum sɔ̃. Domi dãnu ka tɔmbu kpuro ba koo gbiwa bu da bu gɔribu deema. 15Wee ye nɛ, Yinni Gusunɔ na gerumɔ. Na nɛɛ, dɔma te sɛduru ye, ya koo du gɔribun wãa yerɔ, kon de taka koora ye ya wãa yam mi kpuro yu gɔɔ wooru sina. Kon nim yɔ̃rasia yen sɔ̃, kpa n de daanu nu kokubu yɔ̃ra. Kon maa de yam mu tĩra Libaniɔ, kpa n dãnu gberasia yakasɔ. 16Sanam mɛ kon de sɛduru ye, yu wɔruma yu da gɔriɔ ka tɔn be ba dɔɔ mi sannu, be ba koo yen wɔrumaan damu nɔ ba koo diiri bɛrum sɔ̃. Gbaa te ba mɔ̀ Edɛnin dãa ni nu buram bo ka ni nu gea sãa ni kpuro ni nu gesi nim waamɔ Libaniɔ nu ko n nuku dobu mɔwa sere tem sɔɔwɔ. 17Nin tii nu koo sara nu da gɔribun wãa yerɔ nu bu deema be ba go ka takobi. Ba raa sãawa yen dam ma ba wãa yen saarɔ tɔmbun suunu sɔɔ. 18Edɛnin gbaa te sɔɔ, dãa gaa kun ka Egibitin sina boko nɛ buram sɔɔ ka kpãaru sɔɔ. Ka mɛ, ba koo nùn surewa gɔribun wãa yerɔ tem sɔɔ sɔɔwɔ ka dãa ni nu wãa Edɛni mi sannu kpa u n kpĩ ka be ba go tabu sɔɔ ka takobi, be ba ǹ Gusunɔ yɛ̃n suunu sɔɔ. Yeniwa ya koo Egibitin sina boko ka win tɔn dabi te kpuro deema. Nɛ, Yinni Gusunɔwa na yeni kpuro gerua.

will be added

X\