Esekiɛli 3

1U maa nɛɛ, tɔnun bii, a tire teni temwɔ kpa a da a ka Isireliba gari ko. 2Ye u nɔɔ wukia, yera Gusunɔ u tire te kpɛ̃ɛ mi, u dera u tu tema. 3Ma u nɛɛ, tɔnun bii, a wunɛn nukuru yibio kpa a wunɛn wasi diisia ka tire te na nun wɛ̃ mi. Ye u tire te tema, ma ta nùn dore nge tim. 4Yera u maa nɛɛ, Esekiɛli, a seewo a da Isireliban mi kpa a bu nɛn gari sɔ̃. 5- 6N ǹ mɔ na nun gɔriɔ bwese tuku dabinun mi, nìn barum mu nɔɔbu sɛ̃, a ǹ maa kpɛ̃ a ben gari tubu. Adama Isireliban miya na nun gɔriɔ. Nà n daa nun gɔra bwese tuku nin mi, nu koo nun swaa daki, 7adama wee, Isireliba ba ǹ nun swaa dakimɔ. Domi ba ǹ kĩ bu nɛn gere nɔ yèn sɔ̃ be kpuro ba swaa tau ma ben gɔ̃ru ga bɔɔbu. 8Yen sɔ̃, kon maa wunɛn tii bɔbiasia kpa a swaa taaya nge be, 9a n gɔ̃ru bɔ nge kperu. A ku bɛrum ko ben swaa taa bin sɔ̃. Domi ba sãawa bwese te ta ku ra mɛm nɔ. 10Ma u maa kpam nɛɛ, Esekiɛli, a swaa dakio a nɔ kpa a gari yi kon nun sɔ̃ nɛnɛ wunɛn gɔ̃ruɔ. 11Yen biru, kpa a da a wunɛn mɛro bisibu deema mi ba yoru dimɔ. Ba nun swaa daki? Ba ǹ nun swaa daki? A gesi bu sɔ̃ɔwɔ ma nɛna na ka bu gari mɔ̀. 12Yera Gusunɔn Hunde u Esekiɛli sua ma u nɔɔgiru nua win biruɔ ta gerumɔ ka dam ta mɔ̀, bu Yinni Gusunɔ siaro mi u wãa u win yiiko baka sɔ̃ɔsimɔ. 13Ma u hunde koni ben kasan wɔkinu nɔɔmɔ ya soonamɔ ka sere maa ben uruuban wɔkinu. Wɔki ni, nu kpɛ̃a n banda. 14Gusunɔn Hunde wi u nùn sua mi, u ka nùn doona, ma win dam nùn nɛnua. Ma Esekiɛlin mɔru seewa u burisina. 15U tura Tɛli Abibuɔ, Kebarin daarun bɔkuɔ mi yoo be, ba wãa. Ma u sina ka biti baka ben suunu sɔɔ sɔ̃ɔ nɔɔba yiru. 16Sɔ̃ɔ nɔɔba yiru yen biru, Yinni Gusunɔ u Esekiɛli sɔ̃ɔwa u nɛɛ, 17wunɛ tɔnun bii, kon de a Isireliba nɔni doke. Kaa n da nɛn gari swaa daki kpa a ka bu kirɔ ko. 18Nɛ, Yinni Gusunɔ, nà n tɛ̃ nɛɛ, tɔn kɔ̃so goo u koo gbi, ma a ǹ nùn kirɔ kue u win daa kɔ̃sa ye deri u ka win wãaru wɔra, tɔn kɔ̃so wi, u koo gbiwa win daa yen sɔ̃. Wuna kon maa win yɛm bikia. 19Adama à n nùn kirɔ kua, ma u ǹ win daa kɔ̃sa ye deri, u koo gbiwa win daa kɔ̃sa yen sɔ̃ kpa wunɛ a wunɛn wãaru wɔra. 20Gemgii ù n gem deri u kɔ̃sa kua ma a ǹ nùn kirɔ kue, ma na nùn yina bɛria, u koo gbiwa kɔ̃sa yen sɔ̃. Na ǹ win yellun daa gea garisimɔ, adama wuna kon win yɛm bikia. 21À n maa nùn kirɔ kua u ku ka durum ko, ma u ǹ durum ye kue, u ǹ gbimɔ. Wunɛn tii a maa wunɛn wãaru wɔrawa mi, domi a nùn kirɔ kua. 22Yinni Gusunɔn dam mu Esekiɛli yɔɔwa ma u nùn sɔ̃ɔwa u nɛɛ, a seewo a da wɔwaɔ. Miya kon nun gari sɔ̃. 23Ma u seewa u da wɔwa mi. Ma u Gusunɔn yiikon girima wa nge sanam mɛ u raa wãa Kebarin daarun bɔku mi. Ma u yiira ka dam u siriru tem girari. 24Yera Gusunɔn Hunde u maa nùn yɔɔwa. Ma u nùn seeya u yɔ̃rasia. Saa ye sɔɔra Yinni Gusunɔ u nɛɛ, a doo a tii kɛnusi wunɛn dirɔ. 25Mɛya ba koo nun bɔke kpa a kpana a yari tɔɔwɔ, tɔmbu bu nun wa. 26Kon de wunɛn yara yu wunɛn daro mani kpa a kpana a gari ko. Mɛya a ǹ kaa kpĩ a maa bu gerusi be, be ba ku ra mɛm nɔ mi. 27Adama nà n ka nun gari kua, kon wunɛn nɔɔ wukia. Saa ye sɔɔra kaa tɔn be sɔ̃ a nɛɛ, amɛniwa nɛ, Yinni Gusunɔ na gerua. Adama ben gaba ba koo nun swaa daki, gaba kun maa nun swaa dakimɔ. Domi ba sãawa bwese te ta ku ra mɛm nɔ.

will be added

X\