Esekiɛli 30

1Yinni Gusunɔ u nɛɛ, 2tɔnun bii, a Egibitigibu gerusio kpa a bu sɔ̃ a nɛɛ, amɛniwa nɛ, Yinni Gusunɔ na gerua. Na nɛɛ, wee tɔ̃ɔ kɔ̃sura wee. Bu weeweenu koowo. 3Tɔ̃ɔ te, ta sisi tè sɔɔ nɛ, Yinni Gusunɔ kon bu wɔri. Wee ta mam turuku kua. Ta ko n sãawa yam wɔ̃kuru. 4Tabu koo na Egibitiɔ kpa bu tɔn dabiru go mi, bu ben dukia gura kpa tem mɛ, mu ko bansu, kpa nuku sankira bakanu nu n wãa Etiopiɔ. 5Etiopigibu ka Putigibu ka Ludiba ka Daarububa kpuro ka Libigibu ka sere maa nɛn tɔmbu Isireli be ba ka bu nɔɔ tia sãa ba koo wɔruku bu gbisuku taa bi sɔɔ. 6Nɛ, Yinni Gusunɔ na maa gerua na nɛɛ, be ba ka Egibitigibu yinamɔ mi, ba koo bu go tabu sɔɔ saa Migidolin di n ka girari Asuaniɔ kpa dam mɛ Egibitigibu ba raa ka tii sue mi, mu kpe. Nɛ, Yinni Gusunɔwa na yeni gerua. 7Ben tem mɛ, mu koo ko bansu n kere tem mɛ n tie handunia sɔɔ. Ben wusu su koo kowa bansu mam mam n kere wuu si su tie. 8Nà n Egibitigibu dɔ̃ɔ sɔkuma ma na dera be ba ka bu yinamɔ min dam mu kpa, saa ye sɔɔra ba koo gia ma nɛna na sãa Yinni Gusunɔ. 9Yen tɔ̃ɔ te sɔɔ, kon sɔmɔbu gɔri goo nimkusu sɔɔ bu Etiopigii be ba raa wãa bɔri yɛndu sɔɔ nandasia kpa bu bɛrum soora Egibitigibun wahalan tɔ̃ɔ te sɔɔ, te ta sisi. 10Nɛ, Yinni Gusunɔ na nɛɛ, kon sina boko Nɛbukanɛsaa dendi n ka Egibitin tɔn dabi te kpuro kpeerasia. 11Wi, ka win tabu kowo wɔnwɔndu sarirugii be, ba koo na bu tem mɛ wɔri bu kpeerasia. Ba koo Egibitigibu go ka takobi kpa gonu nu yibu tem mɛ kpuro sɔɔ. 12Kon de daa te ba mɔ̀ Nilun kɛri yi gbera kpa n Egibitin tem tɔn kɔ̃sobu nɔmu bɛria. Tɔn tukobu ba koo na bu ye kpuro kam koosia. Nɛ, Yinni Gusunɔwa na yeni gerua. 13Nɛ, Yinni Gusunɔ na maa gerua na nɛɛ, kon Nɔfun bũu turanun bwãarokunu kpuro kɔsuku. Goo kun maa bandu dimɔ Egibitiɔ. Kon dewa tem mɛ, mu bɛrum duura. 14Kon Paturɔsi kpeerasia kpa n Soani dɔ̃ɔ mɛni kpa n maa Tebɛsi siri. 15Kon ka Sini mɔru ko ye, ye ya sãa nge Egibitigibun gbãra bakaru kpa n Tebɛsin tɔn dabi dabi te go. 16Kon Egibiti dɔ̃ɔ sɔku kpa Sini yu burisina. Ba koo Tebɛsin gbãraru kɔra kpa yibɛrɛba bu Nɔfu kamia sɔ̃ɔ sɔɔ gbãara. 17Ba koo Onin aluwaasiba ka Pibesɛtigibu go ka takobi. Wuu si kpuron tɔmba ba koo yoru mwa. 18Nà n Egibitigibun dam bua mɛ ba mɔ ba ka tɔmbu yoru diisie, ma dam mɛ ba raa ka tii sue mi, mu nɔru kua, yam mu koo tĩra Tapanɛsiɔ kpa bu yen tɔmbu yoru mwɛɛri. 19Kon Egibitigibu siri kpa bu gia ma nɛna na sãa Yinni Gusunɔ. 20Isireliban yorun wɔ̃ɔ wɔkura tiasen suru gbiikoon sɔ̃ɔ nɔɔba yiruse sɔɔra Yinni Gusunɔ u gerua u nɛɛ, 21tɔnun bii, na Egibitin sunɔn gãseru bua. Wee, ba ǹ wa wi u koo nùn bɛkia. Domi ba ǹ win mɛɛra ye bɔkue u sere nɛɛ, u koo kpĩ u takobi nɛnɛ. 22Wee na Egibitin sunɔ wi wɔrim wee. Kon win gãsenu kpuro bɔɔku te ta gea sãa ka te ta ǹ gea sãa. Kon de takobi yu wɔruma win nɔman di. 23Kon Egibitigibu yarinasia bu da bwese tukunun suunu sɔɔ. Kon de bu da tem baamɛre sɔɔ. 24Kon Babilonin sina boko dam wɛ̃ kpa n nùn nɛn takobi nɔmu bɛria. Adama kon Egibitin sunɔn gãseru bua kpa u weeweenu ko Babilonin sina bokon wuswaaɔ nge u gɔɔ dɔɔ. 25Kon Babilonin sina boko dam wɛ̃ kpa Egibitin sina bokogim mu kpe. Nà n nɛn takobi Babilonin sina boko nɔmu bɛria, ma u ka ye Egibitigibu wɔri, saa ye sɔɔra ba koo gia ma nɛna na sãa Yinni Gusunɔ. 26Kon Egibitigibu yarinasia bu da bwesenu kpuro sɔɔ. Kon dewa bu da tem baamɛre sɔɔ. Saa ye sɔɔra ba koo gia ma nɛna na sãa Yinni Gusunɔ.

will be added

X\